ରାତିର ଘନ ଅନ୍ଧାର ଭିତରେ ମିଂଜି ମିଂଜି ଆଲୁଅରେ ଚାଲିଥିଲା ବମିଖାଲ ଓଭରବ୍ରିଜ ନିର୍ମାଣ ? ପେଟ ପାଟଣା ପାଇଁ ସହରକୁ ଧାଇ ଆସିଥିବା ଶ୍ରମିକଙ୍କ ଚାଲିଗଲା ଜୀବନ, ହେଲେ ଏଥିପାଇଁ ଦାୟୀ କିଏ ?
କନକ ବୁରୋ : ଜୀବନ ଜୀବିକାର ସନ୍ଧାନରେ ସହରକୁ ଧାଇଁ ଆସୁଥିବା ଶ୍ରମିକ କେତେ ସୁରକ୍ଷିତ ବମିଖାଲର ଦୁର୍ଘଟଣା ହିଁ ବୟାନ କରୁଛି । ଯେଉଁମାନେ ପ୍ରକୃତରେ ରାଜଧାନୀକୁ ଗଢ଼ୁଛନ୍ତି, ଚକାଚକ୍ ରାସ୍ତା ଓ ଆକାଶଚୁମ୍ଭୀ ନିର୍ମାଣ କରୁଛନ୍ତି, ସେମାନଙ୍କର ଅବସ୍ଥା କ’ଣ, ଗତକାଲିର ଅଘଟଣରୁ ସ୍ପଷ୍ଟ ହେଉଛି । କେମିତି ଘଟିଥିଲା ଏହି ଅଘଟଣ ଆଉ କେଉଁ ପରିସ୍ଥିତିରେ ଚାଲିଗଲା ଜଣେ ଶ୍ରମିକର ଜୀବନ ?
Kanak News is now on WhatsApp
Join and get latest news updates delivered to you via WhatsApp
ୟପେଟ ପାଟଣା ପାଇଁ ପ୍ରାୟ ୪ଶହ କିଲୋମିଟର୍ ଧାଇଁ ଆସିଥିବା ଜଣେ ଶ୍ରମିକଙ୍କୁ ଏମିତି କରୁଣ ପରିସ୍ଥିତିର ସାମ୍ନା କରିବାକୁ ହେବ ହୁଏତ କେହି କଳ୍ପନା ବି କରିନଥିଲେ । ଜୀବିକାର ସନ୍ଧାନରେ ଭିଟାମାଟି ଛାଡି ଧାଇଁ ଆସିଥିବା ଶ୍ରମିକଟି ବୋଧେ ଭାବି ରଖିଥିଲା-ଦୁଇ ପଇସା ରୋଜଗାର କରି ଘରକୁ ଫେରିଲେ ପରିବାର ଖୁସିରେ ଚଳିବ । ହେଲେ ଯେଉଁ ଲକ୍ଷ୍ୟ ନେଇ ଭୁବେନେଶ୍ୱର ଧାଇଁ ଆସିଥିଲା ସୁନ୍ଦରଗଡ଼ର ଏହି ଶ୍ରମିକ, ସେହି ଲକ୍ଷ୍ୟ ପୁରଣ ହେବା ପୁର୍ବରୁ ତାକୁ ଏହି ଦୁନିଆ ବିଦାୟ ନେବାକୁ ପଡ଼ିଛି । ସେତେ ଯେମିତି ମୃତ୍ୟୁର ଓଭରବ୍ରିଜରୁ ବଂଚିବାର ସୁଯୋଗ ଖୋଜିବା ଶ୍ରମିକଙ୍କ ପାଇଁ ମହଙ୍ଗା ପଡ଼ିଯାଇଛି ।
ରାତିର ଘନ ଅନ୍ଧାର ଭିତରେ ମିଂଜି ମିଂଜି ଆଲୁଅ । ତା’ରି ଭିତରେ ଚାଲିଥାଏ ବହୁ ଚର୍ଚ୍ଚିତ ବମିଖାଲ ଓଭରବ୍ରିଜ୍ କାମ । ସେଂଟ୍ରିଂ ଓ ରଡ୍ ବାନ୍ଧୁଥିବା ବେଳେ ଅଚାନକ୍ ଜୋରରେ ଏକ ଶବ୍ଦ ହୋଇଥିଲା । ପାଖକୁ ଯାଇ ଦେଖିଲା ବେଳକୁ ତଳେ ଚାପି ହୋଇ ଛଟପଟ ହେଉଛନ୍ତି ଦୁଇ ଜଣ ଶ୍ରମିକ । ପବନ ବେଗରେ ଭୁବନେଶ୍ୱର ସାରା ବ୍ୟାପିଗଲା ଘର । ଉଦ୍ଧାର ପାଇଁ ଅଗ୍ନିଶମ ବିଭାଗ, ପୁଲିସ୍ ଓ ସ୍ଥାନୀୟ ଲୋକ ପହଂଚିଗଲେ । ଲୁହା ଛଡ କାଟି ଦୁଇ ଶ୍ରମିକଙ୍କୁ ଅତିଗୁରୁତର ଅବସ୍ଥାରେ ବାହାର କରାଯାଇ କ୍ୟାପିଟାଲ ହସ୍ପିଟାଲ ନିଆଗଲା ।
ଆଉ କ୍ୟାପିଟାଲ ହସ୍ପିଟାଲରୁ ଯେଉଁ ଖବର ଆସିଲା, ତାହା ପୁଣି ଥରେ ୭ମାସ ତଳ ଦୁର୍ଘଟଣାକୁ ପୁଣି ଥରେ ତାଜା କରିଦେଲା । କ୍ୟାପିଟାଲ ହସ୍ପିଟାଲରେ ଆଖିବୁଜି ଦେଲେ ସୁନ୍ଦରଗଡ଼ ଲାଠିଗଡ଼ାର ଅଜୟ ଭୂମିଚ । ଆଉ ଜଣେ ଶ୍ରମିକ ଆନନ୍ଦ ନାୟକଙ୍କୁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଗଲା ।
ସେହି ଓଭରବ୍ରିଜ୍, ସେହି ଠିକା ସଂସ୍ଥା । ଆଉ ଅଘଟଣର ପୁନରାବୃତିି । ଯାହାକୁ ନେଇ ସୃଷ୍ଟି ହୋଇଛି ଅନେକ ପ୍ରଶ୍ନବାଚୀ ।
– ଗୋଟିଏ ପରେ ଗୋଟିଏ ଅଘଟଣ ଭିତରେ ନିର୍ମାଣ ହୋଉଥିବା ଏହି ଓଭରବ୍ରିଜ୍ ସୁରକ୍ଷିତ କି ?
– ଓଭରବ୍ରିଜ୍ ଉପରେ କିମ୍ବା ତଳେ ଲୋକ ସୁରକ୍ଷିତ ଭାବରେ ଯାତ୍ରା କରିପାରିବେ ତ ?
– ଭବିଷ୍ୟତରେ ଏହି ଅଘଟଣ ଘଟିଲେ ସେଥିପାଇଁ କାହାକୁ ଦାୟି କରାଯିବ ?
ଆଉ ଏହି ସବୁ ପ୍ରଶ୍ନ ଭିତରେ କିନ୍ତୁ ଲିଭି ଯାଇଛି ଜଣେ ଶ୍ରମିକଙ୍କ ଜୀବନ ଦୀପ । ଆଉ ଜଣେ ଜୀବନ ସହ ସଂଗ୍ରାମ କରୁଛନ୍ତି । ଆଉ ଏପଟେ ଅଜୟ ଭୂମିଚଙ୍କ ମୃତଦେହ ଗାଁରେ ପହଂଚିଛି, କିଛି କ୍ଷତିପୂରଣର ଟଙ୍କାର ନେଇ ।