ରାମଦେବଙ୍କ ସାନଭାଇଙ୍କୁ ମିଳିଲା ବଡ ଦାୟିତ୍ୱ । ଦରମା ବାବଦକୁ ମିଳିବ ମାତ୍ର ୧ ଟଙ୍କା, ୪୩୫୦ କୋଟି ଟଙ୍କାର କମ୍ପାନିର ଦାୟିତ୍ୱ ସମ୍ଭାଳିବେ ରାମ ଭରତ ।
କନକ ବ୍ୟୁରୋ : ରାମଦେବଙ୍କ ସାନ ଭାଇକୁ ପତଞ୍ଜଳି ଗ୍ରୁପରେ ବଡ ଦାୟିତ୍ୱ । ରାମଦେବଙ୍କ ସାନ ଭାଇ ରାମ ଭରତ ଓ ଆଚାର୍ଯ୍ୟ ବାଳକୃଷ୍ଣଙ୍କୁ ରୁଚି ସୋୟା ବୋର୍ଡରେ ସ୍ଥାନ ମିଳିଛି । ରାମ ଭରତଙ୍କୁ କମ୍ପାନିର ଏମଡି କରାଯାଇଥିବା ବେଳେ ଆଚାର୍ଯ୍ୟ ବାଳକୃଷ୍ଣଙ୍କୁ କମ୍ପାନିର ଚେୟାରମ୍ୟାନ ପଦରେ ବସାଯାଇଛି । ତେବେ କମ୍ପାନିର ସେୟାରଧାରକଙ୍କ ଠାରୁ ଏନେଇ ମଞ୍ଜୁରୀ ଅଣାଯିବା ବାକି ରହିଛି । ଗତବର୍ଷ ରୁଚି ସୋୟା କମ୍ପାନିକୁ ୪୩୫୦ କୋଟି ଟଙ୍କାରେ କିଣିଥିଲା ପତଞ୍ଜଳି ଗ୍ରୁପ ।
Kanak News is now on WhatsApp
Join and get latest news updates delivered to you via WhatsApp
ରୁଚି ସୋୟା କମ୍ପାନି ନିଜର ସେୟାରଧାରକଙ୍କୁ ଏନେଇ ନୋଟିସ ଜାରି କରିବା ସହ ରାମ ଭରତଙ୍କ ନିଯୁକ୍ତିକୁ ନେଇ ମଞ୍ଜୁରି ମାଗିଛି । ୨୦୨୨ ଡିସେମ୍ବର ୧୭ ଯାଏଁ ଏହି ପଦବୀରେ ରହିବେ ରାମ ଭରତ । ଏବେ ଭରତ ପତଞ୍ଜଳି ଆୟୁର୍ବେଦର ଦୈନିକ କାମ ବୁଝୁଛନ୍ତି । ଦୀର୍ଘ ଦିନ ଧରି କମ୍ପାନି ସହ ଜଡିତ ଥିବା ରାମ ଭରତ କମ୍ପାନିକୁ ଆଗକୁ ନେବା ପାଇଁ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଥାନ୍ତି । ସବୁଠୁ ବଡ କଥା ହେଲା, ରାମଦେବଙ୍କୁ କମ୍ପାନିର ଡାଇରେକ୍ଟର ଭାବେ ନିଯୁକ୍ତି ଦିଆଯାଇଛି ।
କମ୍ପାନିର ନିର୍ଦ୍ଦେଶକ ମଣ୍ଡଳୀ ନେଇଥିବା ନିଷ୍ପତ୍ତି ଅନୁଯାୟୀ, ରାମ ଭରତଙ୍କୁ ଦରମା ବାବଦକୁ ବର୍ଷକୁ ମାତ୍ର ଟଙ୍କାଟିଏ ଦିଆଯିବ । ସେହିଭଳି ଆଚାର୍ଯ୍ୟ ବାଳକୃଷ୍ଣ ମଧ୍ୟ ବାର୍ଷିକ ଟଙ୍କାଟିଏ ଦରମା ନେବେ ଓ କମ୍ପାନିକୁ ସେବା ଯୋଗାଇଦେବେ । ୨୦୧୭ରୁ ରୁଚି ସୋୟା କମ୍ପାନି ଦେବାଳିଆ ଆଡକୁ ଗତି କରିଥିବା ବେଳେ ଗତବର୍ଷ ଏହି କମ୍ପାନିକୁ କିଣିଥିଲା ପତଞ୍ଜଳି ।
ରାମଦେବଙ୍କ ସାନଭାଇ ରାମ ଭରତ ଅଧିକାଂଶ ସମୟ ଲାଇମଲାଇଟକୁ ଆସୁନଥିବା ବେଳେ ୨୦୧୫ରେ କିନ୍ତୁ ଚର୍ଚ୍ଚାକୁ ଆସିଥିଲେ । ଟ୍ରକ ୟୁନିୟନ ଓ ପତଞ୍ଜଳି ଆୟୁର୍ବେଦ ପରିସରର ସୁରକ୍ଷାକର୍ମୀଙ୍କ ମଧ୍ୟରେ ଝଗଡା ହେବା ପରେ ଏଥିରେ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିଲା । ଏହି ଘଟଣାରେ ରାମ ଭରତଙ୍କ ନାମ ସାମ୍ନାକୁ ଆସିବା ପରେ ତାଙ୍କୁ ବିଚାର ବିଭାଗୀୟ ହେପାଜତକୁ ନିଆଯାଇଥିଲା । ସେତେବେଳେ ଭରତଙ୍କୁ ନେଇ ଜୋରଦାର ଚର୍ଚ୍ଚା ହୋଇଥିଲା ।