ୟୁଟ୍ୟୁବ୍ ଦେଖାଇଲା ରୋଜଗାରର ରାସ୍ତା। ଜୈବିକ ସାର ଓ ପନିପରିବା ଚାଷ କରି ଭଲ ରୋଜଗାର କରୁଛନ୍ତି ଉଦ୍ୟମୀ ଚାଷୀ ସୁମନ।
କନକ ବ୍ୟୁରୋ: ୟୁଟ୍ୟୁବ୍ ଦେଖାଇଲା ରୋଜଗାରର ରାସ୍ତା । ଚାକିରି ଛାଡ଼ି ଜୈବିକ ପଦ୍ଧତିରେ ଚାଷ କରି ସଫଳତା ପାଇଛନ୍ତି ଗଂଜାମ ବେଗୁନିଆପଡ଼ା ଅଂଚଳର ଯୁବ ଚାଷୀ ସୁମନ । ଏହା ସହିତ ସେ ଜିଆ ଖତ ବ୍ୟବସାୟ କରି ଭଲ ଦି ପଇସା ରୋଜଗାର କରୁଛନ୍ତି । ଦିନେ ଅହମଦାବାଦରେ ରହି ମାର୍ବଲ କମ୍ପାନୀରେ କାମ କରୁଥିଲେ କିନ୍ତୁ ଆଜି ସେ ଜଣେ ସଫଳ ଯୁବଚାଷୀ । ଚାକିରି କରିବା ସମୟରେ ନିଜସ୍ୱ ଉଦ୍ୟମରେ କିଛି କରିବାର ଇଛା ରଖିଥିଲେ ସୁମନ । ୟୁଟ୍ୟୁବରୁ ଜିଆ ଖତ ବିଷୟରେ ଜାଣିବା ପରେ ସେ ରାଜସ୍ଥାନରେ ତାଲିମ ନେଇଥିଲେ । ଏହା ପରେ ନିଜ ଗାଁକୁ ଆସି କିଛି ଜମି ଲିଜ ନେଇ ଆରମ୍ଭ କରିଥିଲେ ଜୈବିକ ସାର ପ୍ରସ୍ତୁତି । ଏବେ ସେହି ଜମିରେ ଜିଆ ଖତ ପ୍ରସ୍ତୁତ କରିବା ସହ ଜୈବିକ ପଦ୍ଧତିରେ କଲରା, ମୂଳା, ଲଙ୍କା, ଲାଉ, ବୋଇତି ଆଳୁ ଭେଣ୍ଡି ଚାଷ କରିଛନ୍ତି । ତେବେ ସୁମନ ପନିପରିବା ବିକ୍ରି କରିବା ସହ ଜିଆ ଓ ଜିଆ ଖତ ବିକ୍ରି କରି ଆତ୍ମନିର୍ଭର ହୋଇପାରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ଜିଆ ଖତ ଗଞ୍ଜାମ ଜିଲ୍ଲା ସହ ମୟୁରଭଞ୍ଜ, ଭୁବନେଶ୍ୱର, ବୌଦ୍ଧ, ବଲାଙ୍ଗିର, ଗଜପତି, କେନ୍ଦ୍ରାପଡା, ବାଲେଶ୍ୱର, ଢେଙ୍କାନାଳ ଓ ଝାରସୁଗୁଡାକୁ ପଠାଇଥାନ୍ତି ସୁମନ । ଜିଆ କିଲୋ ପିଛା ୪୦୦ ଟଙ୍କା ହୋଇଥିବା ବେଳେ ଜିଆ ଖତ କିଲୋ ପିଛା ୧୦ ଟଙ୍କାରେ ବିକ୍ରି ହୋଇଥାଏ । ଜିଆ ଖତ ପାଇଁ ଆବଶ୍ୟକ ହେଉଥିବା ଗୋବରକୁ ଗାଁ ଗହଳିରୁ ଆଣି ଏକାଠି କରିବାକୁ ପଡ଼ିଥାଏ । ଏହା ପରେ ବେଡ଼ ପ୍ରସ୍ତୁତ କରି ଗୋବରକୁ ସେଥିରେ ରଖି ଜିଆ ଛାଡ଼ିବାକୁ ପଡ଼ିଥାଏ । ଏହିସବୁ କାମରେ ସ୍ଥାନୀୟ ଅଞ୍ଚଳର କିଛି ଲୋକଙ୍କୁ ରୋଜଗାର ମିଳିପାରୁଛି । ଯାହାକୁ ନେଇ ସେମାନେ ଖୁସି ବ୍ୟକ୍ତ କରିଛନ୍ତି ।
ଦିନକୁ ଦିନ ଚାଷରୁ ମୁହଁ ଫେରାଉଛନ୍ତି ଯୁବପିଢ଼ି । ଏଭଳି ସ୍ଥିତିରେ ସୁମନଙ୍କ ଭଳି ଜଣେ ଯୁବକ ଜୈବିକ ପଦ୍ଧତିରେ ଚାଷ କରି ସ୍ଥାନୀୟ ଅଂଚଳରେ ଚର୍ଚ୍ଚାର ବିଷୟ ପାଲଟିଛନ୍ତି।