କନକ ବ୍ୟୁରୋ : ବର୍ଷା ଋତୁ ଆରମ୍ଭ ହୋଇଯାଇଛି । ବିଳମ୍ବରେ ମୌସୁମୀ ଆସିବା ଯୋଗୁଁ ଚାଷକାମରେ ବିଳମ୍ବ ହୋଇଛି ସତ ବର୍ଷାକୁ ଦେଖି ଖୁସି ଚଷାପୁଅ । ବର୍ଷ ଜାକର ଖାଦ୍ୟ ସାଇତିବା ପାଇଁ ଆରମ୍ଭ କରିଦେଇଛି ଚାଷକାମ । ଓଦା ଜମି ଦେଖି ସହଳ ସଅଳ ଜମିକୁ ଧାଉଁଛି ଚଷାପୁଅ । ସୁନାର ଫସଲ ପାଇଁ ଏବେ ଚାଷୀ ଭାଇ ଏକଦମ ପ୍ରସ୍ତୁତ । ଏହାରି ଭିତରେ ଦେଖିବାକୁ ମିଳିଛି ନିଆରା ଦୃଶ୍ୟ । ଛତିଶଗଡ଼ର ଜଣେ ଜିଲ୍ଲାପାଳ ଜମିରେ ହଳ କରୁଥିବାର ଦୃଶ୍ୟ ଦେଖିବା ପାଇଁ ମିଳଛି । ଅବିଶ୍ୱସନୀୟ ହେଲେ ମଧ୍ୟ କଥାଟି ସତ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ କୃଷକଙ୍କ ସମସ୍ୟା ବୁଝିବା କରିବା ପାଇଁ ବେମତେରା ଜିଲ୍ଲାର ଜିଲ୍ଲାପାଳ ମହାଦେବ କାବରେ ଜମି ଆଡ଼େ ଘେରାଏ ବୁଲିବା ପାଇଁ ବାହାରିଥିଲେ । ଖିଲୋରା ଗାଁ ଦେଇ ଯାଉଥିବାବେଳେ ଚାଷୀ ଦଶରଥ ସାହୁ ଚାଷ କରୁଥିବାର ଦେଖିବାକୁ ପାଇଥିଲେ । ଚଷା ପୁଅ ହଳ ଲଙ୍ଗଳ ଧରି ଚାଷ କରୁଥିବା ଦେଖି ନିଜକୁ ରୋକି ପାରିନଥିଲେ କଲେକ୍ଟର ସାହେବ । ଚାଷୀଙ୍କୁ ସହଯୋଗ କରିବାକୁ ନିଜ ଗାଡ଼ିରୁ ଓହ୍ଲାଇପଡ଼ିଥିଲେ ଜିଲ୍ଲାପାଳ । ଜୋତାମୋଜା ଖୋଲି କାଦୁଅ ପଚପଚ ଚାଷ ଜମିରେ ପଶି ହଳ ବୁଲାଇଥିଲେ । ବଳଦ ଓ ଲଙ୍ଗଳ ସହାୟତରେ ଜମିରେ ହଳ କରିଥିଲେ । ବାବୁ ଜଣକ କେବଳ ଜମିରେ ହଳ କରିନାହାନ୍ତି ବରଂ ବିହନ ମଧ୍ୟ ବୁଣିଛନ୍ତି ।
ବଡ଼ ବାବୁ ନିଜେ ହଳକରି ଦେଢ଼ କିଲୋର ସୋୟାବିନ ମଞ୍ଜି ମଧ୍ୟ କ୍ଷେତରେ ବୁଣିଛନ୍ତି । ଜିଲ୍ଲାପାଳଙ୍କ ଏହି କାମ ପାଇଁ ଚାରିଆଡ଼ୁ ପ୍ରଶଂସାର ସୁଅ ଛୁଟୁଛି । ଚାଷୀ ଦଶରଥ କହିଛନ୍ତି ଜିଲ୍ଲାପାଳ ବହୁତ ଭଲ ଭାବେ ଚାଷ କରିଛନ୍ତି । ଭଲ ସୋୟାବିନର ଉତ୍ପାଦନର ଆଶା ରଖିଛନ୍ତି ଦଶରଥ । ତାଙ୍କ ଭଳି ଜଣେ ବଡ ଅଧିକାରୀ ଏଭଳି କରିବା ବହୁତ ଖୁସି ଦେଇଛି । ଏହା ବ୍ୟତୀତ ଜିଲ୍ଲାପାଳ ମହାଦେବ କାବରେ କୃଷି ସମ୍ମନ୍ଧୀୟ ଯେକୌଣସି ସମସ୍ୟା ଥିଲେ ଜଣାଇବା ପାଇଁ ମଧ୍ୟ କହିଛନ୍ତି ।