କରୋନା ପାଇଁ ଗାଡ଼ି ଚଳାଚଳ ଉପରେ କଟକଣା : ଆସନ୍ତାକାଲି ଦିନ ୧୧ଟାରୁ ସାରା ରାଜ୍ୟରେ ବସ୍ ସେବା ବନ୍ଦ, ଆଜି ରାତି ୧୨ଟାରୁ ସିଟି ବସ୍ ସେବା ବନ୍ଦ
କନକ ବ୍ୟୁରୋ : କରୋନା ପାଇଁ ଗାଡ଼ି ଚଳାଚଳ ଉପରେ କଟକଣା । ଆସନ୍ତାକାଲି ଦିନ ୧୧ଟାରୁ ସାରା ରାଜ୍ୟରେ ଗାଡ଼ି ବନ୍ଦ । ରାଜ୍ୟ ତମାମ ସମସ୍ତ ବସ ଚଳାଚଳ ବନ୍ଦ ରହିବ । ଆସନ୍ତାକାଲି ଠାରୁ ରାଜ୍ୟରେ ଗଡ଼ିବନି ବସ୍ । ପ୍ରେସମିଟରେ ସୂଚନା ଦେଲେ ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତ ବାଗଚୀ । କେବଳ ଏତିକି ନୁହେଁ ଆଜି ରାତି ୧୨ଟାରୁ ସିଟି ବସ ସେବା ମଧ୍ୟ ବନ୍ଦ ରହିବ । କରୋନା ମୁକାବିଲା ପାଇଁ ଏପରି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । କେବଳ ଏତିକି ନୁହେଁ, ରାଜ୍ୟରେ ଲକ୍-ଡାଉନ୍କୁ ଆହୁରି ଗୁରୁତର ସହ ନିଆଯିବ ବୋଲି ସେ କହିଛନ୍ତି।
Kanak News is now on WhatsApp
Join and get latest news updates delivered to you via WhatsApp
ତେବେ ସରକାରଙ୍କ ଏହି ନିଷ୍ପତ୍ତି ପାଇଁ ଜନଜୀବନ ଗତିରେ ବାଧା ଘଟିପାରେ । ହେଲେ ଏପରି ହେଲେ ହିଁ କରୋନାର ମୁକାବିଲା କରିହେବ ବୋଲି କହିଛନ୍ତି ସୁବ୍ରତ ବାଗଚୀ । କରୋନା ଭାଇରସ୍ ସାରା ମାନବ ଜାତି ପାଇଁ ବଡ଼ ଧକ୍କା । ପିଲାଛୁଆଙ୍କୁ ସୁରକ୍ଷିତ ରଖିବା ପାଇଁ ଆମକୁ ସଚେତନ ହେବାକୁ ପଡ଼ିବ । କରୋନାର ସଫଳ ମୁକାବିଲା ପାଇଁ ରାଜ୍ୟ ସରକାରଙ୍କ ଉଚ୍ଚ ସ୍ତରୀୟ କଣ୍ଟ୍ରୋଲ ରୁମ ୨୪ ଘଣ୍ଟା ଚାଲୁ ରହିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଓଡ଼ିଶା ସରକାର ଲଗାତାର ସମୀକ୍ଷା କରୁଛନ୍ତି ।
ବର୍ତ୍ତମାନ ରାଜ୍ୟ ସରକାର କରୋନା ରୋକିବା ପାଇଁ ତିନୋଟି ଦିଗ ଉପରେ ଅଧିକ ଗୁରୁତ୍ୱ ଦେଉଛନ୍ତି । କରୋନା ଭାଇରସକୁ ମହାମାରୀ ରୂପ ନେବା ଆଗରୁ ବନ୍ଦ କରିବା ପାଇଁ ହେବ । ଅଳ୍ପ ସମୟ ଭିତରେ ଅଧିକ ସାଧନ ପ୍ରସ୍ତୁତ କରିବା ପାଇଁ ପଡ଼ିବ । ଲକ୍ ଡାଉନ୍ ଗୁଡ଼ିକ ସମୟରେ ମାଲବାହୀ ଯାନ ଗୁଡ଼ିକ କିପରି ଯାତାୟତ କରିପାରିବ ସେଥିପ୍ରତି ଧ୍ୟାନ ଦିଆଯିବ ।
ଅନ୍ୟପଟେ ରାଜ୍ୟରେ ବ୍ୟାଙ୍କ ଓ ବୀମା କାର୍ଯ୍ୟାଳୟ ଗୁଡ଼ିକ ୧୦ ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟ କରିବେ । ମହାମାରୀ ରୋଗ ଆଇନ୍ ଅନୁସାରେ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି, ସମସ୍ତ ଅଣଅତ୍ୟାବଶ୍ୟକ କାର୍ଯ୍ୟାଳୟ ଗୁଡ଼ିକ ଶତକଡ଼ା ୧୦ ଭାଗ କର୍ମଚାରୀରେ କାମ କରିବେ । ଏଥିପାଇଁ ସମ୍ପୃକ୍ତ କାର୍ଯ୍ୟାଳୟର ମୁଖ୍ୟ ଅଧିକାରୀ, କର୍ମଚାରୀଙ୍କ ନାଁ ନିର୍ଦ୍ଧାରିତ ଫର୍ମାଟରେ ଯାତାୟତ ପାଇଁ ଅନୁମତି ପ୍ରଦାନ କରିବେ । ଗାଡ଼ି ପାସ୍ ଦିଆଯାଇଥିବା ଅଧିକାରୀ ଓ କର୍ମଚାରୀଙ୍କ ପାଇଁ କାର୍ଯ୍ୟାଳୟର ମୁଖ୍ୟ, ସ୍ଥାନୀୟ ଥାନାକୁ ଜଣାଇଦେବେ ।
ଜିଲ୍ଲାପାଳଙ୍କୁ ହୋମ କ୍ୱାରେଣ୍ଟାଇନ୍ ବିଷୟରେ ଅଧିକ କ୍ଷମତା ଦିଆଯାଇଛି । ଜନସାଧାରଣଙ୍କ ସ୍ୱାସ୍ଥ୍ୟର ସୁରକ୍ଷାକୁ ଦୃଷ୍ଟିରୁ ହୋମ କ୍ୱାରେଣ୍ଟାଇନରେ ରହୁଥିବା ବ୍ୟକ୍ତିଙ୍କ ଘର ସମ୍ମୁଖରେ ଏକ ନିର୍ଦ୍ଧାରିତ ଫର୍ମ ପୂରଣ କରି ଲଗାଇବା ପାଇଁ ବିଜ୍ଞପ୍ତି ଜାରି କରିଛନ୍ତି ରାଜ୍ୟ ସରକାର ।