କନକ ବ୍ୟୁରୋ: ଗୁଗଲ ମ୍ୟାପ୍‌ ଦେଖି ରାସ୍ତାରେ ଯାଉଛନ୍ତି କି । ସାବଧାନ ରୁହନ୍ତୁ…ନହେଲେ କେଉଁଠି ଯାଇ ଆପଣ ପହଞ୍ଚିବେ ତାହା କହିବା ମୁସ୍କିଲ । କାରଣ ଅନେକ ସମୟରେ ମ୍ୟାପ୍‌ରେ ରାସ୍ତା ଭୁଲ୍‌ ଦେଖାଉଥିବା କାରଣରୁ ଅନେକ ଲୋକ ହଇରାଣ ହେଉଥିଲେ । ଆଉ ଏବେ ମୁମ୍ବାଇରୁ ଏମିତି ଏକ ଚିତ୍ର ସାମ୍ନାକୁ ଆସିଛି ଯାହାକୁ ନେଇ ଚର୍ଚ୍ଚା ଚାଲିଛି । କାରଣ ମ୍ୟାପ୍‌ ଭରସାରେ ଯାଇ ଜଣେ ଯୁବତୀ ଗାଡ଼ି ସହିତ ନାଳରେ ପଡ଼ିଯାଇଥିଲେ ।

Advertisment

ଟେକ୍ନୋଲୋଜି ଉପରେ ଆମେ ଏବେ ଅତ୍ୟଧିକ ନିର୍ଭରଶୀଳତ ହେଲେଣି । ଯାହା ଜୀବନରୁ ବିପଦରେ ପକାଇପାରେ । ଗୁଗଲ୍ ମ୍ୟାପ୍‌ର ଭୁଲକୁ ଅନୁସରଣ କରି ଜଣେ ଯୁବତୀ ତାଙ୍କ ଅଡି କାର୍ ସହିତ ସିଧାସଳଖ ଏକ ନାଳରେ ଖସି ପଡ଼ିଥିଲେ । ତେବେ ସୌଭାଗ୍ୟବଶତଃ, ଘଟଣାସ୍ଥଳରେ ଉପସ୍ଥିତ ଥିବା ସାମୁଦ୍ରିକ ସୁରକ୍ଷାକର୍ମୀଙ୍କ ତତ୍ପରତା ଯୋଗୁଁ ମହିଳାଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ହେଲେ ଘଟଣାକୁ ନେଇ ଚର୍ଚ୍ଚା କିନ୍ତୁ ବଢିଛି । 

ଏହି ଘଟଣାଟି ଶୁକ୍ରବାର ବିଳମ୍ବିତ ରାତି ପ୍ରାୟ ୧ଟା ସମୟରେ ବେଲାପୁର ଅଞ୍ଚଳରେ ଘଟିଥିଲା । ଖାରଘରରେ ଏକ ସେଲୁନ୍ ବ୍ୟବସାୟ କରୁଥିବା ୨୯ ବର୍ଷୀୟା ଶ୍ଵେତା ଶର୍ମା ନାମକ ମହିଳା ନିଜ ଅଡି କାରରେ ବେଲାପୁରରୁ ଉଲୱେସ୍ଥିତ ନିଜ ଘରକୁ ଫେରୁଥିଲେ । ସେହି ସମୟରେ ପ୍ରବଳ ବର୍ଷା ହେଉଥିଲା ଏବଂ ରାସ୍ତାଘାଟ ଅନ୍ଧାର ଥିଲା । ରାସ୍ତା ଜାଣିବା ପାଇଁ ସେ ଗୁଗଲ୍ ମ୍ୟାପ୍‌ର ସାହାଯ୍ୟ ନେଉଥିଲେ ।

ଗୁଗଲ୍ ମ୍ୟାପ୍ ତାଙ୍କୁ ଧ୍ରୁବତାରା ଜେଟି ନିକଟରେ ଥିବା ପୋଲ ଉପରକୁ ଯିବା ପରିବର୍ତ୍ତେ, ପୋଲ ତଳେ ଥିବା ଏକ ସର୍ଭିସ୍ ରୋଡ୍‌କୁ ଯିବାକୁ ନିର୍ଦ୍ଦେଶ ଦେଇଥିଲା । ମ୍ୟାପ୍ ଉପରେ ସମ୍ପୂର୍ଣ୍ଣ ଭରସା କରି ଶ୍ଵେତା ସେହି ରାସ୍ତାରେ ଆଗକୁ ବଢ଼ିଥିଲେ କିନ୍ତୁ କିଛି ବାଟ ଗଲା ପରେ ରାସ୍ତାଟି ଶେଷ ହୋଇଯାଇଥିଲା ଏବଂ ତାଙ୍କ କାରଟି  ନାଳ ଭିତରକୁ ପ୍ରାୟ ୧୦ ଫୁଟ୍ ତଳକୁ ଖସି ପଡ଼ିଥିଲା ।

ତେବେ ସେଠାରେ ଉପସ୍ଥିତ ଥିବା ସୁରକ୍ଷାକର୍ମୀର ଯବାନମାନେ ଏହି ଦୁର୍ଘଟଣା ସମ୍ପର୍କରେ ଜାଣିପାରିଥିଲେ । ଘଟଣାସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲେ । କାର୍‌ଟି ପାଣିରେ ବୁଡ଼ି ଯାଉଥିବା ବେଳେ ଶ୍ଵେତା କୌଣସି ପ୍ରକାରେ କାରରୁ ବାହାରିଥିଲେ । ଉଦ୍ଧାରକାରୀ ଦଳ ଏକ ବୋଟ୍ ସାହାଯ୍ୟରେ ଯୁବତୀଙ୍କୁ ଉଦ୍ଧାର କରିଥିଲେ । ପରେ ଏକ କ୍ରେନ୍ ସାହାଯ୍ୟରେ କାରଟିକୁ ମଧ୍ୟ ପାଣିରୁ ବାହାର କରାଯାଇଥିଲା ।

ପୁଲିସ୍‌ର ସୂଚନା ଅନୁଯାୟୀ, ଶ୍ଵେତା ସମ୍ପୂର୍ଣ୍ଣ ସୁସ୍ଥ ଅଛନ୍ତି । ଏହି ଘଟଣା ପରେ ସାମାନ୍ୟ ଡରି ଯାଇଥିଲେ । ପୂରା ଘଟଣାରେ ପୁଲିସ୍‌କୁ ଦେଇଥିବା ବୟାନରେ କହିଛନ୍ତି ଯେ ସେ ଗୁଗଲ୍ ମ୍ୟାପ୍‌କୁ ଅନୁସରଣ କରୁଥିବାରୁ ଏହି ଦୁର୍ଘଟଣା ଘଟିଥିଲା ।

ଏହି ଘଟଣା ପରେ ଜେଟି ଅଞ୍ଚଳର ୧୦୦ ମିଟର ପୂର୍ବରୁ ନାଭିଗେସନ୍ ବୋର୍ଡ ଏବଂ ବ୍ୟାରିକେଡ୍ ଲଗାଇବାକୁ ସାମୁଦ୍ରିକ ସୁରକ୍ଷା ବିଭାଗ ନିଷ୍ପତ୍ତି ନେଇଛି । ଏହା କୌଣସି ପ୍ରଥମ ଘଟଣା ନୁହେଁ ବରଂ ପୂର୍ବରୁ ମଧ୍ୟ ଗୁଗଲ୍ ମ୍ୟାପ୍‌ର ଭୁଲ୍ ନିର୍ଦ୍ଦେଶନା ଯୋଗୁଁ ଦେଶର ବିଭିନ୍ନ ସ୍ଥାନରେ ଏଭଳି ଦୁର୍ଘଟଣା ଘଟିଥିବାର ନଜିର ରହିଛି । ଏହି ଘଟଣା ପୁଣି ଥରେ ସତର୍କ କରାଇ ଦେଇଛି ଯେ ଟେକ୍ନୋଲୋଜିର ବ୍ୟବହାର କରିବା ସମୟରେ ନିଜର ବିଚାରବୁଦ୍ଧି ଏବଂ ସତର୍କତା ଅବଲମ୍ବନ କରିବା ଅତ୍ୟନ୍ତ ଜରୁରୀ ଅଟେ । ନଚେତ୍‌ ମଝି ରାସ୍ତାରେ ଆପଣ ବି ହଇରାଣ ହୋଇପାରନ୍ତି ।