ସମୁଦ୍ର ଭିତରେ ଫାଟିଲା ଆଗ୍ନେୟଗିରି । ସମୁଦ୍ର ଗର୍ଭରୁ ବାହାରକୁ ବାହାରିଲା ଦ୍ୱିତୀୟ ବିଶ୍ୱଯୁଦ୍ଧ ବେଳର ଯୁଦ୍ଧପୋତ ।
କନକ ବ୍ୟୁରୋ: ଜାପାନର ରାଜଧାନୀ ଟୋକିଓର ନିକଟରେ ଥିବା ପ୍ରଶାନ୍ତ ମହାସାଗର ଭିତରେ ଏକ ଆଗ୍ନେୟଗିରି ଫାଟିବାକୁ ଲାଗିଛି । ଯାହା ଫଳରେ ସମୁଦ୍ର ଭିତରେ ପୋତି ରହିଥିବା ଦ୍ୱିତୀୟ ବିଶ୍ୱଯୁଦ୍ଧ ସମୟର ଦୁଇ ଡର୍ଜନରୁ ଅଧିକ ଯୁଦ୍ଧ ଜାହାଜ ଏବେ ପାଣିର ବାହାରକୁ ଆସିଥିବା ଦେଖିବାକୁ ମିଳିଛି । ଜାପାନର ଅଲ୍ ନିପ୍ପୋ ନ୍ୟୁଜ ମୁତାବକ, ହେଲିକପ୍ଟର ଫୁଟେଜରୁ ଏହି ସବୁ ପୁରାତନ ଯୁଦ୍ଧ ଜାହାଜକୁ ଦେଖିବାକୁ ମିଳିଛି । ଯାହାକି ଦଶନ୍ଧୀ ଦଶନ୍ଧୀ ଧରି ସମୁଦ୍ର ଭିତରେ ବୁଡି ରହିଥିଲା ।
Kanak News is now on WhatsApp
Join and get latest news updates delivered to you via WhatsApp
ଟୋକିଓରୁ ୧୨ ଶହ କିଲୋମିଟର ଦୂରରେ ଦକ୍ଷିଣ ପ୍ରଶାନ୍ତ ମହାସାଗରରେ ଥିବା ଇୟୋ ଜିମୋ ଦ୍ୱୀପରେ ଦ୍ୱିତୀୟ ବିଶ୍ୱଯୁଦ୍ଧ ସମୟର ପ୍ରାୟ ୨୪ଟି ଯୁଦ୍ଧପୋତକୁ ଦେଖିବାକୁ ମିଳିଛି । ଯାହାକି ବହୁ ବର୍ଷଧରି ସମୁଦ୍ର ଭିତରେ ବୁଡି ରହିଥିଲା । ତେବେ ଫୁକୁତୋକୁ-ଓକାନୋବା ଆଗ୍ନେୟଗିରି ଫାଟିବା ପରେ ଓ ଭୂମିକମ୍ପ ଆସିବା ପରେ ଏହି ସବୁ ଯୁଦ୍ଧ ଜାହାଜ ଏବେ ସମୁଦ୍ର ଭିତରୁ ବାହାରକୁ ଆସିବା ସହିତ କିଛି ଜାହାଜ କୂଳରେ ଆସି ଲାଗିଛି ।
ଏହି ସବୁ ଯୁଦ୍ଧ ଜାହାଜ ଦ୍ୱିତୀୟ ବିଶ୍ୱଯୁଦ୍ଧ ସମୟର । ଏହି ସ୍ଥାନରେ ହୋଇଥିବା ଲଢେଇକୁ ବ୍ୟାଟେଲ ଅଫ୍ ଇୟୋ ଜିୟୋ କୁହାଯାଉଥିଲା । ଏହି ସ୍ଥାନରେ ୧୯୪୫ ମସିହାରେ ଆମେରିକାର ସେନା ଓ ଜାପାନର ସେନା ମୁହାଁମୁହିଁ ହୋଇଥିଲେ । ତେବେ ୭୦ ହଜାର ଆମେରିକୀୟ ସୈନ୍ୟଙ୍କ ଆଗରେ ପରାଜୟ ବରଣ କରିଥିଲେ ୨୦ ହଜାର ଜାପାନୀ ସୈନ୍ୟ । ତେବେ ଜାପାନୀମାନଙ୍କୁ ପରାଜିତ କରିବା ପରେ ଆମେରିକୀୟ ସୈନ୍ୟମାନେ ତାଙ୍କର ଜାହାଜକୁ ନଷ୍ଟ କରିବା ସହିତ ବମ୍ ପକାଇ ଉଡାଇ ଦେଇଥିଲେ । ଯାହା ପରେ ଏହି ଯୁଦ୍ଧ ଜାହାଜ ଗୁଡିକ ପାଣି ସମୁଦ୍ରର କରାଳ ଗର୍ଭରେ ବୁଡି ଯାଇଥିଲା ।
ଜାପାନ ସରକାରଙ୍କ ସେଣ୍ଟର ଫର୍ ଇଣ୍ଟିଗ୍ରେଟେଡ୍ ଭ୍ଲୋକାନୋ ରିସର୍ଚ୍ଚର ନିର୍ଦ୍ଦେଶକଙ୍କ କହିବା ମୁତାବକ, ଏହି ଦ୍ୱୀପ ଅଞ୍ଚଳରେ ଚଳିତ ବର୍ଷ ଅଗଷ୍ଟ ମାସରେ ଲଗାତାର ବିସ୍ଫୋରଣ ଦେଖିବାକୁ ମିଳିଥିଲା । ଖାଲି ସେତିକି ନୁହେଁ, ଏହି ଅଞ୍ଚଳରେ ଅନେକ ଥର ଭୂମିକମ୍ପ ମଧ୍ୟ ହୋଇଥିଲା । ଯାହା ଫଳରେ ସମୁଦ୍ର ଭିତରେ ଥିବା ବିଭିନ୍ନ ଜିନିଷ ଲଗାତାର ପାଣିର ଉପରକୁ ଆସୁଥିବା ଦେଖିବାକୁ ମିଳିଥିଲା । ଏହି ସମୟରେ ପୁରୁଣା ଦିନର ଏହି ସବୁ ଯୁଦ୍ଧ ଜାହାଜ ମଧ୍ୟ ସମୁଦ୍ରର ଉପରକୁ ଆସି ଭାସିବାକୁ ଲାଗିଥିଲା ।