ଶୁଭାଂଶୁ ପଢ଼ୁଥିଲେ ବିଶ୍ବର ସବୁଠୁ ବଡ଼ ସ୍କୁଲରେ : ଜାଣନ୍ତୁ ଶୁଭାଂଶୁଙ୍କ ବାବଦରେ କିଛି ରୋଚକ କଥା

କନକ ବ୍ୟୁରୋ : ମହାକାଶରେ ସଫଳ ଯାତ୍ରା ପରେ, ଗ୍ରୁପ୍ କ୍ୟାପ୍ଟେନ୍ ଶୁଭାଂଶୁ ଶୁକ୍ଳା ଭାରତ ଫେରିଛନ୍ତି । ଯେଉଁଠାରେ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା, ସେ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିଥିଲେ, ଏବେ ଶୁଭାଂଶୁ ଶୁକ୍ଳା ତାଙ୍କ ସହର ଲକ୍ଷ୍ନୌରେ ପହଞ୍ଚିବେ ଯେଉଁଠାରେ ତାଙ୍କୁ ସ୍ୱାଗତ କରିବା ପାଇଁ ପ୍ରସ୍ତୁତି ଚାଲିଛି । ଶୁଭାଂଶୁ ଶୁକ୍ଳା ଯେଉଁଠାରେ ପାଠପଢ଼ା ସାରିଥିଲେ, ସେହି ସିଟି ମୋଣ୍ଟେସୋରି ସ୍କୁଲରେ ମଧ୍ୟ ତାଙ୍କୁ ସ୍ୱାଗତ କରିବା ପାଇଁ ପ୍ରସ୍ତୁତି ଚାଲିଛି । ସ୍କୁଲରେ ତାଙ୍କୁ ପାରମ୍ପରିକ ଢଙ୍ଗରେ ସ୍ୱାଗତ କରାଯିବ, ଯେଉଁଠାରେ ସେ ଛାତ୍ରଛାତ୍ରୀଙ୍କ ସହିତ ଭାବ ବିନିମୟ କରିବେ ଏବଂ ତାଙ୍କର ଅଭିଜ୍ଞତା ବାଣ୍ଟିବେ ।

NDA ରୁ କ୍ୟାରିଅର ଆରମ୍ଭ କରିଥିଲେ
ଲକ୍ଷ୍ନୌରେ ଜନ୍ମିତ ଶୁଭାଂଶୁ ଶୁକ୍ଲା ସିଟି ମୋଣ୍ଟେସୋରି ସ୍କୁଲର ଆଲିଗଞ୍ଜ କ୍ୟାମ୍ପସରେ ତାଙ୍କର ସ୍କୁଲ ଶିକ୍ଷା ସମାପ୍ତ କରିଥିଲେ । ୧୯୯୯ କାର୍ଗିଲ ଯୁଦ୍ଧ ସମୟରେ ତାଙ୍କ ଜୀବନରେ ଏକ ମୋଡ଼ ଆସିଥିଲା, ଯାହା ତାଙ୍କୁ ଦେଶ ସେବା କରିବାକୁ ଗଭୀର ଭାବରେ ପ୍ରେରଣା ଦେଇଥିଲା । ଏଥିରୁ ଅନୁପ୍ରାଣିତ ହୋଇ, ସେ ତାଙ୍କ ସ୍ୱପ୍ନକୁ ସାକାର କରିବା ପାଇଁ ଜାତୀୟ ପ୍ରତିରକ୍ଷା ଏକାଡେମୀ (NDA) ପ୍ରବେଶ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ। ସେ ୨୦୦୫ ମସିହାରେ NDA ରୁ କମ୍ପ୍ୟୁଟର ସାଇନ୍ସରେ ବିଏସସି ଡିଗ୍ରୀ ହାସଲ କରିଥିଲେ, ତା’ପରେ ସେ ଭାରତୀୟ ବାୟୁସେନା ଏକାଡେମୀରେ ପାଇଲଟ୍ ତାଲିମ ନେଇଥିଲେ ଏବଂ ୨୦୦୬ ମସିହାରେ ଏକ ଲଢ଼ୁଆ ବିମାନରେ କମିଶନ ହୋଇଥିଲେ ।

ପରେ, ସେ ବେଙ୍ଗାଲୁରୁର ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ସାଇନ୍ସ (IISc)ରୁ ଏରୋସ୍ପେସ୍ ଇଞ୍ଜିନିୟରିଂରେ MTech କରିଥିଲେ। ଶୁକ୍ଲାଙ୍କୁ ୨୦୧୯ ମସିହାରେ ଭାରତର ଗଗନଯାନ ମିଶନ ପାଇଁ ମନୋନୀତ କରାଯାଇଥିଲା, ଯାହା ପରେ ତାଙ୍କୁ ମହାକାଶଚାରୀ ତାଲିମ କାର୍ଯ୍ୟକ୍ରମରେ ସାମିଲ କରାଯାଇଥିଲା । ସେ ରୁଷିଆର ପ୍ରତିଷ୍ଠିତ ୟୁରୀ ଗାଗାରିନ୍ କସମୋନଟ୍ ତାଲିମ କେନ୍ଦ୍ରରେ ତାଲିମ ନେଇଥିଲେ ଏବଂ ୨୦୨୧ ମସିହାରେ ପାଠ୍ୟକ୍ରମ ସମାପ୍ତ କରିଥିଲେ ।

ବିଶ୍ୱର ସର୍ବବୃହତ ସ୍କୁଲ: ସିଟି ମୋଣ୍ଟେସୋରି ସ୍କୁଲ
ଲକ୍ଷ୍ନୌରେ ଅବସ୍ଥିତ 'ସିଟି ମୋଣ୍ଟେସୋରି ସ୍କୁଲ' (CMS) ବିଶ୍ୱର ସବୁଠାରୁ ବଡ଼ ସ୍କୁଲ । ଏହା ଏକ କୋ-ଏଜୁକେସନ୍ ଇଙ୍ଗଲିସ୍ ମିଡିୟମ୍ ପ୍ରାଇଭେଟ୍ ସ୍କୁଲ ଅଟେ। ଏହା ପ୍ରି-ସ୍କୁଲରେ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଶିକ୍ଷା ପ୍ରଦାନ କରାଯାଏ । ଏହି ସ୍କୁଲଟି ୧୯୫୯ ମସିହାରେ ଡକ୍ଟର ଭାରତୀ ଗାନ୍ଧୀ ଏବଂ ଜଗଦୀଶ ଗାନ୍ଧୀଙ୍କ ଦ୍ୱାରା ଆରମ୍ଭ ହୋଇଥିଲା । କେବଳ ଏତିକି ନୁହେଁ, ଏହି ସ୍କୁଲର ନାମ 2019 ମସିହାରୁ ଗିନିଜ୍ ବୁକ୍ ଅଫ୍ ୱାର୍ଲ୍ଡ ରେକର୍ଡରେ ସାମିଲ ହୋଇଛି।