ପାକିସ୍ତାନର ବିଜୟକୁ ନେଇ ଖୁସି ମନାଇଥିବା ଲୋକଙ୍କ ଉପରେ ଯୋଗୀଙ୍କ ବଡ ଆକ୍ସନ, ଚାଲିବ ଦେଶଦ୍ରୋହ ମାମଲା
କନକ ବ୍ୟୁରୋ : ଟି-୨୦ ବିଶ୍ୱକପରେ ପାକିସ୍ତାନ ବିରୋଧରେ ଭାରତର ପରାଜୟକୁ ନେଇ ଦେଶରେ ଖୁସି ମନାଇଥିବା ଲୋକଙ୍କ ଉପରେ ଯୋଗୀ ସରକାର ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଉତ୍ତର ପ୍ରଦେଶର ଭିନ୍ନ ଭିନ୍ନ ଜିଲ୍ଲାରେ ପାକିସ୍ତାନ ସମର୍ଥନରେ ଆସିଥିବା ଲୋକଙ୍କ ବିରୋଧରେ ଯୋଗୀ ସରକାର ଦେଶଦ୍ରୋହ ମାମଲା ରୁଜୁ କରିବା ସହ ସେମାନଙ୍କୁ ଗିରଫ କରିଛନ୍ତି । ସେମାନଙ୍କ ବିରୋଧରେ ଦେଶଦ୍ରୋହ ଅପରାଧରେ ମାମଲା ଚାଲିବ ବୋଲି କୁହାଯାଇଛି । କୁହାଯାଉଛି କି ଆଗ୍ରାରେ ୩, ବରେଲୀରେ ୩ ଓ ଲକ୍ଷ୍ନୌରେ ଜଣେ ଅଭିଯୁକ୍ତଙ୍କୁ ପୋଲିସ ଗିରଫ୍ କରିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ରାଜସ୍ଥାନର ଉଦୟପୁରରେ ପାକିସ୍ତାନ କ୍ରିକେଟ ଟିମ୍ କୁ ସମର୍ଥନ କରିବା ଅଭିଯୋଗରେ ଜଣେ ଶିକ୍ଷୟତ୍ରୀଙ୍କୁ ନିଲମ୍ବିତ କରାଯାଇଛି । କେବଳ ନିଲମ୍ବିତ ନୁହେଁ ଅଟାରୀ ପୋଲିସ ସଂପୃକ୍ତ ଶିକ୍ଷୟତ୍ରୀଙ୍କୁ ଗିରଫ୍ କରିଛି । କୁହାଯାଉଛି କି ଶିକ୍ଷୟତ୍ରୀ ନଫିସା ମ୍ୟାଚ ଶେଷ ହେବାପରେ ହ୍ୱାଟସଆପରେ ଷ୍ଟାଟସ ଦେଇଥିଲେ କି ‘ଆମେ ଜିତିଗଲୁ’
କହିରଖୁ କି ଟି-୨୦ ବିଶ୍ୱକପର ଏକ ମ୍ୟାଚରେ ଭାରତ ପାକିସ୍ତାନ ଠାରୁ ଶୋଚନୀୟ ଭାବେ ପରାଜିତ ହୋଇଥିଲା । ଏହି ପରାଜୟ ପରେ ଭାରତୀୟ କ୍ରିକେଟ ପ୍ରେମୀମାନେ ଦୁଃଖ ପ୍ରକାଶ କରିଥିବା ବେଳେ ଭାରତରେ କିଛି ଲୋକ ପାକିସ୍ତାନର ବିଜୟକୁ ନେଇ ଖୁସି ମନାଇଥିଲେ । ଏହାକୁ ନେଇ ଏବେ ଅଲଗା ଅଲଗା ରାଜ୍ୟର ସରକାରମାନେ ଖୁସି ମନାଇଥିବା ଲୋକଙ୍କୁ ଚିହ୍ନଟ କରି ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ଲାଗିଛନ୍ତି ।