ରାଜଧାନୀରେ ଜାତୀୟ ରାଜପଥରେ ସୁରକ୍ଷିତ ନୁହଁନ୍ତି ଯାତ୍ରୀ : ବ୍ଲାକସ୍ପଟ୍ ଚିହ୍ନଟ ସତ୍ତ୍ୱେ କମୁନି ଦୁର୍ଘଟଣା, ୫ ବର୍ଷରେ ଗଲାଣି ୭୪୬ ଜୀବନ

167

କନକ ବ୍ୟୁରୋ : ରାଜଧାନୀ ଭୁବନେଶ୍ବରରେ ରବିବାର ବିଳମ୍ବିତ ରାତିରେ ବାଲିଅନ୍ତା ଥାନା ପାହାଳ ଫାଣ୍ଡି ଅଧୀନ ୧୬ ନମ୍ବର ଜାତୀୟ ରାଜପଥରେ ଏକ ଟ୍ରକକୁ ଟାଭେରା ଧକ୍‌କା ଦେବା ପରେ ଘଟଣାସ୍ଥଳରେ ଦୁଇ ଜଣ ଓ ପରେ ଚିକିତ୍ସା ଅବସ୍ଥାରେ ଜଣକଙ୍କ ମୃତ୍ୟୁ ହୋଇ ଯାଇଛି । ଜାଦୀୟ ରାଜପଥରେ ବାରମ୍ବାର ଏପରି ଦୁର୍ଘଟଣା ଘଟୁଥିବାରୁ ତାହା ସମସ୍ତଙ୍କ ପାଇଁ ଚିନ୍ତାର କାରଣ ହୋଇଛି । ଏ ନେଇ ମଧ୍ୟ ଚିନ୍ତାରେ କମିସନରେଟ ପୁଲିସ । କେମିତି ଜାତୀୟ ରାଜପଥରୁ ଦୁର୍ଘଟଣା ହ୍ରାସ ହେବ ସେ ନେଇ ବିଭିନ୍ନ ପଦକ୍ଷେପ ନିଆଯିବା ସତ୍ତ୍ବେ ଦୁର୍ଘଟଣା କମୁ ନାହିଁ । ଯାହା ସୂଚନା ମିଳିଛି ଗତ ୫ ବର୍ଷ ମଧ୍ୟରେ ଖଣ୍ଡଗିରି ଛକରୁ ପାହାଳ ଛକ ମଧ୍ୟରେ ବିଭିନ୍ନ ସମୟରେ ଦୁର୍ଘଟଣା ଘଟି ୭୫୬ ଜଣଙ୍କ ଜୀବନ ଯାଇଛି । ଏକାଧିକ ପଙ୍ଗୁ ହୋଇ ଯାଇଛନ୍ତି ।

ଜାତୀୟ ରାଜପଥରେ ଏପରି ବାରମ୍ବାର ଦୁର୍ଘଟଣା ଘଟି ଧନଜୀବନ ହାନି ହେଉ ଥିବାରୁ ତାକୁ ନିୟନ୍ତ୍ରଣ କରିବା ପୁଲିସ ଲାଗି ଚ୍ୟାଲେଞ୍ଜ ହୋଇଛି । କିଛି ମାସ ତଳେ ଜାତୀୟ ରାଜପଥରେ ବ୍ଲାକସ୍ପଟ ବା ଦୁର୍ଘଟଣାପ୍ରବଣ ଅଂଚଳ ଚିହ୍ନଟ କାମ ଆରମ୍ଭ ହୋଇଥିଲା । ୫ଟି ଛକ ବାଟଭୁଆସୁଣୀ, ପାତ୍ରପଡାର ଆଇଗିଣିଆ, ନୟାପଲ୍ଲୀର କ୍ରାଉନ ହୋଟେଲ ସାମ୍ନା, ଆଚାର୍ଯ୍ୟବିହାର ଓ ପାହାଳକୁ ଦୁର୍ଘଟଣାପ୍ରବଣ ଅଂଚଳ ବା ବ୍ଲାକସ୍ପଟ ଭାବେ ଚିହ୍ନଟ କରା ଯାଇଥିଲା। ସେହି ସବୁ ଛକରେ ସତର୍କ ସୂଚନା ମଧ୍ୟ ଲାଗିଲା । ସ୍ପିଡ ବ୍ରେକର ମଧ୍ୟ ଲଗାଇବାକୁ ନିର୍ଦେଶ ହେଲା । ନୂଆ ମୋଟର ଯାନ ଆଇନ ପରେ ମଦ୍ୟପ ଚାଳକଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ହେଉଛି । ଏହା ସତ୍ତ୍ବେ ଜାତୀୟ ରାଜପଥରେ ଦୁର୍ଘଟଣା ବଢିଚାଲିଛି ।

ପ୍ରତ୍ୟେକ ଦିନ ରାଜଧାନୀର ବାଟ ଭୁଆସୁଣୀ ଛକରୁ ପାହାଳ ଛକ ମଧ୍ୟରେ କେଉଁଠି ନା କେଉଁଠି ଘଟୁଛି ଦୁର୍ଘଟଣା। ଭାରୀଯାନ ଚକା ତଳେ ଚାଲି ଯାଉଛି ଅନେକଙ୍କ ଜୀବନ । ପୂର୍ବରୁ ଖଣ୍ଡଗିରି ଛକ ଥିଲା ରାଜଧାନୀର ସବୁଠାରୁ ଦୁର୍ଘଟଣା ପ୍ରବଣ ଛକ । ଏବେ କିନ୍ତୁ ଆଇଗିଣିଆ ଛକ ପାଲଟି ଯାଇଛି ରାଜଧାନୀର ଅନ୍ୟତମ ଦୁର୍ଘଟଣା ପ୍ରବଣ ଅଞ୍ଚଳ । ସେହିପରି ଏପଟେ ହଂସପାଳ ଓ ପାହାଳ ଛକରେ ମଧ୍ୟ ପ୍ରତ୍ୟେକ ଦିନ ଦୁର୍ଘଟଣା ଘଟି ଚାଲିଛି । ହଂସପାଳ ଛକରେ ବାରମ୍ବାର ଦୁର୍ଘଟଣା ଘଟିବା କାରଣରୁ ନିକଟରେ ଥିବା ଏକ କଟକୁ ମଧ୍ୟ ବନ୍ଦ କରି ଦିଆଯାଇଛି । ସେହିପରି ସତସଙ୍ଗ ମନ୍ଦିର ସମ୍ମୁଖରେ ମଧ୍ୟ ବିଭିନ୍ନ ସମୟରେ ଦୁଘର୍ଟଣା ଘଟିଥାଏ । ସେଠାରେ ଏବେ ଟ୍ରାଫିକ ପୁଲିସ ବସ ରହଣୀ ସ୍ଥାନ କରିବା ଓ ରାତିରେ ବ୍ୟ‌ାରିକେଡ୍ ଲଗାଇବା ପରେ ଦୁର୍ଘଟଣା ହ୍ରାସ ପାଇଛି ।

ତେବେ ଏ ସମ୍ପର୍କରେ ଟ୍ରାଫିକ ପୁଲିସର ଜଣେ ବରିଷ୍ଠ ଅଧିକାରୀ କହିଛନ୍ତି, ନୂଆ ମୋଟରଯାନ ସଂଶୋଧନ ଆଇନ ଲାଗୁ ହେବା ପରେ ଜାତୀୟ ରାଜପଥ ଓ ସହର ମଧ୍ୟରେ ଦୁର୍ଘଟଣା କମିଛି । ଏହାକୁ ଆହୁରି କମାଇବାକୁ କମିସନେରଟ ପୁଲିସ ଓ ପରିବହନ ବିଭାଗର ଅଧିକ ପଦକ୍ଷେପ ନେବାର ଆବଶ୍ୟକ ରହିଛି ।

Comments are closed.