ବାୟୁମଣ୍ଡଳରେ ରେକର୍ଡ ସ୍ତର ଛୁଇଁଲା ବିଷାକ୍ତ ଅଙ୍ଗାରକାମ୍ଳ ବାଷ୍ପ ! ତାପମାତ୍ରା ୩ ଡିଗ୍ରି ବଢ଼ିଯିବ, ସମୁଦ୍ର ପତନ ୨୦ ମିଟର ଉଠିଯିବ
ପୃଥିବୀର ବାୟୁମଣ୍ଡଳରେ ବିଷାକ୍ତ ଅଙ୍ଗାରକାମ୍ଳ ବାଷ୍ପ ପରିମାଣ ରେକର୍ଡ ସ୍ତର ଛୁଇଁଛି । ୨୦୧୬ ମସିହାରେ ଏହା ଏପରି ବର୍ଦ୍ଧିତ ହାରରେ ବଢ଼ିଚାଲିବା ସହ ତାହା ବଜାୟ ରହିଛି । ଲକ୍ଷ ଲକ୍ଷ ବର୍ଷ ଭିତରେ ମଧ୍ୟ ଏଭଳି ସ୍ଥତିି ଦେଖାଦେଇନଥିଲା । ଏହାର ପରିଣତି ସ୍ୱରୂପ ପୃଥିବୀର ସାମଗ୍ରିକ ତାପମାତ୍ରା ୩ ଡିଗ୍ରି ସେଲ୍ସିଅସ୍ ବଢ଼ିଯିବା ସହ ସମୁଦ୍ର ପତନ ୨୦ ମିଟର ଅଧିକ ଉଚ୍ଚ ହୋଇଯିବ । ଜାତି ସଂଘର ବିଶ୍ୱ ପାଣିପାଗ ନିର୍ଣ୍ଣୟ ସଂସ୍ଥା ଉପଲବ୍ଧ ତଥ୍ୟକୁ ଭିତ୍ତି କରି ସୋମବାର ଏଭଳି ଆଶଙ୍କା ପ୍ରକଟ କରିଛି ।
Kanak News is now on WhatsApp
Join and get latest news updates delivered to you via WhatsApp
ଓ୍ଵାର୍ଲ୍ଡ ମେଟେରୋଜିକାଲ୍ ଅର୍ଗାନାଇଜେସନ୍ ତାହାର ବାର୍ଷିକ ସବୁଜ ବାଷ୍ପ ବିବରଣୀ ଉପସ୍ଥାପନରେ ପ୍ରକାଶ କରିଥିବା ତଥ୍ୟ ଅନୁଯାୟୀ, ୨୦୧୫ ମସିହାରେ ବାୟୁମଣ୍ଡଳରେ ଅଙ୍ଗାରକାମ୍ଳ ପରିମାଣ ୪୦୦ ପିପିଏମ୍(ପାର୍ଟ୍ସ ପର୍ ମିଲିଅନ୍) ରହିଥିବା ବେଳେ ୨୦୧୬ ବେଳକୁ ତାହା ୪୦୩.୩ ପିପିଏମ୍ରେ ପହଞ୍ଚିଛି । ଏଇ ବର୍ଷକ ଭିତରେ ଅଙ୍ଗାରକାମ୍ଳ ବୃଦ୍ଧି ହାର ଗତ ଦଶନ୍ଧି ଭିତରେ ହୋଇଥିବା ବୃଦ୍ଧି ହାର ଠାରୁ ପ୍ରାୟ ୫୦ ପ୍ରତିଶତ ଦ୍ରୁତତର ରହିଛି । ବିଶ୍ୱରେ କଳକାରଖାନା ବିକଶିତ ହେବା ପୂର୍ବ ସ୍ଥିତିର ଅଙ୍ଗାରକାମ୍ଳ ସ୍ତର ଠାରୁ ବର୍ତ୍ତମାନର ସ୍ତର ୪୫ ପ୍ରତିଶତ ଅଧିକ ରହିଛି ।
ଖଣିଜ ତୈଳ, କୋଇଲା, ସିମେଣ୍ଟ ଆଦିର ବ୍ୟାପକ ବ୍ୟବହାର ସାଙ୍ଗକୁ ବିକ୍ଷିପ୍ତ ଜଙ୍ଗଲକଟାର ପ୍ରଭାବ ହିଁ ୨୦୧୬ ମସିହା ବେଳକୁ ଏଭଳି ସ୍ଥିତି ପହଞ୍ଚାଇଛି । ଏଥି ସହିତ ଏଲ୍ ନିନୋର ପ୍ରଭାବ ମଧ୍ୟ ଅଙ୍ଗାରକାମ୍ଳ ସ୍ତର ବଢ଼ାଇବାରେ ଖୋରାକ ଯୋଗାଇଛି । ୧୯୯୦ ମସିହା ପରଠାରୁ ଅଙ୍ଗାରକାମ୍ଳ ଏବଂ ଅନ୍ୟାନ୍ୟ ସବୁଜ ଗୃହ ବାଷ୍ପ ଦ୍ୱାରା ଉଷ୍ମୀକରଣ ପ୍ରକ୍ରିୟା ୪୦ ପ୍ରତିଶତ ବଢ଼ିଯାଇଛି । ଅନ୍ୟତମ ଉଷ୍ମକାରୀ ବାଷ୍ପ ମିଥେନ୍ ଓ ନାଇଟ୍ରସ୍ ଅକ୍ସାଇଡ୍ ପରିମାଣ ଗତବର୍ଷ ରେକର୍ଡ ସ୍ତର ଛୁଇଁଥିବା ଜଣାଯାଇଛି । ବୈଜ୍ଞାନିକଙ୍କ ଅନୁଧ୍ୟାନ ଅନୁଯାୟୀ, ତୁଷାର ଯୁଗର ଅବସାନ ପର ଠାରୁ ଅଙ୍ଗାରକାମ୍ଳ ବୃଦ୍ଧିହାର ଶହେ ଗୁଣ ଦ୍ରୁତତର ହୋଇଚାଲିଛି । ଅବଶ୍ୟ ସାଢ଼େ ତିନି ନିୟୁତ ବର୍ଷ ତଳେ ଅଙ୍ଗାରକାମ୍ଳ ସ୍ତର ୪୦୦ ପିପିଏମ୍ ଛୁଇଁଥିଲା । ସେତେବେଳେ ବି ଭୂପୃଷ୍ଠର ତାପମାତ୍ରା ବର୍ତ୍ତମାନ ଠାରୁ ୨ରୁ ୩ ଡିଗ୍ରି ସେଲ୍ସିଅସ୍ ଅଧିକ ରହିଥିଲା । ପରିଣତି ସ୍ୱରୂପ ସେତେବେଳେ ଗ୍ରିନ୍ଲ୍ୟାଣ୍ଡ୍ ଏବଂ ଆଣ୍ଟାର୍କଟିକାର ବରଫ ଖଣ୍ଡ ସବୁ ତରଳି ସମୁଦ୍ର ପତନ ବର୍ତ୍ତମାନର ପତନଠାରୁ ୧୦ରୁ ୨୦ ମିଟର ବଢ଼ିଯାଇଥିଲା ।
ତେଣୁ ସାମ୍ପ୍ରତିକ ସ୍ଥିତିରେ ଅନୁରୂପ ପରିଣତି ଆଶଙ୍କା ହିଁ ବିଶ୍ୱ ସମୁଦାୟକୁ ପ୍ରତିକାର ବିଚାର ପାଇଁ ଆହ୍ଵାନ କରିଛି । ୨୦୧୫ ମସିହା ପରିବେଶ ସଂକ୍ରାନ୍ତ ପ୍ୟାରିସ୍ ଜଳବାୟୁ ରାଜିନାମାକୁ ସମର୍ଥନ କରୁଥିବା ୧୯୫ଟି ଦେଶ ଆସନ୍ତା ମାସରେ ସେଥିପାଇଁ ଏକ ଜରୁରୀ ବୈଠକରେ ସମବେତ ହେବେ ବୋଲି ଜଣାଯାଇଛି । ସମ୍ଭାବ୍ୟ ବିପତ୍ତିରୁ ବର୍ତ୍ତିବା ପାଇଁ ଏହି ସମ୍ମିଳନୀରେ କିଛି ସହମତି ଭିତ୍ତିକ ପ୍ରତିକାର ମିଳିବ ବୋଲି ଆଶା କରାଯାଉଛି ।