ନିର୍ବାଚନ ଜିତିବା ପରେ ଟ୍ରମ୍ପଙ୍କ ପ୍ରଥମ ସମ୍ବୋଧନ; ବନ୍ଦ ହେବ ଯୁଦ୍ଧ, ବିଶ୍ୱକୁ ଫେରିବ ଶାନ୍ତି

କନକ ବ୍ୟୁରୋ : ପୁଣି ଆମେରିକାରେ ଶାସନ କରିବେ ଡୋନାଲ୍ଡ ଟ୍ରମ୍ପ । ଦେଶବାସୀ ତାଙ୍କୁ ଆଉଥରେ ସୁଯୋଗ ଦେଇଥିବାରୁ ସେ ଧନ୍ୟବାଦ ଜଣାଇଛନ୍ତି । ଫଳାଫଳ ଆସିବା ପରେ ଐତିହାସିକ ବିଜୟ କହି ଦେଶବାସୀଙ୍କୁ ସମ୍ବୋଧନ କରି ଧନ୍ୟବାଦ ଜଣାଇବା ସହ ଦେଶ ପାଇଁ କଣ ସବୁ ସ୍ୱପ୍ନ ଦେଖିଛନ୍ତି ତାହା ଜଣାଇଛନ୍ତି ଡୋନାଲ୍ଡ ଟ୍ରମ୍ପ ।

ଡୋନାଲ୍ଡ ଟ୍ରମ୍ପ ଆମେରିକାର ୪୭ତମ ରାଷ୍ଟ୍ରପତି ହେବାକୁ ଯାଉଛନ୍ତି । ଦେଶବାସୀଙ୍କୁ ସମ୍ବୋଧନ କରି ଟ୍ରମ୍ପ କହିଛନ୍ତି, ଆମେରିକାବାସୀଙ୍କୁ ଧନ୍ୟବାଦ । ଏହାପୂର୍ବରୁ ଏପରି ଦୃଶ୍ୟ କେବେ ଦେଖିନଥିଲେ । ଦେଶର ସୀମାକୁ ମଜବୁତ କରିବାଠାରୁ ଆରମ୍ଭ କରି ଦେଶର ସମସ୍ତ ସମସ୍ୟାର ସମାଧାନର ପ୍ରତିଶ୍ରୁତି ଦେଇଛନ୍ତି ଟ୍ରମ୍ପ ।

ଫ୍ଲୋରିଡା ସ୍ଥିତ ୱେଷ୍ଟ ପାମ ବିଚରେ ପହଞ୍ଚି ଅଭିଭାଷଣ ରଖି କହିଛନ୍ତି, ଏହା ହେଉଛି ଇତିହାସର ସବୁଠାରୁ ବଡ଼ ରାଜନୈତିକ ମୁହୂର୍ତ୍ତ । ଆମେ ଭୋଟରଙ୍କ ପାଇଁ ସବୁକିଛି ଠିକ୍ କରିବାକୁ ଯାଉଛୁ । ଏହା ଏକ ରାଜନୈତିକ ବିଜୟ । ଏଭଳି ବିଜୟ ଆମେରିକା କେବେ ଦେଖି ନାହିଁ । ୪୭ତମ ରାଷ୍ଟ୍ରପତି ଭାବରେ ମୁଁ ପ୍ରତିଦିନ ଆପଣଙ୍କ ପାଇଁ ଲଢ଼ିବି । ଆମେରିକା ପାଇଁ ଏହା ଏକ ବଡ଼ ବିଜୟ, ଯାହା ଆମେରିକାକୁ ପୁଣି ମହାନ କରିବ ।

ନଜର ପକାନ୍ତୁ ଟ୍ରମ୍ପ ତାଙ୍କର ବିଜୟୀ ଅଭିଭାଷଣରେ ରଖିଥିବା କିଛି ଗୁରୁତ୍ୱପୂର୍ଣ୍ଣ ବିନ୍ଦୁ ଉପରେ

- ମୋର ପ୍ରତି ମୁହୂର୍ତ୍ତ ଆମେରିକା ପାଇଁ ଉତ୍ସର୍ଗ
- ଏହା ପ୍ରତିଟି ଆମେରିକୀୟର ବିଜୟ
- ଆମେରିକାର ସୀମା ସୁରକ୍ଷିତ ରଖିବୁ 
- ଆମେରିକାକୁ ଅନୁପ୍ରବେଶ ବନ୍ଦ ହେବ
- ଯୁଦ୍ଧ ବନ୍ଦ ହେବ
- ଆମେରିକାକୁ ପୁଣି ମହାନ ଭାବେ ନିର୍ମାଣ କରିବା
- ଏଲନ ମସ୍କଙ୍କ ସ୍ପେଶ ଏକ୍ସର ପ୍ରଶଂସା
- ଆଇଏସଆଇଏସକୁ ରେକର୍ଡ ସମୟ ଭିତରେ ନିପାତ କରାଯାଇଛି
- ଆମେ ଆମର ପ୍ରତିଟି ପ୍ରତିଶ୍ରୁତି ପାଳନ କରିବୁ

ଆମେ ବାଧାବିଘ୍ନକୁ ଅତିକ୍ରମ କରିଥିଲୁ ଯାହାକୁ ସମ୍ଭବ ହେବ ବୋଲି କେହି କେବେ ଭାବି ନଥିଲେ ଏବଂ ବର୍ତ୍ତମାନ ଏହା ସ୍ପଷ୍ଟ ହୋଇଛି ଯେ ଆମେ ସବୁଠାରୁ ଅବିଶ୍ୱସନୀୟ ରାଜନୈତିକ ବିଜୟ ହାସଲ କରିଛୁ । ଏହା ଏକ ରାଜୈନିତକ ବିଜୟ ଯାହା ଆମ ଦେଶ ପୂର୍ବରୁ କେବେ ଦେଖି ନଥିଲା । ଆପଣମାନଙ୍କର ୪୭ତମ ରାଷ୍ଟ୍ରପତି ଏବଂ ୪୫ତମ ରାଷ୍ଟ୍ରପତି ଭାବରେ ମନୋନୀତ ହେବାର ଅସାଧାରଣ ସମ୍ମାନ ପାଇଁ ମୁଁ ଆମେରିକୀୟଙ୍କୁ ଧନ୍ୟବାଦ ଦେବାକୁ ଚାହୁଁଛି । ପ୍ରତ୍ୟେକ ନାଗରିକ, ମୁଁ ଆପଣଙ୍କ ପାଇଁ, ଆପଣଙ୍କ ପରିବାର ଏବଂ ଆପଣଙ୍କ ଭବିଷ୍ୟତ ପାଇଁ ଲଢ଼ିବି ।

ସେ ଆହୁରି କହିଛନ୍ତି, ପ୍ରତ୍ୟେକ ଦିନ ମୁଁ ତୁମ ପାଇଁ ଯୁଦ୍ଧ କରିବି, ମୋ ଶରୀରରେ ପ୍ରତ୍ୟେକ ନିଶ୍ୱାସ ଆପଣଙ୍କ ପାଇଁ ଲଢ଼ିବି । ଯେପର୍ଯ୍ୟନ୍ତ ଆମେ ଶକ୍ତିଶାଳୀ, ନିରାପଦ ଏବଂ ସମୃଦ୍ଧ ଆମେରିକା ଭାବେ ଗଢ଼ି ନହୋଇଛୁ ସେ ପର୍ଯ୍ୟନ୍ତ ମୁଁ ବିଶ୍ରାମ ନେବି ନାହିଁ । ଏମିତି ଏକ ଦେଶ ଗଠନ କରିବା ଯାହା ପାଇବା ପାଇଁ ଆମ ପିଲାମାନେ ଯୋଗ୍ୟ ଏବଂ ଆପଣ ଯୋଗ୍ୟ । ଏହା ବାସ୍ତବରେ ଆମେରିକାର ସୁବର୍ଣ୍ଣ ଯୁଗ ହେବ, ଯାହା ଆମକୁ କରିବାକୁ ହେବ । ଆମେରିକାର ଲୋକଙ୍କ ପାଇଁ ଏହା ଏକ ଚମତ୍କାର ବିଜୟ, ଯାହା ଆମକୁ ଅନୁମତି ଦେଉଛି ପୁଣିଥରେ ଆମେରିକାକୁ ମହାନ କରି ଗଢ଼ିବାକୁ ।