ରୋଗ ଭଲ ପାଇଁ ପୂଜାପାଠ । ରାୟଗଡା କଲ୍ୟାଣସିଂହପୁର ବ୍ଲକର ଗ୍ରାମାଞ୍ଚଳରେ ଏବେ ବି ବସା ବାନ୍ଧିଛି ଅନ୍ଧବିଶ୍ୱାସ, ମିଳିମିଳା ରୋଗୀଙ୍କୁ ଡାକ୍ତରଖାନାକୁ ନନେଇ ଗାଁରେ କରୁଛନ୍ତି ପୂଜାର୍ଚ୍ଚନା ।
କନକ ବ୍ୟୁରୋ : ସରକାର ଯେତେ ଡିଜିଟାଲ ଯୁଗ କଥା କହିଲେ ବି ଶିକ୍ଷାଠାରୁ ଦୂରରେ ଥିବା ଲୋକଙ୍କ ମନରୁ ଦୂରେଇ ପାରୁନାହିଁ ଅନ୍ଧ ବିଶ୍ୱାସ । ଆଜି ବି ରୋଗ ଭଲ କରିବା ପାଇଁ ଲୋକେ ଡାକ୍ତରୀ ଚିକିତ୍ସା ଅପେକ୍ଷା ପୂଜା ପାଠକୁ ଭରସା କରୁଛନ୍ତି । ଔଷଧ ଖାଇଲେ ରୋଗ ବଢିବ କହି, ଗାଁ ଦାଣ୍ଡରେ ରୋଗୀଙ୍କୁ ବସାଇ ପୂଜାର୍ଚ୍ଚନା କରୁଛନ୍ତି । ରାୟଗଡା ଜିଲ୍ଲା କଲ୍ୟାଣସିଂହପୁର ଉପାନ୍ତ ଅଂଚଳରୁ ଆସିଛି ସେମିତି ଏକ ଖବର ।
Kanak News is now on WhatsApp
Join and get latest news updates delivered to you via WhatsApp
ଯେଉଁଠି ଶିକ୍ଷାର ଆଲୋକ ପହଂଚିବାରେ ସମସ୍ୟା ହୁଏ, ସେଠି କେମିତି ଅନ୍ଧବିଶ୍ୱାସର ଅନ୍ଧାର ଲୋକଙ୍କୁ କବଳିତ କରେ, ତାହା ବୟାନ କରୁଛି ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକର ରାବୁଗୁଡା ଗାଁରୁ ଆସିଥିବା ଏହି ଘଟଣା । ରୋଗ ଭଲ କରିବାକୁ ଗାଁ ଦାଣ୍ଡରେ ଚାଲିଛି ପୂୂଜାର୍ଚ୍ଚନା । ଡାକ୍ତରୀ ଚିକିତ୍ସା ଉପରୁ ଭରସା ହରାଇଥିବା ଗ୍ରାମବାସୀ ପୂଜାର୍ଚ୍ଚନା କରି ରୋଗ ଭଲ କରିବାକୁ ଉଦ୍ୟମ କରୁଛନ୍ତି । ଆଉ ଏମାନଙ୍କ ମନରେ ଅନ୍ଧ ବିଶ୍ୱାସ ରହିଛି ଡାକ୍ତରଠାରୁ ଔଷଧ ଖାଇଲେ ରୋଗ ବଢୁଛି, ଠାକୁରାଣୀଙ୍କୁ ଝୁଣା ଧୂପ ଦେଇ ପୂଜା କଲେ ରୋଗରୁ ଉପସମ ମିଳୁଛି ।
ଗାଁରେ ମାସକ ମଧ୍ୟରେ ୩୦ରୁ ଅଧିକ ଲୋକ ମିଳିମିଳା ଆକ୍ରାନ୍ତ ହୋଇଛନ୍ତି । ରୋଗୀଙ୍କୁ ଡାକ୍ତରଖାନାକୁ ନେବା ବଦଳରେ ଗାଁ ମଝିରେ ବସାଇ ବେଜୁଣୀ ସାହାଯ୍ୟରେ ପୂଜା କରାଯାଉଥିବା ଦେଖିବାକୁ ମିଳୁଛି । ଗୋଟିଏ ଦନାରେ ଚାଉଳ, ଗୁଡ, ହଳଦୀ ଖଣ୍ଡ ରଖି ପୂଜା କରାଯାଉଛି । ସେପଟେ ଏ ସଂପର୍କରେ କଲ୍ୟାଣସିହଂପୁର ଗୋଷ୍ଠୀ ଚିକିତ୍ସାଧିକାରୀ କହିଛନ୍ତି, ଏଯାଏଁ କୌଣସି ରୋଗୀ ଡାକ୍ତରଖାନାକୁ ଆସି ନାହାନ୍ତି ।
ଆଜିର ବିଜ୍ଞାନ ଯୁଗରେ ଲୋକେ ମହାକାଶରେ ଘର କରିବାକୁ ଜାଗା କିଣିଲେଣି, ବିଭିନ୍ନ ରୋଗର ନିରାକରଣ ପାଇଁ ଟିକା ବାହାରିଲାଣି, ତଥାପି ଆଦିବାସୀ ଗାଁରେ ରୋଗ ଭଲ କରିବା ପାଇଁ ପୂଜା ପାଠକୁ ଭରସା କରୁଛନ୍ତି ନିରିହ ଆଦିବାସୀ ।