ୟେସ ବ୍ୟାଙ୍କ ସାମ୍ନାରେ ଅଭାବନୀୟ ଦୃଶ୍ୟ । ଚେକବୁକ୍ ସହ ହାତରେ ବିବାହ କାର୍ଡ ଧରି ଟଙ୍କା ଉଠାଇବାକୁ ପହଞ୍ଚିଲେ ଯୁବକ, ସାରା ରାଜ୍ୟରୁ ଆସିଲା ବ୍ୟାଙ୍କରେ ଭିଡର ଚିତ୍ର ।
କନକ ବ୍ୟୁରୋ : ୟେସ ବ୍ୟାଙ୍କର ପୁନରୁଦ୍ଧାର ନେଇ ସରକାର କିମ୍ବା ଆରବିଆଇ ଯୋଜନା ବାବଦରେ ଏପର୍ଯ୍ୟନ୍ତ କିଛି ସ୍ପଷ୍ଟ ହୋଇନାହିଁ । ଏପଟେ ବ୍ୟାଙ୍କର ପ୍ରତିଷ୍ଠାତା ରାଣା କପୁରଙ୍କୁ ଘନଘନ ଜେରା କରୁଛି ପ୍ରବର୍ତ୍ତନ ନିର୍ଦ୍ଦେଶାଳୟ । ଆଉ ଏହାରି ଭିତରେ ଟଙ୍କା ଉଠାଣ ନେଇ ରିଜର୍ଭ ବ୍ୟାଙ୍କର କଟକଣା ଗ୍ରାହକଙ୍କ ଅସୁବିଧାକୁ ବଢାଇ ଦେଇଛି । କିଏ ବିବାହ ଖର୍ଚ୍ଚ ତୁଲାଇବା ପାଇଁ, ତ ଆଉ କିଏ ବ୍ୟବସାୟ କାରବାର ପାଇଁ ଟଙ୍କା ଉଠାଇ ପାରୁନାହାନ୍ତି । ସେପଟେ ବ୍ୟାଙ୍କ ବୁଡିଯିବା ଆଶଙ୍କାରେ ସାରା ବାଜ୍ୟରେ ୟେସ ବ୍ୟାଙ୍କ ଶାଖାରେ ଜମିଛି ଗ୍ରାହକଙ୍କ ଭିଡ ।
Kanak News is now on WhatsApp
Join and get latest news updates delivered to you via WhatsApp
ୟେସ ବ୍ୟାଙ୍କରୁ ଟଙ୍କା ଉଠାଣ ନେଇ ଆରବିଆଇ କଟକଣା ପରେ ବ୍ୟାଙ୍କ ଶାଖା ଗୁଡିକରେ ଲାଗିରହିଛି ପ୍ରବଳ ଭିଡ । ଶୁକ୍ରବାର ପରି ଶନିବାର ମଧ୍ୟ ଟଙ୍କା ଉଠାଣ ପାଇଁ ସାରା ରାଜ୍ୟରେ ୟେସ ବ୍ୟାଙ୍କ ସମ୍ମୁଖରେ ଦେଖିବାକୁ ମିଳିଛି ଲମ୍ବାଧାଡି । ଏହି ଖବର ସଂଗ୍ରହ କଲାବେଳେ ଆମ କ୍ୟାମେରା ପଡିଥିଲା ଜଣେ ଯୁବକଙ୍କ ଉପରେ । ତାଙ୍କ ହାତରେ ୟେସ ବ୍ୟାଙ୍କର ଏକ ଚେକବୁକ ସହ ଥିଲା ବାହାଘର କାର୍ଡ । ପଚାରିବାରୁ ଜଣାପଡିଲା ଗତ ୪ ତାରିଖରେ ବିବାହ କରିଥିବା ଯୁବକ ଜଣଙ୍କ ଟେଂଟ ହାଉସ, ଡିଜେ ଓ ବାଜା ବାଲାଙ୍କୁ ଟଙ୍କା ଦେବା ପାଇଁ ସେ ଅସମର୍ଥ । ପ୍ରାୟ ୫ ଲକ୍ଷ ଟଙ୍କା ଆବଶ୍ୟକ ଥିବାବେଳେ ମିଳିଛି ମାତ୍ର ୫୦ ହଜାର ଟଙ୍କା ।
ଥରେ ଭାବନ୍ତୁ ବ୍ୟାଙ୍କରେ ଟଙ୍କା ଥିବ, କିନ୍ତୁ ଲୋକଙ୍କ ଟଙ୍କା ବାକି ରଖି ଆପଣଙ୍କୁ ମୁହଁ ଲୁଚାଇବାକୁ ପଡୁଥିବ । ମାସକୁ ମାତ୍ର ୫୦ ହଜାର ଟଙ୍କା ଉଠାଣର କଟକଣା ଅନେକ ଗ୍ରାହକଙ୍କୁ ଅସୁବିଧାରେ ପକାଇ ଦେଇଛି । ସମ୍ବଲପୁରର ବ୍ୟବସାୟୀ ଆଶିଷ ଶର୍ମାଙ୍କ ପ୍ରାୟ ୨୫ ଲକ୍ଷ ଟଙ୍କା ୟେସ ବ୍ୟାଙ୍କରେ ଅଛି ।
ବ୍ୟାଙ୍କ ବାହାରେ ଗ୍ରାହକଙ୍କ ଗହଳି ପୁଣିଥରେ ବିମୁଦ୍ରାୟନର ଦୃଶ୍ୟକୁ ମନେ ପକାଇ ଦେଇଛି । ଆଉ ଲୋକଙ୍କ ଅଭିଯୋଗ, ବିମୁଦ୍ରାୟନ ପରେ ହିଁ ସେମାନେ ଘରେ ଟଙ୍କା ରଖିବା ପରିବର୍ତ୍ତେ ବ୍ୟାଙ୍କରେ ଅଧିକ ଟଙ୍କା ରଖିବାକୁ ବାଧ୍ୟ ହୋଇଛନ୍ତି । ହେଲେ ବ୍ୟାଙ୍କରେ ଟଙ୍କା ଥାଇ ସୁଦ୍ଧା ନିଜର ଆବଶ୍ୟକତାକୁ ପୂରଣ କରିବାରେ ସେମାନେ ବିଫଳ ହେଉଛନ୍ତି ।
ଲୋକେ ନିଜ ସଂଚୟକୁ ବ୍ୟାଙ୍କରେ ଜମା ରଖିବା ବେଶି ସୁରକ୍ଷିତ ମନେ କରନ୍ତି । ହେଲେ ଝିଅ ବାହାଘର, ପିଲାଙ୍କ ପାଠ ପଢା, କିମ୍ବା ପରିବାର ସଦସ୍ୟଙ୍କ ଚିକିତ୍ସା ପାଇଁ ଟଙ୍କା ବ୍ୟାଙ୍କରେ ଥିବ, କିନ୍ତୁ ଆପଣଙ୍କ ପାଖରେ ନଥିବ । ଏହା କେବଳ ଗୋଟିଏ ବ୍ୟାଙ୍କ ବା ତାର ଗ୍ରାହକଙ୍କର ସମସ୍ୟା ନୁହେଁ । ଏହା ଦେଶର ସଂପୂର୍ଣ୍ଣ ବ୍ୟାଙ୍କିଙ୍ଗ ବ୍ୟବସ୍ଥା ଉପରେ ଗୋଟିଏ ବଡ ସନ୍ଦେହ ତିଆରି କରୁନାହିଁ କି ?