ପ୍ରେମିକକୁ ପାଇବାକୁ ସ୍ୱାମୀଙ୍କୁ ଧୋକା : ୭ ବର୍ଷ ପରେ ପିପିଲିରୁ ଧରାପଡିଲେ ଧୋକାବାଜ ପତ୍ନୀ, ପତ୍ନୀ ହତ୍ୟା ଅଭିଯୋଗରେ ଜେଲ ଯାଇଥିଲେ ସ୍ୱାମୀ
କନକ ବ୍ୟୁରୋ : ପ୍ରେମିକକୁ ପାଇବାକୁ ସ୍ୱାମୀକୁ ଧୋକା । ସାତ ବର୍ଷ ପରେ ଫେରିଲା ପତ୍ନୀ । ଦୁନିଆ ଜାଣିଥିଲା ସେ ମୃତା । ତାଙ୍କୁ ହତ୍ୟା କରିଥିବା ଅଭିଯୋଗରେ ଗିରଫ ହୋଇ ତାଙ୍କ ସ୍ୱାମୀ ଜେଲ ବି ଯାଇଥିଲେ । ହେଲେ ଏବେ ପ୍ରେମିକ ସହ ମହିଳାଙ୍କୁ ଧରିଛି ପୋଲିସ । କେନ୍ଦ୍ରାପଡା ଜିଲ୍ଲା ପାଟକୁରା ଥାନା ଚାଉଳିଆ ବାମରା ଗାଁରୁ ଆସିଛି ଏଭଳି ଖବର । ପାଟକୁରା ପୋଲିସ କୌଣସି ସୂତ୍ରରୁ ଖବର ପାଇ ପୁରୀ ଜିଲ୍ଲା ପିପିଲି ଅଂଚଳରୁ ମୃତ ବୋଲି କୁହାଯାଉଥିବା ମହିଳାଙ୍କ ସମେତ ତାଙ୍କର ପ୍ରେମିକ ଓ ସେମାନଙ୍କର ୨ ସନ୍ତାନଙ୍କୁ ହେପାଜତକୁ ଆଣିଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୩ ଫେବ୍ରୁଆରୀ ୭ରେ ଚାଉଳିଆ ବାମରାର ଗନ୍ଧର୍ବ ସୂତାରଙ୍କ ପୁଅ ଅଭୟ ସୂତାର କୁଜଙ୍ଗ ଥାନା ଅନ୍ତର୍ଗତ ସମାଗୋଳ ଗ୍ରାମର ପହଲ୍ଲାଦ ମହାରଣାଙ୍କ ଝିଅ ମିଲି ଓରଫ ଇତିଶ୍ରୀ ମହାରଣାଙ୍କୁ ବୈଦିକ ରୀତିରେ ବିବାହ କରିଥିଲେ । ହେଲେ ବିବାହର ୧୫ ଦିନ ପରେ ଅର୍ଥାତ ୨୨ ତାରିଖରେ ଅଭୟ ତାଙ୍କ ସ୍ତ୍ରୀ ମିଲିଙ୍କ ସହ ଶ୍ୱଶୁର ଘରକୁ ଯାଇଥିଲେ । ମାତ୍ର ଏହି ସମୟରେ ଶାଶୁଘର ଲୋକେ ଅଧିକ ଯୌତୁକ ଦାବି କରି ତାଙ୍କୁ ନିର୍ଯାତନା ଦେଉଥିବା ମିଲି ତାଙ୍କ ବାପାଙ୍କୁ କହିଥିଲେ । ଝିଅ ମିଲିଠାରୁ ଏହି ଖବର ଶୁଣି ଝିଅ ଜ୍ୱାଇଁଙ୍କୁ ସାଥିରେ ଆଣି ପ୍ରହ୍ଲାଦ ବାମରାକୁ ଆସିଥିଲେ ।
ଝିଅ ଯେମିତି ଭଲରେ ଚଳିବ ସେନେଇ ଘର ଲୋକଙ୍କ ସହିତ ଆଲୋଚନା କରିଥିଲେ । କିନ୍ତୁ ପରଦିନ ସକାଳୁ ହଠାତ ମିଲି ଶାଶୁ ଘରୁ କୁଆଡେ ନିଖୋଜ ହୋଇଯାଇଥିଲେ । ଶାଶୁଘର ଲୋକଙ୍କ ସମେତ ମିଲିଙ୍କ ବାପା ତାଙ୍କୁ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ ତାଙ୍କର କିଛି ସନ୍ଧାନ ପାଇନଥିଲେ । ଏନେଇ ପାଟକୁରା ଥାନାରେ ଏତଲା ଦେଇଥିଲେ ମିଲିଙ୍କ ବାପା । ଅଭିଯୋଗ ଆଧାରରେ ଅଭୟଙ୍କୁ ଗିରଫ କରିଥିଲା ପୋଲିସ୍ ।