ବିମୁଦ୍ରାକରଣ ପରେ ସରକାରଙ୍କୁ ମିଳିଲା ୪୯୦୦ କୋଟି ଟଙ୍କାର କଳାଧନ !

11

କନକ ବ୍ୟୁରୋ : ବିମୁଦ୍ରାକରଣ ପରେ ଦେଶରୁ କଳାଟଙ୍କା ବାହାର କରିବା ପାଇଁ ସରକାର ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା (ପିଏମଜିକେଓ୍ଵାଇ) ନାମରେ ଏକ ସ୍କିମ୍‌ ଘୋଷଣା କରିଥିଲେ । ଏହି ସ୍କିମ୍‌ରେ ସରକାର ୪୯୦୦ କୋଟି ଟଙ୍କାର କଳାଧନ ପାଇଛନ୍ତି । ୨୧ ହଜାର ଲୋକ ଏହି କଳାଧନ ଘୋଷଣା କରିଛନ୍ତି । ସରକାର ଏହି କଳାଟଙ୍କା ବାବଦରେ ୨୪୫୧ କୋଟି ଟଙ୍କାର ଟିକସ ରାଶି ପାଇଛନ୍ତି । ଗତବର୍ଷ ଘୋଷଣା କରାଯାଇଥିବା ପିଏମଜିକେଓ୍ଵାଇର ଶେଷ ଦିବସ ଚଳିତବର୍ଷ ମାର୍ଚ୍ଚ ୩୧ ରଖାଯାଇଥିଲା । ଏହି ସମୟ ମଧ୍ୟରେ ୨୧ ହଜାର ଜଣ ୪୯୦୦ କୋଟି ଟଙ୍କାର କଳାଧନ ଘୋଷଣା କରିଛନ୍ତି । କେତେକ ଘୋଷଣାକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେଇ ଆୟକର ବିଭାଗ ଯୋଜନା ଚଳାଇଛି ।

ଏହି ଯୋଜନାରେ କଳାଧନ ଘୋଷଣା କରିଥିବା ବ୍ୟକ୍ତିମାନଙ୍କଠାରୁ ସରକାର ୪୯.୯୦ ପ୍ରତିଶତ ଅର୍ଥ ଟିକସ, ସରଚାର୍ଜ ଏବଂ ଜରିମାନା ଆକାରରେ ନେବେ । ଏହା ବ୍ୟତୀତ ୨୫ ପ୍ରତିଶତ ଅର୍ଥକୁ ୪ ବର୍ଷ ପାଇଁ ବ୍ୟାଙ୍କରେ ବିନା ସୁଧରେ ଜମା ରହିବ । କେବଳ ୨୫ ପ୍ରତିଶତ ଅର୍ଥ ସମ୍ପୃକ୍ତ ବ୍ୟକ୍ତିମାନେ ଉଠାଇବା ସୁଯୋଗ ପାଇବେ । କଳାଟଙ୍କାକୁ ଧଳା କରିବା ସହିତ ଦଣ୍ଡବିଧାନରୁ ବର୍ତ୍ତିବା ପାଇଁ ପିଏମ dଜିକେଓ୍ଵାଇ ଶେଷ ସୁଯୋଗ ରହିଥିଲା । ପିଏମଜିକେଓ୍ଵାଇ ପୂର୍ବରୁ ସରକାର ଦେଶ ଭିତରୁ କଳାଟଙ୍କା ବାହାର କରିବା ପାଇଁ ଆଇଡିଏସ୍‌ ( ଆୟ ଘୋଷଣା ସ୍କିମ୍‌) ଘୋଷଣା କରିଥିଲେ । ୨୦୧୬ ଜୁନ୍‌ ୧ ତାରିଖରୁ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ଏ ନେଇ ୪ ମାସ ସମୟ ଲୋକମାନଙ୍କୁ ଦେଇଥିଲେ । ଏଥିରେ ୭୧,୭୨୬ ଜଣ ସେମାନଙ୍କ କଳାଟଙ୍କା ବିଷୟରେ ଘୋଷଣା କରିଥିଲେ । ଏବାବଦରେ ମୋଟ ୬୭,୩୮୨ କୋଟିର କଳାଟଙ୍କା ମିଳିଥିଲା । ଆଇଡିଏସରୁ ସରକାର ଏ ପର୍ଯ୍ୟନ୍ତ ୧୨,୭୦୦ କୋଟି ଟଙ୍କାର ଟିକସ ରାଜସ୍ୱ ପାଇଛନ୍ତି ।

ଏହା ପୂର୍ବରୁ ୨୦୧୫ରେ ମୋଦି ସରକାର କଳାଟଙ୍କା ବାହାର କରିବା ଲାଗି ଏକ ସ୍କିମ୍‌ ଆଣିଥିଲେ । ବିଦେଶରୁ କଳାଟଙ୍କା ଆଣିବା ଲାଗି ଏହି ସ୍କିମ୍‌ ଅଣାଯାଇଥିଲା । କିନ୍ତୁ ଏହି ଯୋଜନାରେ ୬୪୪ ଜଣ ମୋଟ ୪୧୬୪ କୋଟି ଟଙ୍କା ଘୋଷଣା କରିଥିଲେ । ୨୦୧୫ ଜୁଲାଇ ପହିଲାରୁ ସେପ୍ଟେମ୍ବର ୩୦ ପର୍ଯ୍ୟନ୍ତ ୩ ମାସ ପାଇଁ ଏହି ସ୍କିମ୍‌ରେ କଳାଟଙ୍କା ଘୋଷଣା କରିବା ସୁଯୋଗ ଭାରତୀୟମାନଙ୍କୁ ପ୍ରଦାନ କରାଯାଇଥିଲା । ସରକାର ଏଥିରୁ ୨୪୨୮.୪ କୋଟି ଟଙ୍କା ଟିକସ ବାବଦରେ ପାଇଥିଲେ । ଉଲ୍ଲେଖଯୋଗ୍ୟ ଯେ ମୋଦି ସରକାର ଦେଶ ଏବଂ ବିଦେଶରୁ କଳାଧନ ବାହାର କରିବା ପାଇଁ ଏ ପର୍ଯ୍ୟନ୍ତ ଘୋଷଣା କରିଥିବା ୩ଟି ଯୋଜନା ବାବଦରେ ମୋଟ ୭୬୪୪୬ କୋଟି ଟଙ୍କା ପାଇଛନ୍ତି । ଏଥିରୁ ସରକାରଙ୍କୁ ଟିକସ ବାବଦରେ ମୋଟ ୧୭,୫୭୯ କୋଟି ଟଙ୍କା ମିିଳିଛି।

କେଉଁ ଯୋଜନାରେ କେତେ (ବିମୁଦ୍ରାକରଣ ପରେ) :

ସ୍କିମ୍‌ କଳାଧନ ଘୋଷଣା ସରକାରଙ୍କୁ ଟିକସ ପିଏମ୍‌ଜିକେଓ୍ଵାଇ ୪୯୦୦ କୋଟି ଟଙ୍କା ୨୪୫୧ କୋଟି ଟଙ୍କା

କେଉଁ ଯୋଜନାରେ କେତେ (ବିମୁଦ୍ରାକରଣ ପୂର୍ବରୁ):
ଆଇଡିଏସ୍‌ ୬୭୩୮୨କୋଟି ଟଙ୍କା ୧୨୭୦୦ କୋଟି ଟଙ୍କା, ବିଦେଶରୁ କଳାଟଙ୍କା ୪୧୬୪ କୋଟି ଟଙ୍କା ୨୪୨୮ କୋଟି ଟଙ୍କା

ମୋଟ ୭୬୪୪୬ କୋଟି ଟଙ୍କା ୧୭୫୭୯ କୋଟି ଟଙ୍କା

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

Comments are closed.