କନକ ବ୍ୟୁରୋ : ସଂସଦ ମୌସୁମୀ ଅଧିବେଶନରେ ଲୋକସଭାରେ ଅପରେସନ ସିନ୍ଦୂର ଉପରେ ଆଲୋଚନା ଆରମ୍ଭ ହୋଇଛି । ୧୬ ଘଣ୍ଟା ଧରି ଆଲୋଚନା ଚାଲିବ । ତେବେ ଆଜି ଅଧିବେଶନ ଆରମ୍ଭରୁ ବିହାର ଭୋଟର ତାଲିକା ସଂଶୋଧନ ଉପରେ ଆଲୋଚନା ଦାବି କରି ବିରୋଧୀ ହଟ୍ଟଗୋଳ କରିବାରୁ ଗୃହ ବାରମ୍ୱାର ମୁଲତବୀ ରହିଥିଲା ।

Advertisment

ଏପ୍ରିଲ ୨୨ ତାରିଖରେ ଜମ୍ମୁ-କାଶ୍ମୀର ପହଲଗାମରେ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ପରେ ସଂସଦର ସ୍ୱତନ୍ତ୍ର ଅଧିବେଶନ ଡାକି ଆଲୋଚନା କରିବାକୁ ବିରେଧୀ ବାରମ୍ୱାର ଦାବି କରିଥିଲେ । ପରବର୍ତ୍ତୀ ଦିନଗୁଡ଼ିକ ମଧ୍ୟ ଘଟଣାବହୁଳ ଥିଲା । ଭାରତର ଅପରେସନ ସିନ୍ଦୂର, ଅସ୍ତ୍ରବିରତି, ଅସ୍ତ୍ରବିରତି ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଓ ଯୁଦ୍ଧରେ ୪ଟି ଜେଟ୍ ବିମାନ ଖସିଥିବା ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାରମ୍ବାର ଦାବି  ଆଦି ପ୍ରସଙ୍ଗରେ ବିରୋଧୀ ପ୍ରଶ୍ନ ଉଠାଇଥିଲେ । ସଂସଦର ସ୍ୱତନ୍ତ୍ର ଅଧିବେଶନ ଡାକିବାକୁ ଦାବି କରାଯାଇଥିଲା । ଏହା ମଧ୍ୟରେ ସଂସଦର ମୌସୁମୀ ଅଧିବେଶନ ଜୁଲାଇ ୨୧ରୁ ଆରମ୍ଭ ହୋଇଥିଲା । ବିଭିନ୍ନ ପ୍ରସଙ୍ଗରେ ଆଲୋଚନା କରିବାକୁ ବିରୋଧୀ ଦାବି କରି ହଟ୍ଟଗୋଳ କରିବାରୁ ସଂସଦ ସ୍ୱାଭାବିକ ଚାଲି ପାରିନଥିଲା । ବାରମ୍ବାର ମୁଲତବୀ ରହିଥିଲା ଉଭୟ ଗୃହ । ଶେଷରେ ସଂସଦର ମୌସୁମୀ ଅଧିବେଶନର ଷଷ୍ଠଦିନରେ ଲୋକସଭାରେ ଅପରେସନ ସିନ୍ଦୂର ଉପରେ ଆଲୋଚନା ଆରମ୍ଭ ହୋଇଛି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆଲୋଚନା ଆରମ୍ଭ କରିଛନ୍ତି । ବିରୋଧୀ ବି ଏଥିରେ ଭାଗ ନେଉଛନ୍ତି ।

ଲୋକସଭାରେ ୧୬ ଘଣ୍ଟା ପାଇଁ ଅପରେସନ ସିନ୍ଦୂର ଉପରେ ଆଲୋଚନା ପାଇଁ ସମୟ ଧାର୍ଯ୍ୟ କରାଯାଇଛି । ସରକାରଙ୍କ ପକ୍ଷରୁ ପ୍ରତିରକ୍ଷା ମନ୍ତ୍ରୀ, ଗୃହମନ୍ତ୍ରୀ, ବୈଦେଶିକ ବ୍ୟାପାର ମନ୍ତ୍ରୀ ପ୍ରମୁଖ ଆଲୋଚନାରେ ଭାଗ ନେଉଛନ୍ତି । ଆସନ୍ତାକାଲି ରାଜ୍ୟସଭାରେ ଆଲୋଚନା କରାଯିବ । ହଟ୍ଟଗେୋଳ ଯୋଗୁ ଆଜି ରାଜ୍ୟସଭା ମୁଲତବି ରହିଛି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପହଲଗାମ ଆକ୍ରମଣ ଓ ଅପରେସନ ସିନ୍ଦୂର ଉପରେ ବିବୃତି ରଖିବାକୁ ବିରୋଧୀ ଦାବି କରିଆସୁଛନ୍ତି । ପ୍ରଧାନମନ୍ତ୍ରୀ ବିବୃତି ରଖିବାର ସମ୍ଭାବନା ରହିଛି ।