ଗାଁ ମାଟିର ମୋହରେ ଛାଡିଲେ ଦାମୀ ଚାକିରି । ଇଞ୍ଜିନିୟରରୁ ଚାଷୀ ପାଲଟିଗଲେ ଅମର
କନକ ବ୍ୟୁରୋ: ଇଞ୍ଜିନିୟର ପାଠ ପଢା ଶେଷ ପରେ ବିଦେଶ ଗଲେ । ଲକ୍ଷାଧିକ ଟଙ୍କାରେ ଚାକିରି ବି କଲେ । ହେଲେ ଏଥିରେ ଶାନ୍ତି କିନ୍ତୁ ମିଳିଲାନି । ଗାଁ ମାଟିର ମୋହ ତାଙ୍କୁ ଟାଣିଆଣିଲା ବିଦେଶରୁ ଗାଁ ମାଟିକୁ । ଆଉ ନିଜ ଗୋଡରେ ଛିଡା ହେବାର ଇଚ୍ଛା ତାଙ୍କୁ ଅସ୍ଥିର କଲା ।ତ୍ତତାଙ୍କର ଦୃଢ ଇଚ୍ଛା ତାଙ୍କୁ ବାଟ ବି ଦେଖାଇଲା । ଫଳରେ ଜଣେ ଇଞ୍ଜିନିୟରରୁ ଆଜି ସେ ଜଣେ ସଫଳ ଚାଷୀ ।
Kanak News is now on WhatsApp
Join and get latest news updates delivered to you via WhatsApp
ଆମେ କହୁଛୁ ରାଜକନିକା ବ୍ଲକ କୋଇଲିପୁର ପଞ୍ଚାୟତ ବିଶ୍ୱନାଥପୁର ଗାଁର ଯୁବ ଇଞ୍ଜିନିୟର ଅମର କୁମାର ରାଉତଙ୍କ କଥା । ପାଠପଢା ଶେଷ ପରେ ଏକାଧିକ ବିଦେଶରେ ଯାଇ ଚାକିରି କରିଥିଲେ । ଲକ୍ଷାଧିକ ଟଙ୍କା ଦରମା ପାଉଥିଲେ । ହେଲେ ଏସବୁରେ ତାଙ୍କ ମନ ଲାଗୁନଥିଲା । ଶେଷରେ ଚାକିରିର ମୋହ ଛାଡି ଚାଲିଆସିଥିଲେ ଗାଁକୁ । ଆଉ ନିଜେ ସ୍ୱାବଲମ୍ବି ହେବାକୁ ଆରମ୍ଭ କରିଥିଲେ ଚାଷ । ପ୍ରଥମେ ନିଜ ବିଲରେ ଗୋଟିଏ ପୋଖରୀରେ ମାଛ ଚାଷ ଆରମ୍ଭ କଲେ । ଏବେ ତାଙ୍କର ରହିଛି ୧୬ଟି ମାଛ ପୋଖରୀ । ମାଛ ଚାଷ ପାଇଁ ସିଫାରୁ ସ୍ୱତନ୍ତ୍ର ଟ୍ରେନିଙ୍ଗ ନେଇଛନ୍ତି ଅମର । କେବଳ ମାଛ ଚାଷ ନୁହେଁ କୁକୁଡା ଚାଷ, ସହ ଗୋପାଳନରେ ବି ଆଗେଇଛନ୍ତି ଅମର । ବିଭିନ୍ନ ଚାଷରୁ ତାଙ୍କୁ ବାର୍ଷିକ ମିଳୁଛି ୧୦ ଲକ୍ଷ ଟଙ୍କାର ଲାଭ ।
ନିଜେ ସ୍ୱାବଲମ୍ବୀ ହେବା ସହ ୪ଜଣଙ୍କୁ ନିଯୁକ୍ତି ମଧ୍ୟ ଦେଇଛନ୍ତି । ତାଙ୍କ ଉତ୍ପାଦିତ ମାଛ ରାଜକନିକା, ଆଳି , ଚାନ୍ଦବାଲି, ଯାଜପୁର ବଜାରକୁ ରପ୍ତାନୀ ହେଉଛି । ମତ୍ସ୍ୟ ବିଭାଗ ପକ୍ଷରୁ ତାଙ୍କର ପାରଙ୍ଗମତାକୁ ଦୃଷ୍ଟିରେ ରଖି ‘ମୋ ପୋଖରୀ’ ଯୋଜନାରେ ୩ଲକ୍ଷ ଟଙ୍କାର ସାହାଯ୍ୟ କରାଯାଇଛି । ଅମରଙ୍କ ଭଳି ଜଣେ ଉଚ୍ଚ ଶିକ୍ଷିତ ଯୁବକଙ୍କ ଚାଷ ଦେଖିବାକୁ ଅନେକ ସମୟରେ ପାଖ ଚାଷୀଙ୍କ ଭିଡ ଜମୁଛି ।