ସାମନାକୁ ଆସିଲା ଆତଙ୍କବାଦୀ ଡାକ୍ତରର ଭିଡିଓ; ବିସ୍ଫୋରଣ ପୂର୍ବରୁ ଭିଡିଓରେ କହିଥିଲା ଏମିତି

କନକ ବ୍ୟୁରୋ : ଦିଲ୍ଲୀ ଲାଲକିଲ୍ଲା ନିକଟରେ କାରରେ ବୋମା ବିସ୍ଫୋରଣ କରି ଦେଶକୁ ଆତଙ୍କିତ କରିବାକୁ ଚେଷ୍ଟା କରିଥିବା ଅଲ୍ ଫଲାହ ବିଶ୍ୱବିଦ୍ୟାଳୟର ଆତଙ୍କବାଦୀ ଡାକ୍ତର ଉମରର ଶେଷ ଭିଡିଓ ସାମ୍ନାକୁ ଆସିଛି । ଭିଡିଓରେ ଉମର ମରିବା ପୂର୍ବରୁ ସହିଦ ହେବା ବିଷୟରେ କହୁଛି । ଯାଞ୍ଚ୍ ଏଜେନ୍ସି NIA ଏହି ଭିଡିଓ ଡାକ୍ତର ଉମରର ଘନିଷ୍ଠ ସହଯୋଗୀ ତଥା କ୍ରାଇମ୍ ପାର୍ଟନର୍ ଜସିର ବିଲାଲ୍ ୱାନିର ଫୋନ୍ ଯାଞ୍ଚ୍ ବେଳେ ପାଇଥିଲା । ବିଲାଲକୁ ଏବେ ଦିଲ୍ଲୀ ଅଣାଯାଇଛି । ବିଲାଲକୁ ଆଜି ପଟିୟାଲା ହାଉସ୍ କୋର୍ଟରେ ହାଜର କରାଯିବ । ଏନଆଇଏ ଆତଙ୍କୀକୁ ଜମ୍ମୁ-କାଶ୍ମୀରରୁ ଗିରଫ କରିଛି । ବିଲାଲ ହେଉଛି ଡାକ୍ତର ଉମର ନୱିର ସହଯୋଗୀ ଯିଏ ଦିଲ୍ଲୀରେ ବିସ୍ଫୋରଣ କରି ଆତଙ୍କ ସୃଷ୍ଟି କରିଥିଲା । ସେ ଆତଙ୍କବାଦୀ ଉମର ସହ ମିଶି ବିସ୍ଫୋରଣର ଷଡ଼ଯନ୍ତ୍ର କରିଥିଲା ।

ଆତଙ୍କବାଦୀ ଉମର ନିଜର ଶେଷ ଭିଡିଓ ତିଆରି କରିଥିଲା ଯେଉଁଥିରେ ସେ କହିଥିଲା ‘‘ଆତ୍ମଘାତୀ ଆକ୍ରମଣର ସବୁଠାରୁ ବଡ଼ ସମସ୍ୟା ହେଉଛି ଯେତେବେଳେ ଜଣେ ବ୍ୟକ୍ତି ବିଶ୍ୱାସ କରେ ଯେ ସେ ନିଶ୍ଚିତ ଭାବରେ ଏକ ନିର୍ଦ୍ଦିଷ୍ଟ ସମୟରେ ଏବଂ ସ୍ଥାନରେ ମରିବ, ସେତେବେଳେ ସେ ଏକ ବିପଦପୂର୍ଣ୍ଣ ମାନସିକତାରେ ପ୍ରବେଶ କରେ । ସେ ନିଜକୁ ଏପରି ଏକ ସ୍ଥିତିରେ ରଖେ ଯେଉଁଠାରେ ସେ ବିଶ୍ୱାସ କରେ ଯେ ମୃତ୍ୟୁ ହିଁ ଏକମାତ୍ର ଗନ୍ତବ୍ୟସ୍ଥଳ।"

ଅଧିକ ପଢ଼ନ୍ତୁ : ମନି ଲଣ୍ଡରିଂ ମାମଲାରେ ଅଲ୍‌-ଫଲହାର ପ୍ରତିଷ୍ଠାତା ଜୱାଦ ଅହମ୍ମଦ ସିଦ୍ଦିକି ଗିରଫ

ସୂତ୍ର ଅନୁସାରେ, ଫରିଦାବାଦରେ ଆତଙ୍କବାଦୀଙ୍କ ଶହ ଶହ କିଲୋଗ୍ରାମ ବିସ୍ଫୋରକ ଜବତ ହେବା ପରେ ଏହି ଭିଡିଓଟି ଉତ୍ତୋଳନ କରାଯାଇଥିଲା । ବିଲାଲ ୱାନି ପାକିସ୍ତାନୀ ଆତଙ୍କବାଦୀ ସଂଗଠନ ଜୈଶ ସହିତ ଜଡ଼ିତ ଥିଲା । ନଭେମ୍ବର ୧୦ ତାରିଖରେ ଦିଲ୍ଲୀରେ ଆତ୍ମଘାତୀ ଆକ୍ରମଣ କରିଥିବା ହ୍ୱାଇଟ୍ କଲର୍ ଟେରର୍ ମଡ୍ୟୁଲ୍ ପୂର୍ବରୁ ହମାସ ଶୈଳୀର ଡ୍ରୋନ୍ ଏବଂ ରକେଟ୍ ଆକ୍ରମଣ ଯୋଜନା କରିଥିଲା । ଉମରର ସହଯୋଗୀ ଜସିର ବିଲାଲ ଓରଫ ଦାନିଶ ଗିରଫ ହେବା ପରେ ଏହା ସାମନାକୁ ଆସିଥିଲା । ଡାକ୍ତର ମଡ୍ୟୁଲ୍ ଦିଲ୍ଲୀରେ ଏକ ରକେଟ୍ ଏବଂ ଡ୍ରୋନ୍ ଆକ୍ରମଣ ଯୋଜନା କରିଥିଲା । ଡ୍ରୋନକୁ ଅସ୍ତ୍ର ଭାବରେ ବ୍ୟବହାର କରିବାକୁ ଚେଷ୍ଟା କରିଥିଲା ଏବଂ ବିଲାଲ ଡ୍ରୋନ୍ ପରିବର୍ତ୍ତନ କରିବାରେ ସାମିଲ ଥିଲା ।

ଲାଲକିଲ୍ଲା ସାମ୍ନାରେ ହୋଇଥିବା ବୋମା ବିସ୍ଫୋରଣର ତଦନ୍ତ NIA କରୁଥିବା ବେଳେ ଦେଶବ୍ୟାପୀ ଆତଙ୍କବାଦ ବିରୋଧୀ ୟୁନିଟ୍ ଦେଶ ବିରୁଦ୍ଧରେ ଏହି ଷଡ଼ଯନ୍ତ୍ରର ରହସ୍ୟ ଉନ୍ମୋଚନ କରିବା ପାଇଁ ନିଜସ୍ୱ ତଦନ୍ତ କରୁଛନ୍ତି । ଏହି ତଦନ୍ତ ମଧ୍ୟରୁ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ୧୫୦ ରୁ ଅଧିକ ଫୋନର CDR ଏବଂ ଏନକ୍ରିପ୍ଟେଡ୍ କଲର IP ଠିକଣା, ଯାହାଦ୍ଵାରା ଫୋନ୍ କଲ୍ କେଉଁଠାରୁ ଆସିଛି ଜଣାପଡ଼ିଯିବ ।

ଉମାରର ସହଯୋଗୀ ଆତଙ୍କବାଦୀ ଜସିର ବିଲାଲ ଓରଫ ଦାନିଶର ଗିରଫଦାରୀ ପରେ ୬୮ ଟି ମୋବାଇଲ ନମ୍ବର ଯାଞ୍ଚ କରାଯାଉଛି । ସୂତ୍ର ଅନୁସାରେ ଏହି ନମ୍ବରଗୁଡ଼ିକରେ ପାକିସ୍ତାନ ଏବଂ ତୁର୍କୀରୁ କଲ୍ ଆସିଥିଲା । ନଭେମ୍ବର ୧୦ ତାରିଖରେ ଦିଲ୍ଲୀରେ ବିସ୍ଫୋରଣ ଘଟାଇଥିବା ହ୍ବାଇଟ୍ କଲର ଆତଙ୍କବାଦୀ ମଡ୍ୟୁଲ୍ ଆତଙ୍କବାଦୀ ସଂଗଠନ ହମାସ ପରି ଡ୍ରୋନ୍ ଏବଂ ରକେଟ୍ ଆକ୍ରମଣ ଯୋଜନା କରିଥିଲା ।