ଅଯୋଧ୍ୟାରୁ ନିର୍ବାଚନ ଲଢିପାରନ୍ତି ଯୋଗୀ ଆଦିତ୍ୟନାଥ!

କନକ ବ୍ୟୁରୋ : ଉତ୍ତରପ୍ରଦେଶ ବିଜେପିରେ ବିଦ୍ରୋହର ସ୍ୱର। ଗତ ୨ ଦିନ ମଧ୍ୟରେ ଉତ୍ତରପ୍ରଦେଶର ଯୋଗୀ ସରକାରରୁ ୨ ମନ୍ତ୍ରୀ, ୪ ବିଧାୟକଙ୍କ ସମେତ ୬ ନେତା ଇସ୍ତଫା ଦେଲେଣି। ନିର୍ବାଚନ ଖୁବ୍‌ କମ୍‌ ଦିନ ଥିବାବେଳେ ଏହା ବିଜେପି ପାଇଁ ଏକ ଶକ୍ତ ଝଟ୍‌କା। ଇତି ମଧ୍ୟରେ ଏକ ବିଶେଷ ସୂତ୍ରରୁ ଜାଣିବାକୁ ମିଳିଛି ଯେ, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଯୋଧ୍ୟା ଆସନରୁ ଲଢ଼ିବେ।

ଗତକାଲି ବିଜେପିର ଏକ ୧୦ ଘଣ୍ଟିଆ ମାରାଥନ୍‌ ବୈଠକ ଦିଲ୍ଲୀରେ ହୋଇଥିଲା। ବୈଠକରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ଯୋଗ ଦେଇଥିଲେ। ଏହି ‌ବୈଠକରେ ଯୋଗୀ ଆଦିତ୍ୟନାଥ ଅଯୋଧ୍ୟାରୁ ଲଢ଼ିବା ସଂକ୍ରାନ୍ତରେ ଆଲୋଚନା ହୋଇଥିବା ନେଇ ଅନୁମାନ କରାଯାଉଛି। ଯୋଗୀ ଏବେ ବିଧାନ ପରିଷଦ ସଦସ୍ୟ ରହିଛନ୍ତି। ନିକଟରେ ଯୋଗୀ କହିଥିଲେ ଯେ, ଦଳର ଶୀର୍ଷ ନେତାଙ୍କ ନିଷ୍ପତ୍ତି କ୍ରମେ ସେ ବିଧାନସଭା ନିର୍ବାଚନ ଲଢ଼ିବେ। ଉତ୍ତରପ୍ରଦେଶରେ ବିଭିନ୍ନ ଗୁରୁତ୍ବପୂର୍ଣ୍ଣ ଆସନରେ ପ୍ରାର୍ଥୀ ଚୟନ କରିବା ପାଇଁ ଖୁବ୍‌ ଶୀଘ୍ର ବିଜେପିର ସିଇସି (କେନ୍ଦ୍ରୀୟ ନିର୍ବାଚନ କମିଟି) ବୈଠକ ହୋଇପାରେ।

ଯୋଗୀଙ୍କୁ ଅଯୋଧ୍ୟାରୁ ଛିଡା କରାଇ ବଡ ସଂକେତ ଦେବାକୁ ଚାହୁଁଛି ବିଜେପି । ଏମିତିରେ ଯୋଗୀ ସରକାର ସମୟରେ ଅଯୋଧ୍ୟାରେ ରାମ ମନ୍ଦିର ହୋଇଥିବା ନେଇ ବାରମ୍ବାର ଦୋହରାଇ ଆସିଛନ୍ତି ଯୋଗୀ ଆଦିତ୍ୟନାଥ । ତେଣୁ ଏହି ଆସନରେ ଛିଡା ହେଲେ ଯୋଗୀଙ୍କ ବିଜୟ ସୁନିଶ୍ଚିତ ଏହାର ଆକଳନ କରି ସାରିଛି ବିଜେପି । ଯୋଗୀଙ୍କୁ ସୁରକ୍ଷିତ ଆସନରୁ ଛିଡା କରାଇବାର ବଡ କାରଣ ହେଉଛି, ଅନ୍ୟ ଆସନ ଗୁଡିକ ଉପରେ ଫୋକସ କରିବା । ଯେହେତୁ ଉତ୍ତରପ୍ରଦେଶରେ ଏଥର କଡା ଟକ୍କର ହେବ ବୋଲି କୁହାଯାଉଛି ତେଣୁ ଅନ୍ୟ ଆସନଗୁଡିକୁ ନେଇ ଋଣନୀତି କରିବାକୁ ଯୋଗୀଙ୍କୁ ଯଥେଷ୍ଟ ସମୟ ଆବଶ୍ୟକ । ତେଣୁ ଗୋଟିଏ ବିଧାନସଭା ନିର୍ବାଚନମଣ୍ଡଳୀ ମଧ୍ୟରେ ଯୋଗୀଙ୍କୁ ସୀମିତ ରଖିବାକୁ ଚାହୁଁନାହିଁ ଦଳ । ପୁଣିଥରେ ଶାସନ କ୍ଷମତାକୁ ଫେରିବାକୁ ହେଲେ ଯୋଗୀଙ୍କୁ ସାମ୍ନାକୁ ଆଣି ନିର୍ବାଚନ ଲଢିବା ଉପରେ ଜୋର ଦେଇଛି ଦଳ । ଉଲ୍ଲେଖଯୋଗ୍ୟ ଯେ ଉତ୍ତରପ୍ରଦେଶର ‌ଅଯୋଧ୍ୟା ଆସନ‌ରୁ ଏବେ ବେଦ ପ୍ରକାଶ ଗୁପ୍ତା ପ୍ରତିନିଧିତ୍ବ କରୁଛନ୍ତି।