ମୃତ୍ୟୁ ପୂର୍ବରୁ ରତନ ଟାଟାଙ୍କ ଶେଷ ପୋଷ୍ଟ; କହିଲେ, ମୋ ବିଷୟରେ ଚିନ୍ତା କରିବାରୁ ସମସ୍ତଙ୍କୁ ଧନ୍ୟବାଦ..

କନକ ବ୍ୟୁରୋ : ଅମୂଲ୍ୟ ରତ୍ନ ହରାଇଲା ଭାରତ । ଆଉ ନାହାଁନ୍ତି ବିଶିଷ୍ଟ ଶିଳ୍ପପତି ରତନ ନାଭାଲ ଟାଟା । ୮୬ ବର୍ଷ ବୟସରେ ଆଖି ବୁଜିଛନ୍ତି ଏହି ପରୋପକାରୀ ଓ ସମାଜସେବୀ ବ୍ୟକ୍ତିତ୍ୱ । ଶିଳ୍ପ ସମ୍ରାଟ ରତନ ଟାଟାଙ୍କର ଅବର୍ତ୍ତମାନରେ ସୋସିଆଲ ମିଡ଼ିଆ ଆକାଉଣ୍ଟରେ ସେ ସେୟାର କରିଥିବା ଅନ୍ତିମ ପୋଷ୍ଟ ବେଶ ଭାଇରାଲ ହେଉଛି। ତାଙ୍କ ସ୍ୱାସ୍ଥ୍ୟ ନେଇ ଖବର ଉପରେ ସେ ଏକ ପୋଷ୍ଟ ନିଜ ଶୁଭେଚ୍ଛୁଙ୍କ ଉଦ୍ଦେଶ୍ୟରେ ସେୟାର କରିଥିଲେ ।

ପୋଷ୍ଟ ସେୟାର କରି ସେ ଉଲ୍ଲେଖ କରିଥିଲେ ଯେ, ଗଣମାଧ୍ୟମରେ ପ୍ରସାରିତ ସମସ୍ତ ଖବର ଗୁଜବ । ସମସ୍ତଙ୍କୁ ନିଶ୍ଚିତ କରିବାକୁ ଚାହୁଁଛି ଯେ ଏହି ଦାବି ଗୁଡ଼ିକ ଭିତ୍ତିହୀନ । ଏହା ଉପରେ ଧ୍ୟାନ ଦିଅନ୍ତୁ ନାହିଁ । ମୋର ବୟସ ଓ ସ୍ୱାସ୍ଥ୍ୟଗତ ସମସ୍ୟା ଯୋଗୁ ମୁଁ ବର୍ତ୍ତମାନ ରେଗୁଲାର ମେଡିକାଲ ଚେକ୍‌ଅପ୍‌ ପାଇଁ ଆସିଛି । ଚିନ୍ତା କରିବାର କୌଣସି କାରଣ ନାହିଁ । ମୁଁ ଭଲ ମୁଡ୍‌ରେ ଅଛି ଏବଂ ଜନସାଧାରଣ ଓ ଗଣମାଧ୍ୟମକୁ ଭୁଲ ତଥ୍ୟ ପ୍ରସାରିତ ନକରିବାକୁ ଅନୁରୋଧ କରୁଛି । ଏଥିସହ ମୋ’ ବିଷୟରେ ଚିନ୍ତା କରିଥିବାରୁ ସମସ୍ତଙ୍କୁ ଧନ୍ୟବାଦ ଜଣାଉଛି ବୋଲି ସେ ନିଜର ଶେଷ ସୋସିଆଲ ମିଡ଼ିଆ ପୋଷ୍ଟରେ ଉଲ୍ଲେଖ କରିଥିଲେ । ଏହି ସୋସିଆଲ ମିଡ଼ିଆ ପୋଷ୍ଟ ତାଙ୍କ ଜୀବନର ଅନ୍ତିମ ପୋଷ୍ଟ ହୋଇଥିବା ବେଳେ ଏବେ ତାଙ୍କୁ ସାରା ଦେଶବାସୀ ଝୁରୁଛନ୍ତି ।

ବାର୍ଦ୍ଧକ୍ୟଜନିତ ଅସୁସ୍ଥତା ଯୋଗୁଁ ମୁମ୍ବାଇର ବ୍ରିଚ୍ କ୍ୟାଣ୍ଡି ହସ୍ପିଟାଲରେ ଚିକିତ୍ସିତ ହେଉଥିଲେ ରତନ ଟାଟା । ହେଲେ ବୁଧବାର ରାତିରେ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ତାଙ୍କ ଦେହାନ୍ତ ଭାରତୀୟ ଶିଳ୍ପ ଜଗତକୁ ବଡ଼ ଝଟକା ଦେଇଛି । ରତନ ଟାଟା ଏକାଧାରରେ ଥିଲେ ଜଣେ ଶିଳ୍ପପତି ଓ ବଦାନ୍ୟ ବ୍ୟକ୍ତି । ବ୍ୟବସାୟ ସହ ସମାଜର କିଭଳି ଦାୟିତ୍ୱ ନିଆଯାଏ ତାହା ସେ ଶିଳ୍ପ ଜଗତକୁ ଶିଖାଇଥିଲେ । ଭାରତୀୟ ଉଦ୍ୟୋଗକୁ ବିଶ୍ୱ ମଞ୍ଚରେ ପ୍ରତିଷ୍ଠିତ ଓ ଉପସ୍ଥାପିତ କରିବାରେ ଟାଟାଙ୍କ ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ୱୀକାର କରିଛି ସାରା ଦେଶ ଓ ବିଶ୍ୱ ।