କନକ ବ୍ୟୁରୋ : ଉତ୍ତରକାଶୀରେ ଦୁଇ ଦିନ ତଳେ ଆସିଥିବା ଅଚାନକ ପ୍ରଳୟଙ୍କରୀ ବନ୍ୟାରେ ଧରାଲି ଗାଁ ଓ ଆଖପାଖ ଅଞ୍ଚଳର ଶତାଧିକ କୋଠା ଓ ରାସ୍ତାଘାଟ ନିଶ୍ଚିହ୍ନ ହୋଇଯାଇଛି । ଇସ୍ରୋ ଉପଗ୍ରହରୁ ନିଆଯାଇଥିବା ଚିତ୍ର ଏବେ ସାମ୍ନାକୁ ଆସିଛି । ଏଥିରେ ପୂର୍ବର ଓ ପରର ଭୟଙ୍କର ସ୍ଥିତି ଦେଖିବାକୁ ମିଳିଛି । ଭୂସ୍ଖଳନ ପୂର୍ବରୁ ଧରାଲିରେ ସ୍ଥିତି ସ୍ବାଭାବିକ ଥିଲା । କିନ୍ତୁ ଏହା ପରର ଚିତ୍ର ଛାତି ଥରାଇ ଦେଲାଭଳି ହୋଇଛି ।

Advertisment

ପୂରା ଧରାଲି ଗାଁ ମାଟି ତଳେ ଦବି ରହିଛି । ଅନେକ ଘର, କୋଠା ଓ ହୋଟେଲ , ଗାଡି ମୋଟର ଦବି ରହିଛି । ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ବିଶେଷଜ୍ଞମାନେ କହିଛନ୍ତି ଯେ ସେମାନେ ଗ୍ଲେସିୟର ଭୁଶୁଡ଼ିବା ଆଶଙ୍କାକୁ ଅନୁଧ୍ୟାନ କରୁଛନ୍ତି  । ଧରାଲି କ୍ଷୟକ୍ଷତି ଅତି ଭୀଷଣ ବୋଲି ଆକଳନ କରାଯାଇଛି । ନ୍ୟାସନାଲ ରିମୋଟ୍ ସେନ୍ସିଂ ସେଣ୍ଟର ସ୍ୟାଟେଲାଇଟ୍ ଚିତ୍ରରେ ଦେଖିବାକୁ ମିଳିଛି ଯେ  ଉତ୍ତରାଖଣ୍ଡର ଉପର ମୁଣ୍ଡର ବନ୍ୟା ଯୋଗୁ ଆବର୍ଜନାର ବିଶାଳ ପାହାଡ଼ ସୃଷ୍ଟି ହୋଇଛି । ଏକ ବିରାଟ ଅଞ୍ଚଳ ଆବର୍ଜନାରେ ଭରିଯାଇଛି । ଭାଗୀରଥି ଏବଂ କ୍ଷୀର ଗଙ୍ଗା ନଦୀର ଏକ ବଡ଼ ଅଂଶ ଓ ପାର୍ଶ୍ବବର୍ତ୍ତୀ ଅଞ୍ଚଳରେ କୋଠା ଓ ରାସ୍ତାଘାଟ ସବୁକିଛି  ଆବର୍ଜନାରେ ପୋତି ହୋଇଯାଇଛି ।