ଗଞ୍ଜାମ ବସ୍ ଦୁର୍ଘଟଣାରେ ତୁରନ୍ତ କାର୍ଯ୍ୟାନୁଷ୍ଠାନ : ୧୦ ଜଣଙ୍କ ମୃତ୍ୟୁ ପରେ ଚେତା ପଶିଲା, ଦାୟିତ୍ୱରେ ଅବହେଳା ଦର୍ଶାଇ ୪ ଇଞ୍ଜିନିୟରଙ୍କୁ ନିଲମ୍ବିତ କଲେ ସରକାର
କନକ ବ୍ୟୁରୋ : ଗଞ୍ଜାମ ଦୁର୍ଘଟଣା ଘଟଣାରେ ସରକାରଙ୍କ ତୁରନ୍ତ କାର୍ଯ୍ୟାନୁଷ୍ଠାନ । ୪ ଜଣ ଇଞ୍ଜିନିୟର ସସପେଣ୍ଟ । ବ୍ରହ୍ମପୁର ଇଲେକ୍ଟ୍ରିକାଲ ଡିଭିଜନ ଜେଓ ଓ ସହକାରୀ ଯନ୍ତ୍ରୀ ନିଲମ୍ବିତ ହୋଇଛନ୍ତି । ସାଉଥକୋ ଜେଇ ଦେବାଶିଷ ନାୟକ, ଏସଡିଓ ବିଶ୍ୱରଂଜନ ମହାପାତ୍ର ନିଲମ୍ବିତ ହୋଇଛନ୍ତି । ସେହିପରି ଗଂଜାମ ଗ୍ରାମ୍ୟ ଉନ୍ନୟନ ବିଭାଗର ଯନ୍ତ୍ରୀ ଓ ସହକାରୀ ଯନ୍ତ୍ରୀଙ୍କୁ ମଧ୍ୟ ନିଲମ୍ବନ କରାଯାଇଥିବା ସୂଚନା ମିଳିଛି । ଏ ନେଇ ରାଜ୍ୟ ଶକ୍ତିମନ୍ତ୍ରୀ ଦିବ୍ୟଶଙ୍କର ମିଶ୍ର ସୂଚନା ଦେଇଛନ୍ତି । ଲୋକସେବା ଭବନରେ ଏ ନେଇ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଗଞ୍ଜାମ ମେନ୍ଦ୍ରାଜପୁର ବସ ଦୁର୍ଘଟଣାର ୧୦ ଜଣ ନୀରିହଙ୍କ ଜୀବନରେ ଅକାଳରେ ଚାଲିଯିବା ପରେ ସାରା ରାଜ୍ୟରେ ଆଲୋଡ଼ନ ସୃଷ୍ଟି ହୋଇଛି । ଏହି ଘଟଣାକୁ ଗୁରୁତର ସହ ନେଇଛନ୍ତି ସରକାର । ବିଜୁଳି ତାର ଲାଗି ବସ ଦୁର୍ଘଟଣାରେ ୧୦ ଜଣଙ୍କ ଜୀବନ ଯିବା ପରେ ସରକାରଙ୍କ ଚେତା ପଶିଛି । ଦାୟିତ୍ୱ ଖିଲାପକାରୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଏଣିକି କୌଣସି ସ୍ଥାନରେ ରାସ୍ତା ନିର୍ମାଣ କାମ ଆରମ୍ଭ କରିବା ପୂର୍ବରୁ ଶକ୍ତି ବିଭାଗର ଅନୁମତି ନେବା ଜରୁରୀ । ପିଡବ୍ଲୁଡି, ଏନଏଚ ଓ ଆରଡି ବିଭାଗ ଶକ୍ତି ବିଭାଗ ଠାରୁ ଅନୁମତି ପାଇବା ପରେ ରାସ୍ତା ନିର୍ମାଣ କରିପାରିବେ । ଏହାଛଡା ବିପଦ ସଙ୍କୁଳ ଭାବେ ତାର ଓହଳିଥିବା ସ୍ଥାନ ଗୁଡିକର ଚିହ୍ନଟ କରାଯାଇ, ତାହାର ମ୍ୟାପିଂ କରାଯିବ । ସେହିପରି ନିରାପତା ପାଇଁ କର୍ମଶାଳା ସହ ଜନସଚେତନତା କାମ ହାତକୁ ନିଆଯିବ । ଏହାଛଡା ରାଜ୍ୟର ସମସ୍ତ ଲାଇନମ୍ୟାନ ମାନଙ୍କୁ ମଧ୍ୟ ତାଲିମ ଦିଆଯିବ ବୋଲି କହିଛନ୍ତି ଶକ୍ତି ମନ୍ତ୍ରୀ କ୍ୟାପ୍ଟେନ ଦିବ୍ୟ ଶଙ୍କର ମିଶ୍ର ।
ଗଞ୍ଜାମ ମେନ୍ଦ୍ରାଜପୁର ବସ ଦୁର୍ଘଟଣାର ପ୍ରାଥମିକ ତଦନ୍ତ ରିପୋର୍ଟ ଆସିବା ପରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଆଜି ରାଜ୍ୟ ଶକ୍ତି ବିଭାଗକୁ ରିପୋର୍ଟ ଦେଇଛି ସାଉଥକୋ । ରିପୋର୍ଟରେ ଗ୍ରାମ ଉନ୍ନୟ ବିଭାଗକୁ ଦୁର୍ଘଟଣା ପାଇଁ ଦାୟୀ କରାଯାଇଛି । ଜୁଲାଇ ୨୦୧୮ରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ମେନ୍ଦ୍ରାଜପୁର ଠାରେ ତିନରୁ ୪ ଫୁଟ ଉଚ୍ଚର କଂକ୍ରିଟ ରାସ୍ତା ନିର୍ମାଣ କରିଥିଲା । ତେଣୁ ଖୁଣ୍ଟରେ ଟଣାଯାଇଥିବା ୧୧ କେଭି ବିଦ୍ୟୁତ ତାର ଓ ରାସ୍ତା ମଧ୍ୟରେ ଉଚ୍ଚତାର ବ୍ୟବଧାନ କମିଯାଇଥିଲା । ଏହାପରେ ସାଉଥକୋ ବିଭାଗର ନିର୍ବାହୀ ଯନ୍ତ୍ରୀ, ଧନ ଜୀବନ ସୁରକ୍ଷା ପାଇଁ ମେନ୍ଦ୍ରାଜପୁରରେ ରାସ୍ତା ଓ ବିଜୁଳି ତାର ମଧ୍ୟରେ ଉଚ୍ଚତା ବୃଦ୍ଧି ପାଇଁ ଏକ ବ୍ୟୟ ଅଟକଳ କରିଥିଲେ । ଆଉ ସେହି ବ୍ୟୟ ଅଟକଳକୁ ୨୦୧୮ ଜୁଲାଇ ୪ ତାରିଖରେ ବ୍ରହ୍ମପୁର ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀଙ୍କୁ ଦେଇଥିଲେ । ସେହି ରାସ୍ତାରେ ବସ ଅତିକ୍ରମ କଲାବେଳେ କମ ଉଚ୍ଚରେ ବିଦ୍ୟୁତ ତାର ସଂସସ୍ପର୍ଶରେ ଆସିଯାଇଥିବା ରିପୋର୍ଟରେ ଉଲ୍ଲେଖ ରହିଛି । ତେବେ ତଦନ୍ତ କରି ସରକାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ।