କନକ ବ୍ୟୁରୋ : ଚାଲିପାରୁନି ସଂସଦ । ନଷ୍ଟ ହେଉଛି କୋଟି କୋଟ ଟଙ୍କା । ବିରୋଧୀଙ୍କ ହୋହାଲ୍ଲା ଯୋଗୁ ୩ ଦିନ ହେଲା ଚଳିତ ମୌସୁମୀ ଅଧିବେସନ ଚାଲିପାରୁନି । ଯେଉଁଥିପାଇଁ ଭାରତକୁ ୪୬ କୋଟିରୁ ଅଧିକ ଟଙ୍କାର କ୍ଷତି ସହିବାକୁ ପଡିଛି । କାରଣ ସଂସଦର ଉଭୟ ଗୃହ ଲୋକସଭା ଓ ରାଜ୍ୟସଭା ଚଳାଇବା ପାଇଁ ପ୍ରତି ମିନିଟକୁ ଅଢେଇ ଲକ୍ଷ ଟଙ୍କା ଖର୍ଚ୍ଚ କରିବାକୁ ପଡେ ।

Advertisment

ବିହାରର ଭୋଟର ସଂଶୋଧନ ପାଇଁ ଚାଲିଥିବା ସ୍ୱତନ୍ତ୍ର ଇନଣ୍ଟେନସିଭ ରିଭିଜନ(ଏସଆଇଆର)କୁ ନେଇ ବିରୋଧୀ ସରକାରଙ୍କୁ ଘେରିଛନ୍ତି । ରାସନ କାର୍ଡ, ଆଧାର କାର୍ଡ ଏବଂ ଭୋଟର କାର୍ଡକୁ ବୈଧ ପ୍ରମାଣପତ୍ର ତାଲିକାରୁ ନିର୍ବାଚନ କମିଶନ ବାଦ ଦେବାକୁ ନେଇ ବିରୋଧୀ ସଂସଦରେ ତୁମ୍ବିତୋଫାନ କରୁଛନ୍ତି । ଏଥିସହ ପହଲଗାମ ଆତଙ୍କୀ ଆକ୍ରମଣ ଏବଂ ଅପରେସନ ସିନ୍ଦୂର ଉପରେ ଆଲୋଚନା କରିବାକୁ ବିରୋଧୀ ଜିଦ ଧରିଥିବାରୁ ସଂସଦ ଚାଲିପାରୁନାହିଁ । ଫଳରେ ୩ ଦିନରେ ଆମ ଦେଶର ୪୬ କୋଟି ଟଙ୍କା ନଷ୍ଟ ହୋଇଛି । ଆମେ ଦେଉଥିବା ଟାକ୍ସରୁ ଏହି ଟଙ୍କା ଖର୍ଚ୍ଚ ହେଉଥିଲେ ମଧ୍ୟ ନେତା ଏଥିପ୍ରତି ଗୁରୁତ୍ୱ ଦେଉନାହାଁନ୍ତି ।

୩ ଦିନରେ ୪୬ କୋଟି କ୍ଷତି । ସଂସଦ ଚଳାଇବା ପାଇଁ ପ୍ରତି ମିନିଟ୍‌କୁ ୨.୫ ଲକ୍ଷ ଟଙ୍କା ଖର୍ଚ୍ଚ ହୁଏ । ଲୋକସଭା ପାଇଁ ପ୍ରତି ମିନିଟ୍‌କୁ ୧.୨୫ ଲକ୍ଷ ଟଙ୍କା ଖର୍ଚ୍ଚ । ରାଜ୍ୟସଭା ପାଇଁ ମିନିଟ୍‌କୁ ଖର୍ଚ୍ଚ ୧.୨୫ ଲକ୍ଷ ଟଙ୍କା । ବିରୋଧୀଙ୍କ ହଙ୍ଗାମା ଯୋଗୁ ସୋମବାରଠୁ ସଂସଦ ଠିକ୍‌ ଭାବେ ଚାଲିପାରୁନି । ଏକ ଘଣ୍ଟା ଲଞ୍ଚ୍‌ ସହ ପ୍ରତିଦିନ ସଂସଦ ୬ ଘଣ୍ଟା ଚାଲିବାର ନିୟମ ରହିଛି । ତିନି ଦିନରେ ସଂସଦ ୧୮ ଘଣ୍ଟା ଚାଲିବାର ଥିଲା । କିନ୍ତୁ ରାଜ୍ୟସଭା ୪.୪ ଘଣ୍ଟା, ଲୋକସଭା ମାତ୍ର ୫୪ ମିନିଟ୍‌ ଚାଲିଛି । ରାଜ୍ୟସଭା ୮୧୬ ମିନିଟ୍‌ ଚାଲିନପାରିବାରୁ ୧୦.୨ କୋଟି କ୍ଷତି ହୋଇଛି । ଲୋକସଭା ୧୦୨୬ ମିନିଟ୍‌ ଚାଲିନପାରିବାରୁ ୧୨.୮୩ କୋଟି ଟଙ୍କା କ୍ଷତି ହୋଇଛି । ସଂସଦ ଚାଲିନପାରିବାରୁ ତିନି ଦିନରେ ୨୩ କୋଟି ଟଙ୍କା କ୍ଷତି ସହିବାକୁ ପଡ଼ିଛି ।

୨୦୧୨ରେ ସଂସଦର ପ୍ରତି କାର୍ଯ୍ୟକାରୀ ମିନିଟ୍‌ରେ ୨.୫ ଲକ୍ଷ ଟଙ୍କା ଖର୍ଚ୍ଚ ହେଉଥିଲା । ଏନେଇ ସେତେବେଳର ସଂସଦୀୟ ବ୍ୟାପାର ମନ୍ତ୍ରୀ ପୱନ ବଂଶଲ ସୂଚନା ଦେଇଥିଲେ । ଏବେ ଏହି ଅର୍ଥ ରାଶି ଦୁଇ ଗୁଣା ବୃଦ୍ଧି ପାଇଥିବା ଆକଳନ କରାଯାଇଛି । ସେହି ଅନୁଯାୟୀ ହିସାବ କଲେ ୩ ଦିନରେ ଦେଶର ୪୬ କୋଟିରୁ ଅଧିକ ଟଙ୍କା କ୍ଷତି ହୋଇଛି । ସଂସଦ ଚାଲିନପାରିବାରୁ ସଂସଦୀୟ ବ୍ୟାପାର ମନ୍ତ୍ରୀ ବିରୋଧୀଙ୍କୁ ସମାଲୋଚନା କରିଛନ୍ତି । ବିହାରରେ ୫୨ ଲକ୍ଷ ଭୋଟ ବାଦ୍‌ ପଡ଼ିବା ‘ଗଣତନ୍ତ୍ର ହତ୍ୟା’ କହିଛନ୍ତି ବିରୋଧୀ ।