ସରିନଥିଲା ଅଭିନୟ, ଲିଭିଗଲା ରାମଙ୍କ ଜୀବନ ; ରାମଲୀଳା ମଞ୍ଚରେ ଅଘଟଣ

ମଞ୍ଚରେ ରାମଙ୍କ ମୃତ୍ୟୁ । ସରିନଥିଲା ଦୃଶ୍ୟ, ଲିଭିଗଲା ଜୀବନଦୀପ । ସାମ୍ନାକୁ ଆସିଛି ବିଚଳିତ କଲା ଭଳି କିଛି ଭିଡିଓ । ରାମଲୀଳାରେ ଅଭିନୟ କରୁଥିବା ବେଳେ ହାର୍ଟଆଟାକରେ ରାମ ଚରିତ୍ରରେ ଥିବା କଳାକାରଙ୍କ ମୃତ୍ୟୁ ହୋଇଛି ।

ନୂଆଦିଲ୍ଲୀ ସାହଦରାରେ ରାମଲୀଳା ମଞ୍ଚରେ ଅସୁସ୍ଥ ଅନୁଭବ କରିଥିଲେ ରାମ ଚରିତ୍ରରେ ଅଭିନୟ କରୁଥିବା କଳାକାର ସୁଶୀଲ କୌଶିକ । ତାଙ୍କୁ ତୁରନ୍ତ ଡାକ୍ତରଖାନା ନିଆଯାଇଥିଲା । ସେଠାରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର ।

ଏପରି ଏକ ଘଟଣାକୁ ନେଇ ଚର୍ଚ୍ଚା ବଢ଼ିଛି । ମଞ୍ଚରେ ଅଭିନୟ କରୁଥିବା ବେଳେ ହୃଦଘାତ ଯୋଗୁଁ ଅସୁସ୍ଥ ଅନୁଭବ କରିଥିଲେ । ଏବଂ ମଞ୍ଚ ପଛପଟକୁ ଚାଲିଯାଇଥିଲେ  ସୁଶୀଲ କୌଶିକ । ଏହା ଦେଖି ଅନ୍ୟ କଳାକାରଙ୍କ ସମେତ ଦର୍ଶକ ବିଚଳିତ ହୋଇପଡ଼ିଥିଲେ । ଏବଂ ତାଙ୍କ ପାଖକୁ ଯାଇଥିଲେ । ତାଙ୍କ ଅବସ୍ଥା ଦେଖି ତାଙ୍କୁ ତୁରନ୍ତ ଡାକ୍ତରଖାନାକୁ ନିଆଯାଇଥିଲା । ସେଠାରେ ୫୪ବର୍ଷୀୟ ସୁଶୀଲ କୌଶିକଙ୍କୁ ମୃତ ଘୋଷିତ କରାଯାଇଛି ।

ଦୀର୍ଘ ୩୨ ବର୍ଷ ଧରି ରାମଲୀଳାରେ ରାମ ଭାବେ ଅଭିନୟ କରୁଥିଲେ ସୁଶୀଲ । ଶେଷରେ ଏହି ରାମଲୀଳା ମଞ୍ଚରେ ହିଁ ତାଙ୍କର ଜୀବନଦୀପ ଲିଭିଯାଇଛି ।