ଚିନ୍ତାରେ ରାଜନୈତିକ ଦଳ; ବିହାର ଭୋଟର୍ ତାଲିକାରୁ ବାଦ୍ ପଡ଼ିଲେ ୫୨ ଲକ୍ଷ

କନକ ବ୍ୟୁରୋ: ବିହାର ବିଧାନସଭା ନିର୍ବାଚନ ପୂର୍ବରୁ ରଜନୈତିକ ଦଳକୁ ବଡ଼ ଝଟକା ଲାଗିଛି । ବିହାରରେ ଏବେ ଚାଲିଥିବା ସ୍ବତନ୍ତ୍ର ଭୋଟର ତାଲିକା ସଂଶୋଧନ ପ୍ରକ୍ରିୟାରେ ୫୨ ଲକ୍ଷ ଭୋଟରଙ୍କ ନାଁ ତାଲିକାରୁ ବାଦ୍ ଦିଆଯାଇଛି । କମିସନ କହିଛନ୍ତି, ତାଲିକାରୁ ବାଦ୍ ପଡ଼ିଥିବା ଏହି ୫୨ ଲକ୍ଷ ଭୋଟରଙ୍କ ମଧ୍ୟରୁ ୧୮ ଲକ୍ଷ ଭୋଟରଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ୨୬ ଲକ୍ଷ ଭୋଟର ଅନ୍ୟ ନିର୍ବାଚନମଣ୍ଡଳୀକୁ ଯାଇଥିବା ବେଳେ ୭ ଲକ୍ଷ ଭୋଟର ଏକାଧିକ ସ୍ଥାନରେ ସେମାନଙ୍କ ନାଁ ପଂଜିକୃତ କରିଛନ୍ତି ।

ବିହାରରେ ‘ଏସ୍‌ଇଆର୍’ ପ୍ରକ୍ରିୟା ତ୍ବରାନ୍ବିତ ହୋଇଛି । କାରଣ ଅଗଷ୍ଟ ୧ ତାରିଖରେ ଚିଠା ଇଲେକ୍ଟୋରାଲ୍ ରୋଲ୍ ଜାରି ହେବାକୁ ଥିବାବେଳେ ଏଥିରେ ସମସ୍ତ ଯୋଗ୍ୟ ଭୋଟରଙ୍କୁ ସାମିଲ କରାଇବାପାଇଁ ଉଦ୍ୟମ ଜାରି ରହିଛି ବୋଲି ନିର୍ବାଚନ କମିସନ ଏକ ବିବୃତି ଜାରି କରି କହିଛନ୍ତି । ତେବେ ତାଲିକାରୁ ଯୋଗ୍ୟ ଭୋଟର ବାଦ୍ ପଡ଼ିପାରନ୍ତି ବୋଲି ବିରୋଧୀମାନେ ଅଭିଯୋଗ କରୁଥିବାବେଳେ ନିର୍ବାଚନ କମିସନ୍ ତ୍ରୁଟି ସଂଶୋଧନର ସୁଯୋଗ ମିଳିବା ନେଇ ପ୍ରତିଶ୍ରୁତି ଦେଇଛନ୍ତି । ଚିଠା ତାଲିକାରେ ସମସ୍ତ ଯୋଗ୍ୟ ଭୋଟରଙ୍କୁ ସାମିଲ କରାଇବା ନେଇ ଉଦ୍ୟମ ଜାରି ରହିଥିବା କମିସନ୍ କହିଛନ୍ତି ।

କମିସନ ପକ୍ଷରୁ ଜାରି ହୋଇଥିବା ବିବୃତି ଅନୁଯାୟୀ ଏହି ସଂଶୋଧନ ପ୍ରକ୍ରିୟାରେ ୧ ଲକ୍ଷ ବୁଥ୍ ସ୍ତରୀୟ ଅଫିସର୍ ୧୨ ରାଜନୈତିକ ଦଳରୁ ୪ ଲକ୍ଷ ସ୍ଵେଚ୍ଛାକର୍ମୀ ଏବଂ ଦେଢ଼ ଲକ୍ଷ ବୁଥସ୍ତରୀୟ ପ୍ରତିନିଧି ସହଯୋଗ କରୁଛନ୍ତି । ସେହିପରି ଯେଉଁ ଭୋଟର ସେମାନଙ୍କ ଫର୍ମ ଦାଖଲ କରିନାହାନ୍ତି ଏବଂ ସେମାନଙ୍କ ଠିକଣାରେ ଉପଲବ୍ଧ ହୋଇନାହାନ୍ତି ସେମାନଙ୍କ ସହ ଯୋଗାଯୋଗ କରାଯାଉଛି ବୋଲି କମିସନ କହିଛନ୍ତି । ୨୧.୩୬ ଲକ୍ଷ ଭୋଟରଙ୍କ ଫର୍ମ ମିଳିନଥିବାରୁ ମୁଖ୍ୟ ନିର୍ବାଚନ ଅଫିସର, ଜିଲ୍ଲା ନିର୍ବାଚନ ଅଫିସର, ଇଲେକ୍ଟୋରାଲ ରେଜିଷ୍ଟ୍ରେସନ ଅଫିସର୍ (ଇଆରକ୍ୟୁ) ଏବଂ ବୁଥସ୍ତରୀୟ ଅଧିକାରୀ ମଧ୍ୟ ରାଜନୈତିକ ଦଳ ମାନଙ୍କ ସହ ବୈଠକ କରିଛନ୍ତି । ତେବେ ଭୋଟର ତାଲିକାରେ ସଂଶୋଧନ ପାଇଁ ଅଗଷ୍ଟ ୧ରୁ ସେପ୍ଟେମ୍ବର ୧ ପର୍ଯ୍ୟନ୍ତ ମାସେ ସମୟ ପ୍ରଦାନ କରାଯିବ ।