ଗଭୀର ପୋଖରୀରେ ଅଥଳ ଜଳରାଶି. . .ଜୀବନକୁ ବାଜି ଲଗାଇ ଦୁଇ ବର୍ଷର ଶିଶୁକୁ ବଂଚାଇଲେ ୧୦ ବର୍ଷର ନାବାଳକ । ଘଟଣାକୁ ନେଇ ରାଜନଗର ଅଂଚଳରେ ଜୋରଦାର ଚର୍ଚ୍ଚା
କନକ ବ୍ୟୁରୋ : ଗଭୀର ପୋଖରୀ ସାଙ୍ଗକୁ ଅଥଳ ଜଳରାଶି । ମାତ୍ର ୧୦ବର୍ଷର ବାଳକ ଅଂଶୁମାନ ଜୀବନକୁ ବାଜି ଲଗାଇ ଶିଶୁ ପୁତ୍ରକୁ ଉଦ୍ଧାର ପାଇଁ ଆଗପଛ ବିଚାର ନକରି ପୋଖରୀକୁ ଲମ୍ଫ ମାରିଥିଲେ । ଘଟଣାକୁ ନେଇ ରାଜନଗର ଅଂଚଳରେ ଜୋରଦାର ଚର୍ଚ୍ଚା । କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକର ଡାଙ୍ଗମାଳ ପଂଚାୟତ ବରାଡିଆ ଗାଁର ବିଭୀଷଣ ରାଉତଙ୍କ ୨ ବର୍ଷର ଶିଶୁ ପୁତ୍ର ଘର ପଛପଟେ ଖେଳୁଥିବା ସମୟରେ ପୋଖରୀ ଆଡକୁ ଚାଲି ଯାଇ ପୋଖରୀରେ ଖସି ପଡିଥିଲା । ଗାଁ ଦୋକାନକୁ ଯିବା ବେଳେ ପାଣିରେ ଏକ ଲକେଟ୍ ଦେଖିବାକୁ ପାଇଥିଲେ ଅଂଶୁମାନ । ଟିକେ ଭଲ ଭାବେ ଦେଖିବା ପରେ ଜାଣିବାକୁ ପାଇଲେ ପ୍ରକୃତରେ ଶିଶୁଟିଏ ପାଣିରେ ବୁଡି ଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଆଉ ଡେରି ନକରି ହଠାତ୍ ପୋଖରୀ ଭିତରକୁ ଡେଇଁ ବୁଡି ଯାଉଥିବା ଶିଶୁକୁ ଉଦ୍ଧାର କରି ଆଣିଥିଲେ ଅଂଶୁମାନ । ପାଣିରୁ ଉଦ୍ଧାର ସମୟରେ ଶିଶୁପୁତ୍ରଟି ମୂମୁର୍ଷୁ ଅବସ୍ଥାରେ ଥିଲା । ତୁରନ୍ତ ତାକୁ ଡାଙ୍ଗାମାଳ ପ୍ରାଥମିକ ଡାକ୍ତରଖାନାରେ ଭର୍ତି କରାଯାଇଥିଲା । ସେଠାରୁ କେନ୍ଦ୍ରାପଡା ଡାକ୍ତରଖାନାକୁ ପଠାଇ ଦେଇଥିଲେ ଡାକ୍ତର । ୨ ଦିନ ଡାକ୍ତରଖାନାରେ ଚିକିତ୍ସିତ ହେବା ପରେ ଆଜି ସକାଳେ ଶିଶୁ ପୁତ୍ରଟି ସୁସ୍ଥ ହୋଇ ଘରକୁ ଫେରିବା ପରେ ପରେ ତାକୁ ଉଦ୍ଧାର କରିଥିବା ଅଂଶୁମାନଙ୍କ ପାଇଁ ଛୁଟିବାରେ ଲାଗିଛି ପ୍ରଶଂସାର ସୁଅ ।
ଅଂଶୁମାନ ନିଜ ଜୀବନକୁ ବାଜି ଲଗାଇ ଗଭୀର ପୋଖରୀ ଭିତରକୁ ପଶି ଶିଶୁପୁତ୍ରର ଜୀବନ ବଂଚାଇଥିବାରୁ ତାଙ୍କର ସାହସିକତାକୁ ପୁରା ଗ୍ରାମବାସୀ ଗର୍ବ କରୁଛନ୍ତି । ଉଦ୍ଧାର ଶିଶୁପୁତ୍ରର ପରିବାର ଲୋକେ କହିଛନ୍ତି ଭାଗବାନ ଆମ ପୁଅକୁ ନୂଆ ଜୀବନ ଦେବାକୁ ଅଂଶୁମାନକୁ ଦେବଦୂତ କରି ପଠାଇଥିଲେ ।