ଆଜି ବିଜେପୁର ଦେଖିବ ହାଇଭୋଲଟେଜ୍ ପ୍ରଚାର : ଗାଇସିଲଟ୍ ବ୍ଲକରେ ପ୍ରଚାର କରିବେ ମୁଖ୍ୟମନ୍ତ୍ରୀ, ବରପାଲି ଓ ବିଜେପୁର ବ୍ଲକରେ କେନ୍ଦ୍ରମନ୍ତ୍ରୀ କରିବେ ରୋଡ୍ ସୋ’
କନକ ବ୍ୟୁରୋ : ଆଜି ବିଜେପୁର ଦେଖିବ ହାଇଭୋଲଟେଜ୍ ପ୍ରଚାର । ଗୋଟିଏ ପଟେ ବିଜେଡି ପ୍ରାର୍ଥୀ ରୀତା ସାହୁଙ୍କ ପାଇଁ ଦଳୀୟ ସୁପ୍ରିମୋ ନବୀନ ପଟ୍ଟନାୟକ ପ୍ରଚାର କରିବାକୁ ଥିବା ବେଳେ ଅନ୍ୟପଟେ ବିଜେପି ପ୍ରାର୍ଥୀ ସତନ ଗଡ଼ତିଆଙ୍କ ପାଇଁ ପ୍ରଚାର କରିବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର । ଅବଶ୍ୟ ନବୀନ ଏବଂ ଧର୍ମେନ୍ଦ୍ର ଅଲଗା ଅଲଗା ବ୍ଲକ୍ରେ ନିର୍ବାଚନ ପ୍ରଚାର କରୁଥିଲେ ବି ଗୋଟିଏ ଲଢ଼େଇ ପାଇଁ ମୈଦାନକୁ ଓହ୍ଲାଉଛନ୍ତି ଦୁଇ ତୁଙ୍ଗ ନେତା । ଗତକାଲି ମୁଖ୍ୟମନ୍ତ୍ରୀ ପ୍ରାୟ ୧୩ଟି ପଂଚାୟତରେ ପ୍ରଚାର କରିଥିବା ବେଳେ ଗତ ଶୁକ୍ରବାର ଧର୍ମେନ୍ଦ୍ର ପ୍ରଧାନ ବିଜେପୁରରେ ପ୍ରଚାର କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନବୀନ ପଟ୍ଟନାୟକ ନିଜେ ବିଜେପୁରର ଦାୟିତ୍ୱ ନେଇ ବିକାଶ କାମକୁ ଆଗେଇ ନେବାକୁ ପ୍ରତିଶ୍ରୁତି ଦେଉଥିବା ବେଳେ ଧର୍ମେନ୍ଦ୍ର ପ୍ରଧାନ, ନବୀନ କାହିଁକି ବିଜେପୁର ଛାଡ଼ିଲେ ବୋଲି ପ୍ରଶ୍ନ କରି ଆସୁଛନ୍ତି । ବଡ଼ କଥା ହେଉଛି- ବିଜେଡି ଓ ବିଜେପିର ଦୁଇ ବଡ଼ ଚେହେରା ଆଜି ନିର୍ବାଚନୀ ମୈଦାନକୁ ଓହ୍ଲାଉଥିବାରୁ ଏକ ରୋଚକ ରାଜନୈତିକ ଚିତ୍ର ସାମ୍ନାକୁ ଆସିବାର ସଂଭାବନା ରହିଛି । ମୁଖ୍ୟମନ୍ତ୍ରୀ ଖୋଦ୍ ୨୦୧୯ ସାଧାରଣ ନିର୍ବାଚନରେ ବିଜେପୁରରୁ ପ୍ରାର୍ଥୀ ହୋଇ ୧ଲକ୍ଷରୁ ଅଧିକ ଭୋଟ୍ ପାଇ ବିଜୟୀ ହୋଇଥିଲେ । ଆଉ ଆସନ୍ତା ୨୧ ତାରିଖ ହେବାକୁ ଥିବା ବିଜେପୁର ଉପ-ନିର୍ବାଚନ ପାଇଁ ଗତକାଲିଠାରୁ ପ୍ରଚାର ଜାରି ରଖିଛନ୍ତି ।
ଆଜି ମୁଖ୍ୟମନ୍ତ୍ରୀ ବରଗଡ଼ ଲେଂଗୁ ମିଶ୍ର ମିନି ଷ୍ଟାଡିୟମରୁ ହେଲିକପ୍ଟରରେ ବାହାରି ଗାଇସିଲଟ୍ ବ୍ଲକ୍ ତାଲପାଲି ପଡ଼ିଆରେ ଓହ୍ଲାଇବେ । ସେଠାରୁ କେନ୍ଦୁଭଟା ଛକ, ଗୌରିମୁଣ୍ଡା ଛକ, ଗାଇସିଲଟ୍, କେନ୍ଦୁମୁଣ୍ଡା, କଠଉମାଲ, ବଡ଼ ସାହାଜବାହାଲ, ଜଗଦଲପାଟ, ଭଂଗାମୁଣ୍ଡା, ଡାଙ୍ଗବାହାଲ, ସରଧାପାଲି, କରଞ୍ଜାପାଲି, କିର୍ମେଲି ଛକ, କୁଣ୍ଡାଖାଇ, ଗୁନ୍ଦେରପାଲି ପର୍ଯ୍ୟନ୍ତ ରୋଡ୍ ସୋ କରିବେ । ଆଉ ଆଜି ପ୍ରଚାର ସାରି ଭୁବନେଶ୍ୱର ଫେରି ଆସିବେ । ମୁଖ୍ୟମନ୍ତ୍ରୀଙ୍କ ଏହି ପ୍ରଚାର ଭିତରେ ବିଜେପୁରରେ ଡେରା ପକାଇଛନ୍ତି ଦଳର ବରିଷ୍ଠ ନେତା ଓ ମନ୍ତ୍ରୀ । ସେମାନଙ୍କର ଦାବି ହେଉଛି ଏଥର ପୁଣି ଥରେ ବିଜେପୁରରେ ବାଜି ମାରିବ ବିଜେଡି ।
ଅନ୍ୟପଟେ ଓଡ଼ିଶା ବିଜେପିର ସବୁଠାରୁ ବଡ଼ ଚେହେରା କୁହାଯାଉଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବିଜେପି ନେତା ଓ କର୍ମୀଙ୍କୁ ନେଇ ବିଜେପୁର ଜିତିବାକୁ ବାହାରିଛନ୍ତି । ଆସନ୍ତାକାଲି ପ୍ରଚାର ଶେଷ ହେଉଥିବା ଦୁଇ ଦଳର ତୁଙ୍ଗ ନେତା ପ୍ରଚାର ଲଢ଼େଇକୁ ଅନ୍ତିମ ସ୍ପର୍ଶ ଦେବାକୁ ବାହାରିଛନ୍ତି ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସକାଳୁ ବିଜେପୁର ଏନଏସି, ବରପାଲି ବ୍ଲକର ବନ୍ଧପାଲି ପଂଚାୟତ, ଗୋପେଇପାଲି ପଂଚାୟତ ଏବଂ ବରପାଲି ଏନ୍ଏଏସି ଅଂଚଳରେ ରୋଡ୍ ସୋ କରିବେ । କେନ୍ଦ୍ରମନ୍ତ୍ରୀ ଆଜି ପ୍ରଚାର ଅଭିଯାନକୁ ଅଗେଇ ନେବାକୁ ଥିବା ବେଳେ ଅନ୍ୟପଟେ ରାଜ୍ୟ ବିଜେପି ସଭାପତି ବସନ୍ତପଣ୍ଡାଙ୍କ ସମେତ ଦଳର ଅନେକ ନେତା ବିଜେପୁରରେ ଡେରା ପକାଇଛନ୍ତି । ବସନ୍ତ ପଣ୍ଡା ଅଭିଯୋଗ କରିଛନ୍ତି ମୁଖ୍ୟମନ୍ତ୍ରୀ ବିଜେପୁରବାସୀଙ୍କୁ ପ୍ରତାରିତ କରିଛନ୍ତି । ଆଉ ଏହାର ଜବାବ୍ ବିଜେପୁରବାସୀ ନିର୍ବାଚନରେ ଦେବେ ।