ବିଶ୍ୱପ୍ରସିଦ୍ଧ ଧନୁଯାତ୍ରା ପାଇଁ ଉଠୁଛି ପଡୁଛି ବରଗଡ । ଆରମ୍ଭ ହେଲା ପ୍ରବଳ ପ୍ରତାପୀ ମହାରାଜ କଂସଙ୍କ ରାଜୁତି । ଆଜି ଅଭିନୀତ ହେବ କୃଷ୍ଣଜନ୍ମ ଓ ବସୁଦେବଙ୍କ ଗୋପପୁର ଯାତ୍ରା ।
କନକ ବ୍ୟୁରୋ : ଉଦଘାଟିତ ହୋଇଯାଇଛି ୭୧ ତମ ବରଗଡ଼ ବିଶ୍ୱ ପ୍ରସିଦ୍ଧ ଧନୁଯାତ୍ରା । ମଥୁରାରେ ଆରମ୍ଭ ହୋଇଛି ମହାପ୍ରତାପୀ ମହାରାଜ କଂସଙ୍କ ରାଜୁତି । ଦ୍ୱିତୀୟ ଦିନରେ ରଙ୍ଗମହଲ ଉଦଘାଟନ କରିବେ ମହାରାଜ କଂସ । ଏବଂ ଦେବକୀଙ୍କ ଅଷ୍ଟମ ଗର୍ଭରୁ ଶ୍ରୀକୃଷ୍ଣଙ୍କ ଜନ୍ମ ଦୃଶ୍ୟ ଅଭିନୀତ ହେବ ।
ଆରମ୍ଭ ହୋଇଛି ବିଶ୍ୱପ୍ରସିଦ୍ଧ ବରଗଡ ଧନୁଯାତ୍ରା । ଦ୍ୱାପର ଯୁଗକୁ ଫେରିଯାଇଛି ବରଗଡ ସହର । ବରଗଡ଼ ପାଲଟିଛି ମଥୁରା ନଗରୀ, ଅମ୍ବାପାଲି ଗୋପପୁର ଏବଂ ଜୀରା ନଦୀ ହୋଇଛି ଯମୁନା ନଦୀ । ଏହାସହ ବରଗଡ଼ର ସମସ୍ତ ଜନ ସାଧାରଣ ପାଲଟି ଯାଇଛନ୍ତି ଏହି ମୁକ୍ତାକାଶ ରଙ୍ଗମଂଚର ଜଣେ ଜଣେ କଳାକାର ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ମାଁ ସମଲେଶ୍ୱରୀଙ୍କ ମନ୍ଦିରରେ ପୂଜାର୍ଚ୍ଚନା ପରେ ଏକ ଶୋଭାଯାତ୍ରା ନଗର ପରିକ୍ରମା କରି ମଥୁରା ରାଜ ଦରବାରରେ ପହଂଚିଥିଲା । ଏହାପରେ ସାଂସଦ ସୁରେଶ ପୂଜାରୀ, ସାଂସଦ ପ୍ରସନ୍ନ ଆଚାର୍ଯ୍ୟ ଓ ବିଧାୟକ ଦେବେଶ ଆଚାର୍ଯ୍ୟ ଧନୁ ଯାତ୍ରାର ଶୁଭ ଉଦଘାଟନ କରିଥିଲେ । ଉଦଘାଟନୀ କାର୍ଯ୍ୟକ୍ରମରେ ଜିଲ୍ଲାପାଳଙ୍କ ସମେତ ଉଚ୍ଚ ଅଧିକାରୀମାନେ ସାମିଲ ହୋଇଥିଲେ ।
ଧନୁଯାତ୍ରାର ଉଦଘାଟନୀ ଦିବସରେ ମହାରାଜ ଉଗ୍ରସେନ ରାଜକୀୟ ଆଡ଼ମ୍ବର ସହ ଦେବକୀ ଓ ବାସୁଦେବଙ୍କ ବିବାହ କରାଇଥିଲେ । ସେପଟେ ଯୁବରାଜ କଂସ ଗୋମତ ଋଷିଙ୍କ ଠାରୁ ଅଭିଶାପ ପାଇବା ସହ ତାଙ୍କ ଆଶ୍ରମରେ ନିଆଁ ଲଗାଇଛନ୍ତି । ଆକାଶରୁ ଦୈବୀବାଣୀ ଶୁଣି ଦେବକୀ-ବାସୁଦେବଙ୍କୁ ବନ୍ଦୀ କରିଛନ୍ତି କଂସ । ଏହାପରେ ମହାରାଜ ଉଗ୍ରସେନଙ୍କୁ ଗାଦିଚ୍ୟୁତ କରି ନିଜେ ସିଂହାସନ ଆହୋରଣ କରିଛନ୍ତି । କଂସଙ୍କ ରାଜ୍ୟଭିଷେକକୁ ନେଇ ମନ୍ତ୍ରୀ ପରିଷଦ ଉଲ୍ଲସିତ ଥିବା ବେଳେ ସମସ୍ତଙ୍କ ମନୋରଂଜନ ପାଇଁ ଆୟୋଜିତ ହୋଇଥିଲା ନୃତ୍ୟଗୀତ କାର୍ଯ୍ୟକ୍ରମ ।
ଦ୍ୱିତୀୟ ଦିନରେ ମଥୁରାବାସୀଙ୍କ ମନୋରଂଜନ ସକାଶେ ରଂଗମହଲର ଉଦଘାଟନ କରିବେ ମହାରାଜ କଂସ । ଏବଂ ଦେବକୀଙ୍କ ଅଷ୍ଟମ ଗର୍ଭରୁ ଶ୍ରୀକୃଷ୍ଣଙ୍କ ଜନ୍ମ । କଂସଙ୍କ ଭୟରେ ବାସୁଦେବ କୃଷ୍ଣଙ୍କୁ ନେଇ ଗୋପପୁର ଯାତ୍ରା, ଉଗ୍ରସେନ ସହ ଭେଟ ଏବଂ ଯଶୋଦାଙ୍କ କୋଳରେ କୃଷ୍ଣଙ୍କୁ ଥୋଇ ବିଜୁଳି କନ୍ୟାକୁ ନେଇ ମଥୁରା ଫେରିବା ଦୃଶ୍ୟ ଅଭିନୀତ ହେବ ।