ନିଜ ଜାଲରେ ନିଜେ ଫସିଲା ଠକ: ବାଲିଅନ୍ତା ଅଂଚଳରେ ଠକୁଥିବାବେଳେ ନାବାର୍ଡର ନିର୍ଦ୍ଦେଶକ ପରିଚୟ ଦେଇ ଫସିଗଲେ ନକଲି ନାବାର୍ଡ ଅଧିକାରୀ
କନକ ବ୍ୟୁରୋ: ନିଜକୁ ନାବାର୍ଡ ନିର୍ଦ୍ଦେଶକ ପରିଚୟ ଦେଇ ଜଣେ ଅବସରପ୍ରାପ୍ତ ପ୍ରାଣୀଧନ ନିରୀକ୍ଷକଙ୍କଠାରୁ ଠକିବାକୁ ଆସି ଫସିଯାଇଛି ଧୂର୍ତ । ପୂର୍ବରୁ ନିଜକୁ ଓମଫେଡ ନିର୍ଦ୍ଦେଶକ କହି ସେ ହି ପ୍ରାଣୀଧନ ନିରୀକ୍ଷକଙ୍କଠାରୁ ଅଢେଇ ହଜାର ଟଙ୍କା ଠକି ନେଇଥିବା ଧୂର୍ତ ଏଥର କିନ୍ତୁ ନିଜ ଜାଲରେ ନିଜେ ଛନ୍ଦି ହୋଇଯାଇଛନ୍ତି । ଏହି ନକଲି ନିର୍ଦ୍ଦେଶକଙ୍କ ନାମ ଅସ୍ମିତ ସେଠୀ । ଉତ୍ୟକ୍ତ ଲୋକେ ତାଙ୍କୁ ଧରି ପୁଲିସରେ ଜିମା ଦେଇଛନ୍ତି । ବାଳକାଟି ପୁଲିସ ତାଙ୍କୁ ଅଟକ ରଖି ପଚରାଉଚରା କରୁଛି ।
Kanak News is now on WhatsApp
Join and get latest news updates delivered to you via WhatsApp
ଘଟଣା ଅନୁସାରେ, ଗତକାଲି ପ୍ରାୟ ସାଢେ ଗୋଟାଏବେଳେ ଅସ୍ମିତ ଏକ କାରରେ ଆସି ଅବସରପ୍ରାପ୍ତ ପ୍ରାଣୀଧନ ନିରୀକ୍ଷକ ଡମ୍ବରୁଧର ବିଶ୍ୱାଳଙ୍କ ବାଲିଅନ୍ତା ଅଂଚଳର ଶିଶିଲୋ ଗାଁ ଘରେ ପଂହଚିଥିଲେ । ନିଜକୁ ନାବାର୍ଡର ଅଧିକାରୀ ଭାବେ ପରିଚୟ ଦେଇଥିଲେ ଓ ଅଫିସ କାଗଜପତ୍ର ଯାଂଚ ପାଇଁ କହିଥିଲେ । ଏଥିରେ ଡମ୍ବରୁଧର ସନ୍ଦେହ ପ୍ରକାଶ କରି ଗାଁ ଲୋକଙ୍କୁ କହିଥିଲ । ଏହା ପରେ ଗାଁ ଲୋକେ ଅସ୍ମିତଙ୍କୁ ଘେରିଯାଇଥିଲେ ଓ ପରିଚୟପତ୍ର ଦେଖାଇବାକୁ ଅଡିବସିଥିଲେ ।
ଏହାପରେ ନକଲି ନାବାର୍ଡ ଅଧିକାରୀ ଅସ୍ମିତ ଫସିଯାଇଥିଲେ । ପରେ ପୁଲିସ ଘଟଣାସ୍ଥଳରେ ପଂହଚି ଅସ୍ମିତଙ୍କୁ ଫାଣ୍ଡିକୁ ନେଇଯାଇଥିଲେ । ପୂର୍ବରୁ ଅସ୍ମିତ ନକଲି ଓମଫେଡ ନିର୍ଦ୍ଦେଶକ ଭାବେ ଟଙ୍କା ଠକିଥିବା ବି ଅଭିଯୋଗ ରହିଛି । ଅସ୍ମିତ ନକଲି ନିର୍ଦ୍ଦେଶକ ସାଜିବା ପଛରେ କି କାରଣ ରହିଛି ପୁଲିସ ଘଟଣାର ଛାନଭିନ କରୁଛି ।