କନକ ବ୍ୟୁରୋ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି କ୍ଷମତାକୁ ଫେରିବା ପରେ ବିଶ୍ବରେ ଏକ ଅଶାନ୍ତ ପରିବେଶ ସୃଷ୍ଟି କରିଛନ୍ତି । ଏମିତି ଏକ ନିୟମ ଲାଗୁ କରିଛନ୍ତି ଯେ ସେଥିରେ ନିଜ ଦେଶ ସମେତ ଅନେକ ଦେଶ ଚିନ୍ତାରେ ପଡ଼ିଯାଇଛନ୍ତି । ଟ୍ରମ୍ପ ଟାରିଫ୍ ପ୍ଲାନ୍ ଲଗାଇ ଅଧିକାଂଶ ଦେଶର ବ୍ୟବସାୟକୁ ଘାଟାରେ ପକାଇଛନ୍ତି । ଏହାରି ଭିତରେ ଟ୍ରମ୍ପଙ୍କ ଦୋମୁହାଁ ନୀତି ମଧ୍ୟ ଦେଖିବାକୁ ମିଳିଛି । ଟ୍ରମ୍ପ କେତେବେଳେ ବାଃ ବାଃ ନେବା ପାଇଁ ଦେଶ ଦେଶ ମଧ୍ୟରେ ଚାଲିଥିବା ଯୁଦ୍ଧର ସମାଧାନ ପାଇଁ ମଧ୍ୟସ୍ଥତା କରୁଛନ୍ତି ତ ଆଉ କେଉଁଠି ଗୋଟିଏ ଦେଶର ଶତ୍ରୁ ଦେଶମାନଙ୍କୁ ସପୋର୍ଟ କରି ଦେଶ ଦେଶ ମଧ୍ୟରେ ତିକ୍ତତା ବଢ଼ାଉଛନ୍ତି । ଗୋଟିଏ ଉଦାହରଣ ଦେବାକୁ ଗଲେ, ଟ୍ରମ୍ପ ପ୍ରଥମେ ଭାରତ-ପାକିସ୍ତାନ ମଧ୍ୟରେ ଚାଲିଥିବା ଯୁଦ୍ଧରେ ମଧ୍ୟସ୍ଥତା କରିଥିବା କଥା କହି ବାଃ ବାଃ ନେଇଥିବା ବେଳେ ଅନ୍ୟପଟେ ଭାରତ ବିରୋଧୀ କାର୍ଯ୍ୟ କରି ପାକିସ୍ତାନକୁ ସମର୍ଥନ ଜଣାଉଛନ୍ତି । ଯାହାକୁ ନେଇ ଭାରତ ପାକିସ୍ତାନ ମଧ୍ୟରେ ତିକ୍ତତା ଅଧିକ ବଢ଼ିଯାଇଛି । ସେହିପରି ଏବେ ଆମେରିକାର ଚୀନ୍ ପ୍ରେମ କାହାକୁ ହଜମ ହେଉନି । ଚୀନ ଉପରେ ୧୦୦ ପ୍ରତିଶତ ଟାରିଫ ଲଗାଇଥିବା ଟ୍ରମ୍ପ ଏବେ ଚୀନକୁ କୋଳେଇନେବା ପାଇଁ ଚେଷ୍ଟା କରୁଛନ୍ତି । 

Advertisment

୨୦୧୮ ମସିହାରୁ ଆମେରିକା ଏବଂ ଚୀନ୍ ମଧ୍ୟରେ ବାଣିଜ୍ୟ ଉତ୍ତେଜନା ଖବରରେ ରହିଛି । ଆଉ ଏହି ଉତ୍ତେଜନାର ମୂଳ କାରଣ ହେଉଛି ଦୁଇ ଦେଶ ମଧ୍ୟରେ ବାଣିଜ୍ୟ ସନ୍ତୁଳନ ଏବଂ ଶିଳ୍ପ ନୀତି । ଆଉ ଏହି ଉତ୍ତେଜନାକୁ ଆହୁତି ତେଜିଥିଲା ଟ୍ରମ୍ପଙ୍କ ଟାରିଫ୍ ପ୍ଲାନ୍ । ଏପ୍ରିଲରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଚୀନ୍ ସାମଗ୍ରୀ ଉପରେ ୧୪୫% ଶୁଳ୍କ ବୃଦ୍ଧି କରିଥିଲେ, ଯାହାର ଜବାବରେ ଚୀନ୍ ଆମେରିକା ଆମଦାନୀ ଉପରେ ୧୨୫% ଶୁଳ୍କ ଲଗାଇ ପ୍ରତିକ୍ରିୟା ପ୍ରକାଶ କରିଥିଲା । ଏହା ଏପରି ପରିସ୍ଥିତି ସୃଷ୍ଟି କରିଥିଲା ଯେଉଁଥିରେ ଉଭୟ ଦେଶର ଅର୍ଥନୀତି ଏବଂ ବିଶ୍ୱ ଯୋଗାଣ ଶୃଙ୍ଖଳା ଚାପରେ ପଡ଼ିଥିଲା । ଜୁନ୍ ମାସରେ ଜେନେଭାରେ ଆଲୋଚନା ଏବଂ ଲଣ୍ଡନରେ ବୈଠକ ପରେ, ଉଭୟ ପକ୍ଷ ସାମୟିକ ଭାବରେ ଶୁଳ୍କ ହ୍ରାସ କରିବାକୁ ରାଜି ହୋଇଥିଲେ । ତଥାପି, ଏହି ଆଶ୍ୱସ୍ତି କ୍ଷଣସ୍ଥାୟୀ ପ୍ରମାଣିତ ହେଲା, ଶୁଳ୍କ ଲାଗୁର ସମୟସୀମା ନିକଟତର ହୋଇଆସୁଥିବା ବେଳେ ଟ୍ରମ୍ପଙ୍କ ନିଷ୍ପତ୍ତି ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି । ରିପୋର୍ଟ ଅନୁଯାୟୀ, ହ୍ୱାଇଟ୍ ହାଉସର ଜଣେ ଅଧିକାରୀ ନିଶ୍ଚିତ କରିଛନ୍ତି ଯେ ରାଷ୍ଟ୍ରପତି ଟ୍ରମ୍ପ ଚୀନ୍ ଉପରେ ଶୁଳ୍କ ସମୟସୀମା ୯୦ ଦିନ ବୃଦ୍ଧି କରିବା ପାଇଁ ଏକ କାର୍ଯ୍ୟନିର୍ବାହୀ ଅର୍ଡରରେ ସ୍ୱାକ୍ଷର କରିଛନ୍ତି । 

ନିଆଁରେ ଘିଅ ଢାଳୁଛନ୍ତି ଟ୍ରମ୍ପ 
ଋଷଉପରେ ଥିବା ରାଗ ସୁଝାଇବା ପାଇଁ ଭାରତ ଉପରେ ୫୦ ପ୍ରତିଶତ ଟାରିଫ୍ ଲଗାଇଛନ୍ତି ଟ୍ରମ୍ପ । ଋଷଠୁ ତୈଳ ଏବଂ ଅନ୍ୟାନ୍ୟ ସାମଗ୍ରୀ ଭାରତ କିଣୁଥିବାରୁ ଟ୍ରମ୍ପ ଏପରି କରିଛନ୍ତି । ଆଉ ଋଷ-ଭାରତ ମଧ୍ୟରେ ଫାଟ ସୃଷ୍ଟି କରିବା ପାଇଁ ପ୍ରୟାସ କରିଛନ୍ତି ।

ଆମେରିକାର ରାଷ୍ଟ୍ରପତି ଟ୍ରମ୍ପ ଦାବି କରିଛନ୍ତି, ଋଷିଆରୁ ତେଲ କିଣିବା ପାଇଁ ଭାରତ ଉପରେ ଲଗାଯାଇଥିବା ୫୦ ପ୍ରତିଶତ ଟାରିଫ୍‌ ଋଷିଆର ଅର୍ଥନୈତିକ ଅବସ୍ଥାକୁ ବଡ଼ ଆଘାତ ଦେଇଛି । ହ୍ୱାଇଟ ହାଉସରେ ଏକ ସାମ୍ବାଦିକ ସମ୍ମିଳନୀରେ ଟ୍ରମ୍ପ କହିଛନ୍ତି, ଟାରିଫ ଯୋଗୁଁ ଋଷିଆର ଅର୍ଥନୀତି ବେଶ୍‌ ପ୍ରଭାବିତ ହୋଇଛି । ତେବେ ଏପରି କରି ଭାରତ-ଋଷ ସମ୍ପର୍କରେ ଫାଟ ସୃଷ୍ଟି କରିବାକୁ ଚାହୁଁଛନ୍ତି ଟ୍ରମ୍ପ । ସେହିପରି ଭାରତ ଉପରେ ୫୦ପ୍ରତିଶତ ଟାରିଫ୍ ଲଗାଇ ପାକିସ୍ତାନକୁ କୋଳେଇ ନେଇ ଭାରତ-ପାକିସ୍ତାନ ମଧ୍ୟରେ ଜଳୁଥିବା ନିଆଁକୁ ଆହୁରି ତେଜିଛନ୍ତି