ଜେଲ ଗଲେ ଅନୁପ ସାଏ : ଜେଏମ୍ଏଫ୍ସି କୋର୍ଟରେ ଜାମିନ୍ ନାମଞ୍ଜୁର ପରେ ବିଚାର ବିଭାଗୀୟ ହାଜତକୁ ପଠାଇଲେ କୋର୍ଟ
କନକ ବ୍ୟୁରୋ : ଜେଲ ଗଲେ ଅନୁପ ସାଏ । ଛତିଶଗଡ଼ ରାଜ୍ୟର ରାୟଗଡ଼ସ୍ଥିତ ଜେଏମ୍ଏଫ୍ସି କୋର୍ଟରେ ଜାମିନ ନାମାଞ୍ଜୁର ହେବା ପରେ ପୂର୍ବତନ ବିଧାୟକ ଅନୁପ ସାଏ ଜେଲ ଯାଇଛନ୍ତି । ବିଚାର ବିଭାଗୀୟ ହାଜତକୁ ପଠାଇଲେ କୋର୍ଟ । ରାୟଗଡ଼ ଚକ୍ରଧରନଗର ଥାନା ଅନ୍ତର୍ଗତ ସମ୍ବଲପୁରୀ ବଙ୍ଗୁରସିଆ ଠାରେ ଘଟିଥିବା ଡବଲ ମର୍ଡର ଘଟଣାରେ ପୁଲିସ ବ୍ରଜରାଜନଗର ପୂର୍ବ ବିଧାୟକ ଅନୁପ ସାଏଙ୍କୁ ମୁଖ୍ୟ ଅଭିଯୁକ୍ତ ଭାବରେ ଆଜି ରାୟଗଡ଼ ଜେଏମଏଫସି କୋର୍ଟରେ ହାଜର କରିଥିଲା । ଅଭିଯୁକ୍ତଙ୍କ ପକ୍ଷରୁ ଜାମିନ ଆବେଦନକୁ କୋର୍ଟ ନାକଚ କରିଥିଲେ । କୋର୍ଟ ମାମଲାର ପରବର୍ତ୍ତୀ ଶୁଣାଣି ପାଇଁ ୨୮ ତାରିଖକୁ ଦିନ ଧାର୍ଯ୍ୟ କରିଥିଲେ।
Kanak News is now on WhatsApp
Join and get latest news updates delivered to you via WhatsApp
୨୦୧୬ର ଏକ ଜଘନ୍ୟ ହତ୍ୟା ମାମଲାରେ ତାଙ୍କୁ ଗିରଫ କରିଛି ରାୟଗଡ ପୋଲିସ । ହତ୍ୟାକାଣ୍ଡର ପ୍ରାୟ ୩ ବର୍ଷ ୭ ମାସ ପରେ ଅନୁପଙ୍କୁ କେବଳ ଗିରଫ କରିନାହିଁ ବରଂ ଯଥେଷ୍ଟ ପ୍ରମାଣ ରହିଥିବା ଦାବି କରିଛି ଛତିଶଗଡ ପୋଲିସ । ୨୦୧୬ ମେ ୫ ତାରିଖରେ ମାଆ ଓ ଝିଅଙ୍କୁ ନିଜେ ଅନୁପ ସାଏ ହିଁ ଲୁହା ରଡରେ ପିଟି ହତ୍ୟା କରିଥିଲେ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ରାୟଗଡ ଏସପି ସନ୍ତୋଷ କୁମାର ସିଂହ । ଏପରିକି ମୃତକଙ୍କ ପରିଚୟ ଲୁଚାଇବାକୁ ଉଭୟ ମାଆ, ଝିଅଙ୍କ ମରଶରୀରରେ ଗାଡି ଚଢାଇ ଦେଇଥିଲେ ।
ମୃତ ମହିଳା କଳ୍ପନା ଦାସଙ୍କ ମୋବାଇଲ କଲ ରେକର୍ଡରୁ ଅନୁପ ସାଏଙ୍କ ସଂପୃକ୍ତି ସ୍ପଷ୍ଟ ହୋଇଥିଲା । ପ୍ରଥମରୁ ହତ୍ୟାକାଣ୍ଡରେ ସଂପୃକ୍ତିକୁ ଅନୁପ ସାଏ ଅସ୍ୱୀକାର କରୁଥିଲେ ବି ପରେ ସତ ସ୍ୱୀକାର କରିଥିବା ପୋଲିସ କହିଛି । ସ୍ୱାମୀ ପରିତ୍ୟକ୍ତା କଳ୍ପନାଙ୍କ ସହ ଅନୁପଙ୍କର ପ୍ରେମ ସଂପର୍କ ରହିଥିଲା । ଏପରିକି ୩୨ ବର୍ଷୀୟ କଳ୍ପନାଙ୍କୁ ପତ୍ନୀ ଓ ତାଙ୍କ ୧୪ ବର୍ଷର ଝିଅ ବବଲିଙ୍କୁ ଝିଅର ମାନ୍ୟତା ଦେଇ ଭୁବନେଶ୍ୱର ସୁନ୍ଦରପଦାରେ ଏକ ଘରେ ରଖିଥିଲେ ଅନୁପ ସାଏ । ହେଲେ ବିବାଦ ପାଇଁ ଚାପ ପକାଇବା ସହ ସଂପତିରେ ଭାଗ ମାଗିବାରୁ ଦୁହିଁଙ୍କୁ ରାସ୍ତାରୁ ହଟାଇ ଦେଇଥିଲେ ସେ ।
ହେଲେ ଏହି ଜଘନ୍ୟ ହତ୍ୟାକାଣ୍ଡରେ ଆହୁରି କିଛି ଲୋକ ସଂପୃକ୍ତ ଥିବା ସନ୍ଦେହ କରୁଛି ଛତିଶଗଡ ପୋଲିସ । ଏଥିପାଇଁ ଅଭିଯୁକ୍ତ ଅନୁପ ସାଏଙ୍କ ନାର୍କୋଟିକ୍ସ ଟେଷ୍ଟ କରିବାକୁ ଯୋଜନା ଚଳାଇଛି ।