ପାକିସ୍ତାନକୁ ଘାରିଛି ଆକ୍ରମଣର ଭୟ; ରାତି ଅଧରେ ବସୁଛି ବୈଠକ

କନକ ବ୍ୟୁରୋ : ପୁଣି ପାକିସ୍ତାନରେ ବସିଥିଲା ବଡ଼ ବୈଠକ । ପାକିସ୍ତାନର ଉପପ୍ରଧାନମନ୍ତ୍ରୀ ତଥା ବୈଦେଶିକ ମନ୍ତ୍ରୀ ଇଶାକ ଦାର ଓ ଇଣ୍ଟର-ସର୍ଭିସେସ ପବ୍ଲିକ ରିଲେସନ୍ସ ବା ଆଇଏସପିଆରର ମହାନିର୍ଦ୍ଦେଶକ ଲେଫ୍ଟନାଣ୍ଟ ଜେନେରାଲ ଅହମଦ ଶରିଫ ଚୌଧୁରୀ ମିଳିତ ସାମ୍ବାଦିକ ସମ୍ମିଳନୀରେ ଭାରତ ଅଧୀନସ୍ଥ ଜାମ୍ମୁ ଓ କାଶ୍ମୀରର ପହଲଗାମରେ ଏପ୍ରିଲ ୨୨ରେ ହୋଇଥିବା ଆତଙ୍କବାଦୀ ଆକ୍ରମଣକୁ ନେଇ ବଡ ବୟାନ ଦେଇଛନ୍ତି ।

ପାକିସ୍ତାନରେ ବସୁଛି ଘନଘନ ବୈଠକ !

ଇଶାକ ଦାର ଭାରତର ଅଭିଯୋଗକୁ ସମ୍ପୂର୍ଣ୍ଣ ଭାବେ ଖଣ୍ଡନ କରି କହିଛନ୍ତି ପହଲଗାମ ଘଟଣା ସହ ପାକିସ୍ତାନର କୌଣସି ସମ୍ପର୍କ ନାହିଁ । ଭାରତ ଏହି ଅଭିଯୋଗ ମାଧ୍ୟମରେ ଅଞ୍ଚଳରେ ଅସ୍ଥିରତା ସୃଷ୍ଟି କରିବାକୁ ଚେଷ୍ଟା କରୁଛି । ଡିଜି ଆଇଏସପିଆର ଚୌଧୁରୀ ମଧ୍ୟ ଭାରତ ଉପରେ ପାକିସ୍ତାନରେ ଆତଙ୍କବାଦୀ କାର୍ଯ୍ୟକଳାପକୁ ପ୍ରୋତ୍ସାହନ ଦେବାର ଅଭିଯୋଗ କରି କହିଛନ୍ତି, ଆମେ ସମସ୍ତ ପ୍ରକାର ସମ୍ଭାବ୍ୟ ଆକ୍ରମଣ ପାଇଁ ପ୍ରସ୍ତୁତ । ପାକିସ୍ତାନ ନିଜର ସାର୍ବଭୌମତ୍ଵ ରକ୍ଷା କରିବ ।

ଉପ ପ୍ରଧାନମନ୍ତ୍ରୀ ଦାର କହିଛନ୍ତି, ଆମେ ପ୍ରଥମେ କୌଣସି ଆକ୍ରମଣ କରିବୁ ନାହିଁ । କିନ୍ତୁ ଭାରତ ଯଦି କୌଣସି ପଦକ୍ଷେପ ନିଏ ତାହାର ଦୃଢ଼ ଜବାବ ଦିଆଯିବ । ସାମ୍ବାଦିକ ସମ୍ମିଳନୀ ଭାରତ ଓ ପାକିସ୍ତାନ ମଧ୍ୟରେ ବଢ଼ୁଥିବା ଉତ୍ତେଜନା ମଧ୍ୟରେ ହୋଇଛି । ଭାରତ ପହଲଗାମ ଆକ୍ରମଣ ପରେ ପାକିସ୍ତାନ ବିରୋଧରେ କଡ଼ା ନୀତି ଗ୍ରହଣ କରିଛି ଇଣ୍ଡସ ଜଳ ଚୁକ୍ତି ସ୍ଥଗିତ, ଭିସା ନିଷେଧ ଓ କୂଟନୈତିକ କର୍ମଚାରୀ ହ୍ରାସ ଆଦି । ପାକିସ୍ତାନ ଜାତିସଂଘ ଓ ଅନ୍ୟ ଅନ୍ତର୍ଜାତୀୟ ମଞ୍ଚରେ ଏହି ବିଷୟ ଉଠାଇବାକୁ ଚେଷ୍ଟା କରୁଛି, ଯେଉଁଠାରେ ପାକିସ୍ତାନ ନିଜକୁ ନିରୀହ ଦର୍ଶାଇବାକୁ ଚାହୁଛି ।