ପୁଣି ଟ୍ରମ୍ପ ଦେଲେ ଟେନସନ; ଭାରତ ଉପରେ ଅଗଷ୍ଟ ପହିଲାରୁ ୨୫% ଶୁଳ୍କ ଲଗାଇବ ଆମେରିକା

କନକ ବ୍ୟୁରୋ : ବନ୍ଧୁତା ଭୂଲିଗଲେ ଆମେରିକା ରାଷ୍ଟ୍ରପତି ଓ ଭାରତ ଉପରେ ଲଗାଇଲେ ଟାରିଫ । ଭାରତ ଉପରେ ୨୫%ଟାରିଫ କଷିଛନ୍ତି । ଅଗଷ୍ଟ ୧ରୁ ଏହି ଟାରିଫ ଲାଗୁ ହେବା ନେଇ ଘୋଷଣା କରିଛନ୍ତି ଡୋନାଲ୍ଡ ଟ୍ରମ୍ପ । କେବଳ ସେତିକି ନୁହେଁ ଭାରତକୁ ଖୋଲା ଧମକ ମଧ୍ୟ ଦେଇଛନ୍ତି । ରୁଷଠୁ ଇନ୍ଧନ ଓ ଯୁଦ୍ଧାସ୍ତ୍ର କିଣିଲେ ଅଧିକ ଶୁଳ୍କ ଦେବାକୁ ପଡିବ । ଭାରତ ଓ ଆମେରିକା ମଧ୍ୟରେ ଟ୍ରେଡ ଡିଲକୁ ନେଇ ଚର୍ଚ୍ଚା ଚାଲିଥିବା ବେଳେ ଟ୍ରମ୍ପ ଏହି ବୟାନ ଦେଇଛନ୍ତି । ଟ୍ରମ୍ପଙ୍କ ଏହି ଆଭିମୁଖ୍ୟ ପାଇଁ ଆଗାମୀ ଦିନରେ ଆମେରିକାକୁ ଭାରତର ରପ୍ତାନି ଗୁରୁତର ପ୍ରଭାବିତ ହେବା ଆଶଙ୍କା ସୃଷ୍ଟି ହୋଇଛି । ଟ୍ରମ୍ପଙ୍କ ଶୁଳ୍କ ଉପରେ ବାଣିଜ୍ୟ ଓ ଶିଳ୍ପ ମନ୍ତ୍ରାଳୟ ପ୍ରତିକ୍ରିୟା ଦେଇ କହିଛି, ଜାତୀୟ ସ୍ୱାର୍ଥର ସୁରକ୍ଷା ପାଇଁ ସରକାର ସମସ୍ତ ପ୍ରକ୍ରାର ଆବଶ୍ୟକୀୟ ପଦକ୍ଷେପ ଗ୍ରହଣ କରିବେ ।

ସୋସିଆଲ ପୋଷ୍ଟ କରି ଟ୍ରମ୍ପ ଲେଖିଛନ୍ତି, ଭାରତ ଆମର ବନ୍ଧୁ, କିନ୍ତୁ ଗତ କିଛି ବର୍ଷ ଧରି ଆମେ ସେମାନଙ୍କ ସହ ଆବଶ୍ୟକ ଅନୁସାରେ କମ୍‌ କାରବାର କରିଛୁ । କାରଣ ସେମାନଙ୍କର ଟାରିଫ ବହୁତ ଅଧିକ, କହିବାକୁ ଗଲେ ଦୁନିଆରେ ସର୍ବାଧିକ । କୌଣସି ଦେଶ ତୁଳନାରେ ଭାରତରେ ସବୁଠାରୁ କଠୋର ଏବଂ ଅଣ-ଆର୍ଥିକ ବାଣିଜ୍ୟ ବାଧା ଅଛି । ଏହାବ୍ୟତୀତ ସେମାନେ ଅଧିକାଂଶ ସାମରିକ ଉପକରଣ ରୁଷଠାରୁ କିଣୁଛନ୍ତି । ଚୀନ୍ ପରେ ଭାରତ ରୁଷର ସବୁଠାରୁ ବଡ଼ ଶକ୍ତି କ୍ରେତା, ତା’ ପୁଣି ଯେଉଁ ସମୟରେ ସମସ୍ତେ ଚାହୁଁଛନ୍ତି ଯେ ୟୁକ୍ରେନରେ ହେଉଥିବା ହତ୍ୟାକୁ ରୋକାଯାଉ ।