ରାଜ୍ୟ ବାହାରେ ରାଜ୍ କରୁଛି ବାଲେଶ୍ୱର ପାନ : ବିହାର, ଝାରଖଣ୍ଡ, ଦିଲ୍ଲୀ, ମୁମ୍ବାଇ ଓ ଗୁଜୁରାଟରେ ବଢୁଛି ବାଲିଆପାଳ ପାନର ଚାହିଦା, ଲାଭ ପାଉଛନ୍ତି ବ୍ୟବସାୟୀ କ୍ଷତି ସହୁଛନ୍ତି ଚାଷୀ
କନକ ବ୍ୟୁରୋ : ଚାଷୀଙ୍କ ପେଟ ପୋଷୁଛି ପାନ । ପଇସା ଦେଉଛି ପାନ ଚାଷ । ରାଜ୍ୟ ବାହାରେ ରାଜ୍ କରୁଛି ବାଲେଶ୍ୱର ବାଲିପାଳରୁ ଆମଦାନୀ ହେଉଥିବା ପାନ । ଓଡିଶା ସମେତ ବିହାର, ଝାରଖଣ୍ଡ, ଦିଲ୍ଲୀ, ମୁମ୍ବାଇ ଓ ଗୁଜୁରାଟରେ ବାଲିଆପାଳ ପାନର ବେଶ ଚାହିଦା ରହିଛି । ହେଲେ ପାନ ପତ୍ର ବିକ୍ରି କରି ବ୍ୟବସାୟୀ ଲାଭବାନ ହେଉଥିବା ବେଳେ କ୍ଷତି ସହୁଛନ୍ତି ପାନ ଚାଷୀ ।
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକର ଚୌମୁଖ, ଡଗରା, ନାରାୟଣପୁର, ଅଳାଡିଆ, ନୂଆଗାଁ, ଜମ୍ଭିରାଇ ପଂଚାୟତର ଲୋକେ ମୁଖ୍ୟତଃ ପାନ ଚାଷ ଉପରେ ନିର୍ଭର କରିଥାନ୍ତି । ଆଉ ଏଠାରୁ ଅମଳ ହେଉଥିବା ପାନ ଓଡିଶାର ବିଭିନ୍ନ ଜିଲ୍ଲା ସମେତ ବିହାର, ଝାରଖଣ୍ଡ, ଦିଲ୍ଲୀ, ମୁମ୍ବାଇ ଓ ଗୁଜୁରାଟ ଭଳି ରାଜ୍ୟରେ ବିକ୍ରି ହେଉଛି । ବଙ୍ଗୋପସାଗର ଉପକୂଳବର୍ତୀ ବାଲିଆପାଳ ଅଂଚଳର ଜଳବାୟୁ ପାନ ଚାଷ ପାଇଁ ବେଶ୍ ଉପଯୋଗୀ । ସେଥିପାଇଁ ଏଠାକାର ଚାଷୀ ପାନ ଚାଷକୁ ପ୍ରାଧାନ୍ୟ ଦେଇଥାନ୍ତି ।
ଏହି ଅଂଚଳର ଚାଷୀ ୨ ପ୍ରକାରର ପାନଚାଷ କରିଥାନ୍ତି । ଦେଶୀ ଓ ଚନ୍ଦ୍ରକଣା ନାମକ ପାନ ଚାଷ ହୋଇଥାଏ । ତେବେ ଦେଶୀ ଅପେକ୍ଷା ଚନ୍ଦ୍ରକଣା ପାନରେ ଅଧିକ ଲାଭ ମିଳୁଛି । ମୁଖ୍ୟତଃ ନଭେମ୍ବର ଓ ମାର୍ଚ୍ଚ ମାସରେ ଚାରା ରୋପଣ କରାଯାଏ । ରୋପଣର ୫ମାସ ପରେ ପାନ ଆମଦାନୀ ହୋଇଥାଏ । ବରଜରେ ୧୦୦୦ ଚାରା ଲଗାଇବାକୁ ୧୨ରୁ ୧୫ହଜାର ଟଙ୍କା ଖର୍ଚ୍ଚ କରନ୍ତି ଚାଷୀ । ସେହି ଅନୁପାତରେ ପାନ ବିକ୍ରି ମଧ୍ୟ ହୋଇଥାଏ । ଚାଷୀ, ୪ହଜାର ଅର୍ଥାତ୍ ୮୦କଡା ପାନକୁ ବ୍ୟବସାୟୀଙ୍କୁ ୨ରୁ୩ ହଜାର ଟଙ୍କାରେ ବିକ୍ରି କରିଥାନ୍ତି । ଏବଂ ସେହି ପାନକୁ ବ୍ୟବସାୟୀମାନେ ଓଡିଶା ବଜାରରେ ୮ରୁ ୧୦ହଜାର ଏବଂ ରାଜ୍ୟ ବାହାରେ ୧୨ରୁ ୧୫ହଜାର ଟଙ୍କାରେ ବିକ୍ରି କରୁଛନ୍ତି । ସେପଟେ ବାଲିଆପାଳ ଅଂଚଳରେ ପାନଚାଷ ସମ୍ପୂର୍ଣ୍ଣ ଜୈବିକ ପଦ୍ଧତିରେ ହେଉଥିବାରୁ ଏହାର ସ୍ୱାଦ ଭଲ ଥିବାରୁ ଚାହିଦା ବଢୁଛି ।
ତେବେ ସରକାରୀ ସ୍ତରରେ ପ୍ରୋତ୍ସାହନ ଯୋଗାଇ ଦିଆଗଲେ ଆହୁରି ଅଧିକ ଲୋକ ପାନ ଚାଷ ପ୍ରତି ମନ ବଳାନ୍ତେ ବୋଲି ମତ ପ୍ରକାଶ ପାଉଛି ।