କନକ ବ୍ୟୁରୋ: ଚାକିରି କ୍ଷେତ୍ରରେ ବଡ଼ ବିପଦ ଆସୁଥିବା କୁହାଯାଉଛି । କାରଣ ଏକା ସାଙ୍ଗରେ ପ୍ରାୟ ୧୨ ହଜାର ଲୋକଙ୍କ ଚାକିରି ଯାଇପାରେ । ଏମିତିକିଛି ଖବର ଆସିବା ପରେ ପୂରା ଦେଶରେ ଚର୍ଚ୍ଚା ଜୋର ଧରିଛି । କାରଣ ଟିସିଏସ୍‌ରେ ଏମିତି କିଛି ନିଷ୍ପତ୍ତି ହୋଇଥିବା କୁହାଯାଉଛି । ଅବଶ୍ୟ ଏନେଇ କମ୍ପାନି ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିନାହିଁ । ହେଲେ ଜାତୀୟ ଗଣମାଧ୍ୟମରେ ବଡ଼ ଜୋରରେ ଚର୍ଚ୍ଚା ଚାଲିଛି । 

Advertisment

ଭାରତର ସର୍ବବୃହତ ସୂଚନା ପ୍ରଯୁକ୍ତିବିଦ୍ୟା ସେବା ପ୍ରଦାନକାରୀ ସଂସ୍ଥା ଟାଟା କନ୍‌ସଲ୍‌ଟାନ୍ସ ସର୍ଭିସେସ୍ ବା ଟିସିଏସ୍ ଏକ ବଡ଼ ଧରଣର ଛଟେଇ ଯୋଜନା ଘୋଷଣା କରିଛି । କମ୍ପାନି ୨୦୨୬ ମଧ୍ୟରେ ନିଜର ପ୍ରାୟ ୨ ପ୍ରତିଶତ କର୍ମଚାରୀଙ୍କୁ ଛଟେଇ କରିବ, ଯାହାଫଳରେ ୧୨,୦୦୦ରୁ ଅଧିକ କର୍ମଚାରୀ ପ୍ରଭାବିତ ହେବାର ସମ୍ଭାବନା ରହିଛି । କୁହାଯାଉଛି କି, ଏହି ଛଟେଇ ମୁଖ୍ୟତଃ ମଧ୍ୟମ ଏବଂ ବରିଷ୍ଠ ପରିଚାଳନା ସ୍ତରରେ କାର୍ଯ୍ୟରତ କର୍ମଚାରୀଙ୍କୁ ପ୍ରଭାବିତ କରିବ ବୋଲି ଜଣାପଡ଼ିଛି ।
କାହିଁକି ହଠାତ୍‌ ଏମିତି ନିଷ୍ପତ୍ତି ନେଲା କମ୍ପାନି

ଟିସିଏସ୍…ଦେଶରେ ଅନେକ ଲୋକ ଏହି କମ୍ପାନି ଉପରେ ନିର୍ଭର କରନ୍ତି । ଭଲ ଦରମା ସାଙ୍ଗକୁ ଅନେକ ଯୋଜନା ମିଳୁଥିବାରୁ କମ୍ପାନିରେ ଚାକିରି କରିବା ପାଇଁ ଅନେକ ଆଶାୟୀ ଥାଆନ୍ତି । ହେଲେ କମ୍ପାନି ଏବେ ଯେଉଁ ନିଷ୍ପତ୍ତି ନେଇଛି ତାହାକୁ ନେଇ ଚର୍ଚ୍ଚା ଜୋର ଧରିଛି । ଟିସିଏସ୍‌ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ କେ. କୃତିବାସନଙ୍କ ଅନୁଯାୟୀ, ବଦଳୁଥିବା ପ୍ରଯୁକ୍ତିବିଦ୍ୟା, ବିଶେଷକରି AI ର ବ୍ୟାପକ ପ୍ରୟୋଗ ଏବଂ କାର୍ଯ୍ୟଶୈଳୀରେ ପରିବର୍ତ୍ତନକୁ ଦୃଷ୍ଟିରେ ରଖି କମ୍ପାନି ଏହି ନିଷ୍ପତ୍ତି ନେଇଛି । 

କାହା ଚାକିରି ଉପରେ ରହିଛି ବିପଦ ?

କମ୍ପାନିର ଛଟେଇ ନେଇ ସଂପୂର୍ଣ୍ଣ ସୂଚନା ଦିଆଯାଇଛି । କମ୍ପାନି ସ୍ପଷ୍ଟ ଭାବରେ କହିଛି କି, ଏହି ଛଟେଇରେ କନିଷ୍ଠସ୍ତରର କର୍ମଚାରୀମାନେ ପ୍ରଭାବିତ ହେବେ ନାହିଁ ବରଂ ମଧ୍ୟମ ଓ ବରିଷ୍ଠ କର୍ମଚାରୀମାନେ ପ୍ରଭାବିତ ହେବେ । କମ୍ପାନିର କହିବା ଅନୁସାରେ, କର୍ମଚାରୀମାନଙ୍କୁ ନୂତନ ପ୍ରଯୁକ୍ତିବିଦ୍ୟାରେ ଟ୍ରେନିଂ ଦେଇ ପୁନଃନିଯୁକ୍ତି ଦେବାକୁ ଉଦ୍ୟମ କରାଯାଉଛି । କିନ୍ତୁ କିଛି ପଦବୀ ପାଇଁ ଏହାର ଆବଶ୍ୟକତା ନଥିବା ଜଣାପଡିଛି ।

ଯେଉଁମାନେ ଚାକିରି ହରାଇବେ 
ସେମାନଙ୍କ ପାଇଁ କମ୍ପାନି କି ବ୍ୟବସ୍ଥା କରିଛି

କମ୍ପାନି ପକ୍ଷରୁ ହେଉଥିବା ଛଟେଇକୁ ନେଇ କମ୍ପାନି ପ୍ରତିକ୍ରିୟା ବି ରଖିଛି । ସୂଚନା ଅନୁସାରେ, ଯେଉଁ କର୍ମଚାରୀମାନେ ପ୍ରଭାବିତ ହେବେ ସେମାନଙ୍କୁ ସବୁ ପ୍ରକାର ସହାୟତା ମିଳିବ ବୋଲି କମ୍ପାନି ପ୍ରତିଶ୍ରୁତି ଦେଇଛି । ଏହି ସହାୟତା ପ୍ୟାକେଜରେ ଛଟେଇ ପ୍ୟାକେଜ୍, ନୋଟିସ୍ ଅବଧି ପାଇଁ ସମ୍ପୂର୍ଣ୍ଣ ଦରମା, ବର୍ଦ୍ଧିତ ସ୍ୱାସ୍ଥ୍ୟବୀମା ଆଦିକୁ ଅନ୍ତର୍ଭୁକ୍ତ କରାଯିବ । ଏହି ପରିବର୍ତ୍ତନ ପ୍ରକ୍ରିୟାକୁ ଅତ୍ୟନ୍ତ ସାବଧାନତାର ସହ କାର୍ଯ୍ୟକାରୀ କରାଯାଉଛି । ଯାହାଫଳରେ ଗ୍ରାହକ ସେବା ଉପରେ କୌଣସି ପ୍ରତିକୂଳ ପ୍ରଭାବ ପଡ଼ିବ ନାହିଁ ବୋଲି କମ୍ପାନି ପକ୍ଷରୁ କୁହାଯାଇଛି । ହେଲେ ବି କମ୍ପାନି ଛଟେଇ ଘୋଷଣା ପରେ ବଡ଼ ଚର୍ଚ୍ଚା ହେଉଛି ।