କନକ ବ୍ୟୁରୋ : ଓଡ଼ିଶାର ସବୁଠୁ ବଡ ମେଡିକାଲରୁ ପିଲା ଚୋରୀ ଅଭିଯୋଗ । ଆଶା କର୍ମୀ ବେଶରେ ଆସି ନବଜାତକ ଶିଶୁକୁ ଚୋରୀ କରିନେଲେ ମହିଳା । ଏପରି ଏକ ଘଟଣା ଘଟିଛି କଟକ ଏସସିବିରେ । ଟୀକାକରଣ କରାଇ ଦେବା ନାଁରେ ଶିଶୁକୁ ନେଇ ଆଉ ଫେରିଲେ ନାହିଁ ମହିଳା ଜଣକ । ଏହି ଘଟଣା ପଦାକୁ ଆସିବା ପରେ ସାରା ରାଜ୍ୟରେ ଚାଂଚଲ୍ୟ ଖେଳିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏପରିକି ଟୀକାକରଣ ନାଁରେ ବାରମ୍ବାର ଏପରି ଘଟଣା ଘଟୁଥିବା ମାନିଛନ୍ତି ଖୋଦ୍ ଏସସିବି ଜରୁରୀକାଳୀନ ଅଧିକାରୀ ଭୁବନାନନ୍ଦ ମହାରଣା । ଢେଙ୍କାନାଳ କଙ୍କଡାହାଡ ଅଂଚଳର ପ୍ରମୋଦ ପତିଙ୍କ ପତ୍ନୀ ମଙ୍ଗଳବାର ଦିନ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ । ପରେ ବୁଧବାର ଦିନ ଶିଶୁକୁ ଟୀକାକରଣ କରାଇ ଦେବା ନାଁରେ ଜଣେ ମହିଳା ନିଜକୁ ଆଶାକର୍ମୀର ପରିଚୟ ଦେଇ ନବଜାତକୁ ନେଇ ଆଉ ଫେରିନଥିଲେ ।
ଦୀର୍ଘ ସମୟ ବିତିବା ପରେ ମହିଳା ଜଣକ ନଫେରିବାରୁ କିଛି ଅଘଟଣ କଥା ଚିନ୍ତା କରି ପରିବାର ଲୋକେ ମଙ୍ଗଳାବାଗ ଥାନାରେ ଶିଶୁ ଚୋରି ନେଇ ଅଭିଯୋଗ କରିଛନ୍ତି । ତେବେ କଟକ ଏସସିବିରେ ବାରମ୍ବାର ଏପରି ଶିଶୁ ଚୋରୀ ଘଟଣା ଘଟୁଥିବା ବେଳେ ଏଠାରେ ଏକ ବଡଧରଣର ରାକେଟ କାମ କରୁଥିବା ସନ୍ଦେହ ଦେଖାଦେଇଛି । ପୂର୍ବରୁ ମଧ୍ୟ ବାରମ୍ବାର ଏପରି ଘଟଣା ଘଟିଥିଲେ ମଧ୍ୟ ପୁଣି ଥରେ କିପରି ହସ୍ପିଟାଲ ଭିତରୁ ଛୁଆ ଚୋରୀ ହେଲା ତାକୁ ନେଇ ପ୍ରଶ୍ନ ଉଠିଛି ।