ଶୁଖିଲା ମହାନଦୀ ପାଇଁ ଶୁଖାସୋଢାରୁ ବିଜେଡିର ମହାସଂଗ୍ରାମ ! ମୁଖ୍ୟମନ୍ତ୍ରୀ କହିଲେ, ଓଡିଶା ପାଇଁ ଦରଦ ଥିଲେ ଛିତିଶଗଡକୁ କାମ ବନ୍ଦ କରିବା ପାଇଁ କହୁ ବିଜେପି
କନକ ବ୍ୟୁରୋ : ମହାନଦୀ ପାଇଁ ମହାସଂଗ୍ରାମ । ବିଜେଡି ଆରମ୍ଭ କଲା ଦ୍ୱିତୀୟ ପର୍ଯ୍ୟାୟ ମହାନଦୀ ସୁରକ୍ଷା ଯାତ୍ରା । ମୁଖ୍ୟମନ୍ତ୍ରୀ କହିଛନ୍ତି ମହାନଦୀ ଆମର ମାଆ । ତେଣୁ ଏହାର ସୁରକ୍ଷା ପାଇଁ ଛତିଶଗଡ ଉପରମୁଣ୍ଡରେ ବନ୍ଧ ବାନ୍ଧିବା ବନ୍ଦ କରୁ । ଏପରିକି ଓଡିଶାବାସୀଙ୍କ ପ୍ରତି ଦରଦ ଥିଲେ କାମ ବନ୍ଦ କରିବାକୁ କୁହନ୍ତୁ ଓଡିଶା ବିଜେପି ନେତା । ମହାନଦୀର ଓଡିଶାରେ ପ୍ରବେଶ ପଥ ଝାରସୁଗୁଡାରୁ ଅଭିଯାନ ଆରମ୍ଭ କରି ଏପରି ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ । ଖରାଦିନେ ଶୁଖିଲା ପଡିଥିବା ମହାନଦୀକୁ ନେଇ ଜନଆନ୍ଦୋଳନ ସୃଷ୍ଟି କରୁଛି ବିଜୁ ଜନତା ଦଳ । ମହାନଦୀ ଅବବାହିକାରେ ଥିବା ୧୫ଟି ଜିଲ୍ଲାରେ ମହାନଦୀ ସୁରକ୍ଷା ଯାତ୍ରାବେଳେ ବିଜେପି ସରକାରଙ୍କ ବୈମାତୃକ ମନୋଭାବକୁ ଲୋକଙ୍କ ପାଖରେ ପହଂଚାଇବା ପାଇଁ ପ୍ରସ୍ତୁତ ହୋଇଛି ରଣନୀତି ।
Kanak News is now on WhatsApp
Join and get latest news updates delivered to you via WhatsApp
ଓଡିଶାର ଜୀବନରେଖା ମହାନଦୀକୁ ମାଆ କହି, ଏହାର ସୁରକ୍ଷା ପାଇଁ ଲଢେଇକୁ ଜୋରଦାର କରିଛି ବିଜୁ ଜନତା ଦଳ । ଆଉ ମହାନଦୀର ଓଡିଶାରେ ପ୍ରବେଶ ପଥ ଝାରସୁଗୁଡା ଜିଲ୍ଲାର ଶୁଖାସୋଢାରୁ ଦ୍ୱିତୀୟ ପର୍ଯ୍ୟାୟ ମହାନଦୀ ଅଭିଯାନକୁ ଆରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଲକ୍ଷ ଲକ୍ଷ ଓଡିଶାବାସୀଙ୍କୁ ପ୍ରଭାବିତ କରୁଥିବା ଏହି ସମ୍ବେଦନଶୀଳ ପ୍ରସଙ୍ଗରେ ବିଜେପିକୁ ସିଧାସଳଖ ଟାର୍ଗେଟ କରିଛନ୍ତି ନବୀନ ।
କେନ୍ଦ୍ରରେ ବିଜେପି ସରକାର ଓ ଛତିଶଗଡରେ ବିଜେପି ସରକାରଙ୍କ ମନୋବୃତ୍ତି ଓଡିଶା ବିରୋଧୀ । ଓଡିଶାର ବିଜେପି ନେତାମାନେ ଛତିଶଗଡର କାମକୁ ସମର୍ଥନ କରୁଛନ୍ତି । ଆଉ ଓଡିଶା ଆସି ଏଠାରେ କୁମ୍ଭୀର କାନ୍ଦଣା କାନ୍ଦୁଛନ୍ତି । ଯଦି ବିଜେପି ନେତାଙ୍କର ଓଡିଆଙ୍କ ପ୍ରତି, ଓଡିଶା ପ୍ରତି ଦରଦ ଅଛି, ତେବେ ଛତିଶଗଡ ସରକାରର କାମକୁ ବିରୋଧ କରନ୍ତୁ ।
ଉଭୟ ଛତିଶଗଡ ଓ କେନ୍ଦ୍ରରେ ଥିବା ବିଜେପି ସରକାର ଓଡିଶାର ସ୍ୱାର୍ଥ ପ୍ରତି ଆଖି ବୁଜିଦେଇଥିବା ଅଭିଯୋଗ କରି ଓଡିଶା ବିଜେପିକୁ ମଧ୍ୟ ଟାର୍ଗେଟ କରିଛନ୍ତି ମୁଖ୍ୟମନ୍ତ୍ରୀ । ବିଜେଡିର ସମସ୍ତ ଛାମୁଆ ନେତା ଝାରସୁଗୁଡା ଜିଲ୍ଲା ଶୁଖାସୋଢା ଓ ବରଗଡ ଜିଲ୍ଲା ଚିଖିଲିରୁ ମହାନଦୀ ସୁରକ୍ଷା ଯାତ୍ରାରେ ସାମିଲ ହୋଇ ଜନଆନ୍ଦୋଳନକୁ ତେଜିଆନ କରିଛନ୍ତି ।
ମହାନଦୀ ଅବବାହିକରେ ଥିବା ୧୫ଟି ଜିଲ୍ଲାରେ ହେବ ଦ୍ୱିତୀୟ ପର୍ଯ୍ୟାୟ ମହାନଦୀ ସୁରକ୍ଷା ଯାତ୍ରା । ଝାରସୁଗୁଡା ଓ ବରଗଡରୁ ଜଗତସିଂହପୁର ଜିଲ୍ଲା ପାରାଦୀପ ଯାଏଁ ଜନସଚେତନତା ସୃଷ୍ଟି କରିବ ବିଜୁ ଜନତା ଦଳ । ଖରାଦିନେ ଛତିଶଗଡ ପଟେ ମହାନଦୀରେ ପାଣି ଲହଡି ଭାଙ୍ଗୁଥିବାବେଳେ ଓଡିଶା ପଟରେ ଶୁଖିଲା ପଡିଛି । ଯାହାକୁ ନେଇ ଓଡିଶା ଗୋଟିଏ ପଟେ ନ୍ୟାୟିକ ଲଢେଇ ଜାରି ରଖିଥିବାବେଳେ ଅନ୍ୟପଟେ ଜନ ଆନ୍ଦୋଳନ ସୃଷ୍ଟି କରିବାକୁ ଅଂଟା ଭିଡିଛି ଶାସକ ବିଜେଡି ।