ଆସନ୍ତା ୨୧ ଦିନ ପାଇଁ ସାରା ଦେଶରେ ତାଲା ବନ୍ଦ ଘୋଷଣା କଲେ ପ୍ରଧାନମନ୍ତ୍ରୀ : କରୋନା ମୁକାବିଲା ପାଇଁ ଘରୁ ନବାହାରିବାକୁ କଲେ ଅନୁରୋଧ, ନିଜ ସହ ନିଜ ପରିବାର ପାଇଁ ଘରେ ରହିବାକୁ ଦେଲେ ପରାମର୍ଶ
କନକ ବ୍ୟୁରୋ : ୨୧ ଦିନ ପାଇଁ ସାରା ଭାରତରେ ତାଲା ବନ୍ଦ । କରୋନାକୁ ନେଇ ଭାରତ ଯେଉଁ ସଙ୍କଟଜନକ ସ୍ଥିତିରେ ଗତି କରୁଛି ସେତିକିବେଳେ ଏହାର ମୁକାବିଲା ପାଇଁ ମଙ୍ଗଳବାର ମଧ୍ୟରାତ୍ରରୁ ୨୧ଦିନର ଲକ-ଡାଉନ ବା ତାଲା ବନ୍ଦ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ୨୧ ଦିନ ବହୁତ ଗୁରୁତ୍ୱପୂର୍ଣ୍ଣ । ଜନତା କର୍ଫ୍ୟୁ ଠାରୁ ବି ଏହା ଅଧିକ କଡାକଡି ହେବ । ଘରେ ରହିବା ସମୟରେ ସମସ୍ତ ନିୟମକୁ ମାନି ଚଳିବା ପାଇଁ ପରାମର୍ଶ ଦେଇଛନ୍ତି ମୋଦି । ଯଦି ଏହି ୨୧ ଦିନ ସଂଜମତାର ସହିତ ଭାରତୀୟମାନେ ନରହିବେ, ନ ସମ୍ଭାଳିବେ, ତେବେ ଦେଶ ୨୧ ବର୍ଷ ପଛକୁ ଚାଲିଯିବ ବୋଲି କହିଛନ୍ତି ମୋଦି । ଘର ଆଗରେ ଟଣାଯାଇଥିବା ଏହି ଲକ୍ଷ୍ମଣରେଖାକୁ ନ ଡେଇଁବା ପାଇଁ ନିବେଦନ କରିଛନ୍ତି ପ୍ରଧାନମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
୨୧ ଦିନ ପାଇଁ ସାରା ଭାରତରେ ତାଲା ବନ୍ଦ ପାଇଁ ଘୋଷଣା ହେବା ପରେ ଜରୁରୀକାଳିନ ସେବା ପାଇଁ ଜାରି ହୋଇଛି ଗାଇଡଲାଇନ । ତାଲା ବନ୍ଦ ସମୟରେ ହସ୍ପିଟାଲ, ପେଟ୍ରୋଲ ପମ୍ପ, ଗ୍ୟାସ୍, ମେଡ଼ିସିନ୍ ଷ୍ଟୋର, ରାସନ୍ ଦୋକାନ, କ୍ଷୀର ଦୋକାନ ଭଳି ଜରୁରୀକାଳିନ ସେବା ଓ ସୁବିଧା ଖୋଲା ରହିବି । ସେହିପରି ପରିବା ଦୋକାନ, ଫଳ ଦୋକାନ, ବ୍ୟାଙ୍କ, ବୀମା, ଏଟିମ୍ ଭଳି ସୁବିଧାରେ ମିଳିପାରିବ । ତେବେ ସରକାରୀ ଓ ଘରୋଇ କାର୍ଯ୍ୟାଳୟ ବନ୍ଦ ରହିବ । ସ୍କୁଲ କଲେଜ ଟ୍ରେନିଂ ସେଂଟର ବନ୍ଦ ରହିବ । ଏହି ତାଲାବନ୍ଦ ସମୟରେ ସବୁ ପ୍ରକାର ପରିବହନ ବନ୍ଦ ରହିବ । ତେବେ ଗଣମାଧ୍ୟମ ପାଇଁ କଟକଣା ଲାଗୁ ହେବ ନାହିଁ । ସମସ୍ତ ଶିଳ୍ପ ଅନୁଷ୍ଠାନ ମଧ୍ୟ ବନ୍ଦ ରହିବ ।
କେବଳ ଅତ୍ୟାବଶ୍ୟକ ସାମଗ୍ରୀ ଉତ୍ପାଦନ କରୁଥିବା ଶିଳ୍ପ ପ୍ରତିଷ୍ଠାନ ଚାଲୁ ରହିବ । ତେବେ ସେମାନଙ୍କୁ ରାଜ୍ୟ ସରକାରଙ୍କଠୁ ଅନୁମତି ନେବାକୁ ପଡିବ । ସମସ୍ତ ଧାର୍ମିକ ସ୍ଥଳ ବନ୍ଦ ରହିବ । କେବଳ ଦୈନିକ ଆବଶ୍ୟକୀୟ ନୀତି ସମ୍ପାଦନ କରାଯିବ । ଶବ ସଂସ୍କାରରେ ୨୦ ଜଣରୁ ଅଧିକ ଏକାଠି ରହି ପାରିବେ ନାହିଁ ବୋଲି ଗାଇଡଲାଇନରେ ଉଲ୍ଲେଖ କରାଯାଇଛି । ଏହା ସହ ଏହି କଟକଣାକୁ ଅମାନ୍ୟ କରୁଥିବା ବ୍ୟକ୍ତିଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରାଳୟ ନିର୍ଦ୍ଦେଶ ଜାରି କରିଛନ୍ତି । ସାରା ଦେଶରେ ଏହି କଟକଣା ଆଜିଠାରୁ ୨୧ ଦିନ ପର୍ଯ୍ୟନ୍ତ ଲାଗୁ ରହିବ ।