କନକ ବ୍ୟୁରୋ : କରୋନା ଯୋଗୁଁ ଏବେ ସବୁବର୍ଗର ଲୋକଙ୍କ ଜୀବନଜୀବିକା ପ୍ରଭାବିତ ହୋଇଛି। ଏହି ମହାମାରୀ କବଳରୁ କିପରି ନିଜକୁ ଓ ନିଜ ପରିବାରକୁ ରକ୍ଷା କରାଯାଇପାରିବ, ଏବେ ସେଇ ଚିନ୍ତା ସମସ୍ତଙ୍କୁ ଘାରୁଛି। ଏଭଳି ସ୍ଥିତିରେ ନିତ୍ୟବ୍ୟବହାର୍ଯ୍ୟ ଖାଉଟି ସାମଗ୍ରୀର ଚଢ଼ା ଦର ଲୋକଙ୍କ ସମସ୍ୟା ବଢ଼ାଇ ଦେଇଛି। ବିଶେଷକରି ଗରିବ ଓ ନିମ୍ନ ମଧ୍ୟବିତ୍ତ ପରିବାର ବେଶି ସଂକଟରେ ପଡ଼ିଛନ୍ତି । ଏଭଳି ପରିସ୍ଥିତିର ସୁଯୋଗ ନେଇ କିଛି ଅସାଧୁ ବେପାରୀ ଜାଣିଶୁଣି ଦର ଅଧିକ କଷୁଛନ୍ତି । ହୋଲସେଲ୍ ମାର୍କେଟ୍ର ଦରଠାରୁ ୧୫ରୁ ୨୦ ଟଙ୍କା ଅଧିକ ଦରରେ ଲୋକଙ୍କୁ ବିକୁଛନ୍ତି। ବାଲିଅନ୍ତା ବ୍ଲକ ଅଞ୍ଚଳରେ ମଧ୍ୟ ଏପରି କଳାବଜାର ଦେଖିବାକୁ ମିଳୁଛି। ଏନେଇ ଅଭିଯୋଗ ହେଉଥିଲେ ମଧ୍ୟ ଯୋଗାଣ ବିଭାଗ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ।
Kanak News is now on WhatsApp
Join and get latest news updates delivered to you via WhatsApp
ବ୍ଲକର ବିଭିନ୍ନ ଛକ ବଜାର ଓ ଗାଁ ଗହଳିରେ ଥିବା ତେଜରାତି ଦୋକାନୀଙ୍କ ଉପରେ ଜିଲ୍ଲା ପ୍ରଶାସନ ଓ ଯୋଗାଣ ବିଭାଗର କୌଣସି ପ୍ରକାର ଅଙ୍କୁଶ ରହୁନାହିଁ। ଦୋକାନରେ ରେଟ୍ଚାର୍ଟ ବି ଲଗାଯାଉନାହିଁ। ଫଳରେ ଅସାଧୁ ବ୍ୟବସାୟୀମାନେ ବଜାର ମୂଲ୍ୟଠାରୁ ଅଧିକ ଦରରେ ଖାଉଟି ସାମଗ୍ରୀ ବିକ୍ରି କରୁଥିବା ଅଭିଯୋଗ ହୋଇଛି। ମିଳିଥିବା ସୂଚନା ମୁତାବକ, ଶିଶୁଖାଦ୍ୟ, ଅଟା, ସୁଜି, ମଇଦା, ବେସନ, ଶୋରିଷ ତେଲ, କିରାସିନି, ଡାଲି ଓ ମଟର କେଜି ପିଛା ବଜାର ମୂଲ୍ୟଠାରୁ ଅଧିକ ୫ରୁ ୨୦ ଟଙ୍କା ପର୍ଯ୍ୟନ୍ତ ଚଢ଼ାରେ ବିକ୍ରି କରୁଥିବା ଖାଉଟିମାନେ ସୂଚନା ଦେଇଛନ୍ତି।
ବ୍ଲକ ପ୍ରଶାସନ ପକ୍ଷରୁ ମଧ୍ୟ ଚଢ଼ଉ କରାଯାଇ ଦରଦାମ ନିୟନ୍ତ୍ରଣ ଦିଗରେ ଏଯାଏଁ କୌଣସି ପଦକ୍ଷେପ ଗ୍ରହଣ କରାଯାଉନଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ କୁହୁଳିବାରେ ଲାଗିଲାଣି। ଏନେଇ ବିଡିଓ ଆଦିକନ୍ଦ ବେହେରା କୁହନ୍ତି, ଖୋର୍ଧା ଜିଲ୍ଲା ଯୋଗାଣ ଅଧିକାରୀଙ୍କ ଦରଦାମ୍ ନିୟନ୍ତ୍ରଣ ସଂପର୍କିତ କୌଣସି ରେଟ୍ଚାର୍ଟ ଆସି ନଥିବାରୁ ଦୋକାନ ଆଗରେ ମରାଯାଇ ପାରୁନାହିଁ। ସେହିପରି ବ୍ଲକ ଯୋଗାଣ ଅଧିକାରୀ ଧୀରଜ କୁମାର ଭୂୟାଁ କହିଛନ୍ତି, ଦରଦାମ ନିୟନ୍ତ୍ରଣ ସଂପର୍କିତ ସବିଶେଷ କାର୍ଯ୍ୟର ଖୋଳତାଡ଼ କାର୍ଯ୍ୟ ନେଇ ଯୋଗାଣ ବିଭାଗର ଗୁଇନ୍ଦା ଅଧିକାରୀ ମାର୍କେଟିଂ ଇଣ୍ଟେଲିଜେନ୍ସ ଅଫିସର୍ (ଏମଆଇଓ)ଙ୍କର ସହଯୋଗ ଦରକାର। ତେବେ ଜିଲ୍ଲା ଦପ୍ତରରୁ ରେଟ୍ଚାର୍ଟ ଚିଠା ପ୍ରଦାନ କରାଗଲେ ଦୋକାନ ସମ୍ମୁଖରେ ଲଗାଯିବ।