ଓଡିଶା ଉପରେ ଜାତୀୟ ଗଣମାଧ୍ୟମର ନଜର ଏମିତି । ଓଡିଶାକୁ ଆସିନି, ପଶ୍ଚିମବଙ୍ଗରେ ମାଡ ହୋଇ ବାଂଲାଦେଶକୁ ଫେରିଛି ‘ଫୋନି’ ।
କନକ ବ୍ୟୁରୋ : ସାରା ବିଶ୍ୱର ଗଣମାଧ୍ୟମରେ ବାତ୍ୟା ‘ଫୋନି’ ବର୍ତ୍ତମାନର ସବୁଠାରୁ ବଡ ଖବର ପାଲଟିଛି । ବିଶେଷ କରି ସାମୁଦ୍ରିକ ଝଡ ଫୋନିରେ ଓଡିଶା ସର୍ବାଧିକ ପ୍ରଭାବିତ ହୋଇଛି । କେଇ ଘଣ୍ଟାର ସମୟ ମଧ୍ୟରେ ଛାରଖାର ହୋଇଯାଇଛି ସବୁକିଛି । ଆଉ ଏହାରି ଭିତରେ ଉପକୂଳ ଓଡିଶାବାସୀ ଦୁଃଖ ଦୁର୍ଦ୍ଦିନରେ ଦିନ କାଟୁଥିବା ବେଳେ, ଓଡିଶାବାସୀଙ୍କ ଏହି ଦୁଃଖ ଏବଂ ଓଡିଶାର କ୍ଷୟକ୍ଷତିର ଚିତ୍ର କିଛି ଜାତୀୟ ଗଣମାଧ୍ୟମ ଆଖିରେ ବୋଧହୁଏ ପଡିପାରିନାହିଁ ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ କଥା ହେଉଛି, ଏକ ପ୍ରମୁଖ ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ ବାତ୍ୟା ଫୋନିକୁ ନେଇ ଭୁଲ ଖବର ସ୍ଥାନିତ କରିଛି । ଇଣ୍ଡିଆ ଟୁଡେର ରିପୋର୍ଟ ଅନୁଯାୟୀ, ବାତ୍ୟା ଫୋନି ପଶ୍ଚିମବଙ୍ଗରେ ମାଡ ହୋଇ ବାଂଲାଦେଶ ଆଡକୁ ଚାଲିଯାଇଛି । ଓଡିଶାରେ ଫୋନି ଏତେ ତାଣ୍ଡବ ରଚିଲା ପରେ ମଧ୍ୟ କିଭଳି ଏମିତି ଆଶ୍ଚର୍ଯ୍ୟଜନକ ଖବର ଏକ ଜାତୀୟ ଗଣମାଧ୍ୟମ ପ୍ରସାରିତ କରୁଛି, ସେନେଇ ଉଠୁଛି ପ୍ରଶ୍ନ ।
ସେହିପରି ସାମୁଦ୍ରିକ ଝଡ ‘ଫୋନି’ ଉପକୂଳ ଓଡିଶାର ନକ୍ସା ପରିବର୍ତ୍ତନ କରିଦେଇଥିବା ବେଳେ, ବୋଧହୁଏ ହିନ୍ଦୁସ୍ତାନ ଟାଇମ୍ସ ଆଖିରେ ପଡିପାରିଲାନି ଓଡିଶାର କ୍ଷୟକ୍ଷତି । ଗତକାଲି ହିନ୍ଦୁସ୍ତାନ ଟାଇମ୍ସରେ ପ୍ରକାଶିତ ହୋଇଥିବା ଖବର ଅନୁସାରେ, ବାତ୍ୟା ଫୋନି ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ ଏବଂ ଝାରଖଣ୍ଡରେ ମାଡ ହୋଇଛି । ଓଡିଶାର ନାଁ ମଧ୍ୟ ଉକ୍ତ ଖବରକାଗଜରେ ପ୍ରକାଶିତ ହୋଇନାହିଁ । ଏକ ଜାତୀୟ ଗଣମାଧ୍ୟମ ହିସାବରେ ହିନ୍ଦୁସ୍ତାନ ଟାଇମ୍ସର ଏଭଳି ଖବର ଭାରତୀୟ ସାମ୍ବାଦିକତାର ମୁଣ୍ଡ ନୁଆଁଇଦେଇଛି । ଏହି ଖବର ଏବେ ସୋସିଆଲ ମିଡିଆରେ ଭାଇରାଲ ହେଉଥିବା ବେଳେ, ହିନ୍ଦୁସ୍ତାନ ଟାଇମ୍ସକୁ ଓଡିଶାରେ ବ୍ୟାନ୍ କରିବା ପାଇଁ ମଧ୍ୟ ଦାବି ହେଉଛି ।