କନକ ବ୍ୟୁରୋ : ଅପରେସନ୍ ସିନ୍ଦୂରକୁ ନେଇ ଲୋକସଭାରେ ବଡ଼ ବିତର୍କ । ବିବୃତି ଆରମ୍ଭରୁ ସେନାର ପରାକ୍ରମକୁ ସାଲ୍ୟୁଟ କରିବା ସହ ବିରୋଧୀଙ୍କୁ ସିଧା ଟାର୍ଗେଟ୍ କରିଛନ୍ତି ପ୍ରଧାନମନ୍ତ୍ରୀ ମୋଦୀ । କହିଛନ୍ତି, ଗୃହରେ ଭାରତର ପକ୍ଷ ରଖିବାକୁ ଛିଡ଼ା ହୋଇଛି । ଯେଉଁମାନଙ୍କୁ ଭାରତର ପକ୍ଷ ଦେଖାଯାଉନାହିଁ, ସେମାନଙ୍କୁ ଆଇନ୍ ଦେଖାଇବାକୁ ମୁଁ ଛିଡ଼ା ହୋଇଛି । ଭାରତ ଯେଉଁଭଳି ରଣନୀତି ପ୍ରସ୍ତୁତ କରିଥିଲା, ଠିକ୍ ସେହିଭଳି କାର୍ଯ୍ୟାନୁଷ୍ଠାନ ନେଇଛି । ଏପ୍ରିଲ ୨୨ରେ ମାତ୍ର ୨୨ ମିନିଟରେ ଆମେ ପ୍ରତିଶୋଧ ନେଇଛୁ । ପାକିସ୍ତାନର କୋଣଅନୁକୋଣରେ ଥିବା ଆତଙ୍କୀ ଠିକଣାକୁ ଧ୍ୱଂସ କରିଛୁ । ଯାହା ପରେ ଆତଙ୍କୀଙ୍କ ସର୍ଦ୍ଦାରଙ୍କ ନିଦ ହଜିଯାଇଛି । ଏବେବି ପାକିସ୍ତାନର ଅନେକ ଏୟାରବେସ ଆଇସିୟୁରେ । ଅପରେସନ୍ ସିନ୍ଦୂରକୁ ୧୯୩ ଦେଶ ଆମକୁ ସମର୍ଥନ କରିଛନ୍ତି । କେବଳ ତିନି ଦେଶ ପାକିସ୍ତାନକୁ ସମର୍ଥନ କରିଛନ୍ତି ।

Advertisment

ଲୋକସଭାରେ ଅପରେସନ୍ ସିନ୍ଦୂରକୁ ନେଇ ସରକାର ଓ ବିରୋଧୀ ମଧ୍ୟରେ ଜୋରଦାର ବିତର୍କ । ଅପରେସନ୍ ସିନ୍ଦୂରକୁ ନେଇ ଚୀନ୍ ଓ ପାକ୍ ଅଧିକୃତ କାଶ୍ମୀରକୁ ନେଇ କଂଗ୍ରେସକୁ ଘେରିଛନ୍ତି ଗୃହମନ୍ତ୍ରୀ ଅମିତ ଶାହ । କିପରି ପୂର୍ବତନ ପ୍ରଧାନମନ୍ତ୍ରୀ ଜବାହରଲାଲ ନେହରୁଙ୍କ ଭୁଲ ପାଇଁ ପିଓକେ ଗଠନ ହେଲା, ସେସବୁର ଟିକିନିକି ତଥ୍ୟ ରଖିଛନ୍ତି ଗୃହମନ୍ତ୍ରୀ । କହିଛନ୍ତି, ଯଦି ପିଓକେର ଆଜି କୌଣସି ଅସ୍ତିତ୍ୱ ଅଛି, ତାହା କେବଳ ନେହରୁଙ୍କ ପାଇଁ । ସର୍ଦ୍ଦାର ବଲ୍ଲଭଭାଇ ପଟେଲ ଏହା ବିରୋଧ କରୁଥିଲେ । କିନ୍ତୁ ପଣ୍ଡିତ ନେହରୁ ମାମଲାକୁ ଜାତିସଂଘ ପର୍ଯ୍ୟନ୍ତ ନେଇ ଏହାକୁ ଅନ୍ତର୍ଜାତୀୟ ବିବାଦର ରୂପ ଦେଇଥିଲେ । ଯାହା ପରେ ୧୯୪୮ର କାଶ୍ମୀର ଯୁଦ୍ଧ ବିରତି ହୋଇଥିଲା କହି ଟାର୍ଗେଟ୍ କରିଛନ୍ତି ଅମିତ ଶାହ ।

ଏପଟେ ଅପରେସନ୍ ସିନ୍ଦୂରକୁ ନେଇ ସରକାରଙ୍କୁ ଘନଘନ ଆକ୍ରମଣ କରିଛନ୍ତି ରାହୁଲ ଗାନ୍ଧୀ । କହିଛନ୍ତି, ଅପରେସନ୍ ସିନ୍ଦୂର ଆରମ୍ଭରୁ ହିଁ ଆତ୍ମସମର୍ପଣ କରିଦେଇଥିଲେ ସରକାର । ଯଦି ନରେନ୍ଦ୍ର ମୋଦୀଙ୍କ ଭିତରେ ଇନ୍ଦିରା ଗାନ୍ଧୀଙ୍କ ଭଳି ୫୦ ପ୍ରତିଶତ ସାହସ ଥାଏ, ତାହେଲେ ସର୍ବସମ୍ମୁଖରେ କହିଦିଅନ୍ତୁ ଯେ ଯୁଦ୍ଧବିରତିକୁ ନେଇ ମିଛ କହୁଛନ୍ତି । ଶତ୍ରୁ ସହ ଲଢ଼ିବା ପାଇଁ ସରକାରଙ୍କ ପାଖରେ ଲଢ଼ିବାର କୌଣସି ଇଚ୍ଛାଶକ୍ତି ନଥିଲା ବୋଲି କହିଛନ୍ତି ବିରୋଧୀ ଦଳ ନେତା ।