ମମତାଙ୍କ ପାଇଁ ତ୍ରୀସ୍ତରୀୟ ସୁରକ୍ଷା ବ୍ୟବସ୍ଥା; ସୁରକ୍ଷାରେ ନିୟୋଜିତ ୬ହଜାର ପୋଲିସ

କନକ ବ୍ୟୁରୋ : ଅଭୟା ମୃତ୍ୟୁ ମାମଲାରେ ତେଜିଛି ରାଜନୀତି । ସିବିଆଇ ମାମଲାର ତଦନ୍ତ କରୁଛି । ଇଡି ମଧ୍ୟ ତଦନ୍ତ କରିବା ନେଇ ସୂଚନା ମିଳିଛି । ଯେହେତୁ ଆର.ଜି ମେଡିକାଲ କଲେଜରେ ଆର୍ଥିକ ଅନିୟମିତତା ଅଭିଯୋଗ ରହିଛି । ଅଭିଯୁକ୍ତ ସନ୍ଦୀପ ଘୋଷ କଲେଜର ପ୍ରିନସିପାଲ ଥିବା ବେଳେ ଅନିୟମିତତାର ଅଭିଯୋଗ ରହିଛି । ତେଣୁ ସିବିଆଇ ପରେ ଇଡି ଏହି ମାମଲାରେ ତଦନ୍ତ କରିବାକୁ ଯାଉଛି ।

ଅନ୍ୟପଟେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଇସ୍ତଫା ଦାବି ହୋଇଛି । ପଶ୍ଚିମବଙ୍ଗ ଛାତ୍ର ସମାଜ ନାମକ ଏକ ସଂଗଠନ ମମତାଙ୍କ ଇସ୍ତଫା ଦାବି କରିଛନ୍ତି । ଏଥିପାଇଁ ଆଜି ପଶ୍ଚିମବଙ୍ଗର ସଚିବାଳୟ ତଥା ନବାନ୍ନ ଘେରାଉ କରୁଛନ୍ତି । ଆଉ ମମତାଙ୍କ ସୁରକ୍ଷା ପାଇଁ ନିୟୋଜିତ ହୋଇଛନ୍ତି ୬ ହଜାର ପୋଲିସ ।

ମମତା ହେଉଛନ୍ତି ରାଜ୍ୟର ସ୍ୱାସ୍ଥ୍ୟମନ୍ତ୍ରୀ, ଗୃହମନ୍ତ୍ରୀ ସମେତ ମୁଖ୍ୟମନ୍ତ୍ରୀ । ତେଣୁ ମମତା ଏହି ଘଟଣାରେ ଉତ୍ତରଦାୟିତ୍ୱ ନେଇ ଇସ୍ତଫା ଦିଅନ୍ତୁ ବୋଲି ଦାବି ହେଉଛି । ତେଣୁ ପଶ୍ଚିମବଙ୍ଗ ଛାତ୍ର ସମାଜ ନବାନ୍ନ ମୁହାଁ ହୋଇଛନ୍ତି ଏବଂ ମମତାଙ୍କ ଇସ୍ତଫା ଦାବିରେ ନାରାବାଜି କରୁଛନ୍ତି । ଟ୍ରେନି ମହିଳା ଡାକ୍ତର ଡ୍ୟୁଟିରେ ଥିବା ବେଳେ ଦୁଷ୍କର୍ମ ପରେ ହତ୍ୟାର ଶିକାର ହେଲେ । ଏହାପରେ ସଂପୃକ୍ତ କୋଠା ଉପରେ ହଜାର ହଜାର ଲୋକ ପଶିଗଲେ । ଯେଉଁ ସମୟରେ କି ମମତାଙ୍କ ପୋଲିସ ସୁରକ୍ଷାରେ ନିୟୋଜିତ ଥିଲା । କୁହାଯାଉଛି ଏହି ଭିଡ ହସ୍ପିଟାଲରେ ପ୍ରବେଶ କରି ପ୍ରମାଣ ନଷ୍ଟ କରିବା ପାଇଁ ଉଦ୍ୟମ କରିଥିଲେ ।

ଏହାକୁ ନେଇ ସୁପ୍ରିମକୋର୍ଟ ମଧ୍ୟ କଡ଼ା ଭର୍ତ୍ସନା କରିଛନ୍ତି ମମତା ସରକାରକୁ । ଯେଉଁ ହସ୍ପିଟାଲର ସୁରକ୍ଷା ଦାୟିତ୍ୱରେ ପୋଲିସ, ସେଠାରେ ହଜାର ହଜାର ଲୋକ ପଶିଗଲେ ପୋଲିସ କରୁଥିଲା କଣ । ଏପରି ପ୍ରଶ୍ନ କରିଥିଲେ ପ୍ରଧାନ ବିଚାରପତି । ବଡ଼କଥା ହେଉଛି କେବଳ ଏହି ଗୋଟିଏ ଘଟଣା ନୁହେଁ ଅନେକ ସମୟରେ ପଶ୍ଚିମବଙ୍ଗରେ ଦୁଷ୍କର୍ମ ପରେ ହତ୍ୟା ଘଟୁଛି । ଏହା ପଶ୍ଚିମବଙ୍ଗରେ ଯେପରି ଏକ ସ୍ୱାଭାବିକ ଘଟଣା ପାଲଟିଗଲାଣି । ଅନେକ ସାଧାରଣ ଲୋକ ଭିଡ଼ ହିଂସାର ମଧ୍ୟ ଶିକାର ହେଉଛନ୍ତି । ଯେତେବେଳେ ସାଧାରଣ ଲୋକଟିଏ ସୁରକ୍ଷିତ ନୁହେଁ ଏପରି ସ୍ଥିତିରେ କିନ୍ତୁ ମମତାଙ୍କ ସୁରକ୍ଷାରେ ନିୟୋଜିତ ହୋଇଛନ୍ତି ୬ ହଜାର ପୋଲିସ।

-    'ନବନ୍ନା ଅଭିଯାନ' ପଦଯାତ୍ରା ପୂର୍ବରୁ ୪ ଜଣ ଛାତ୍ରଙ୍କୁ ଗିରଫ କରାଯାଇଛି
-    କୋଲକାତା ପୁଲିସ କହିଛି ଯେ ହିଂସା କାଣ୍ଡ ଘଟାଇବାକୁ ଯୋଜନା କରିବା ସହିତ ହତ୍ୟା ଉଦ୍ୟମ କରୁଥିଲେ
-    ଗିରଫ ପୂର୍ବରୁ ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ ୪ ଛାତ୍ର ନିଖୋଜ ବୋଲି ଦାବି କରିଥିଲେ
-    ରାଜ୍ୟ ସଚିବାଳୟ ନିକଟରେ ୨୦ରୁ ଅଧିକ ସ୍ଥାନରେ ଲୁହା ଓ ଆଲୁମିନିୟମ ବ୍ୟାରିକେଡ୍
-    ବିକ୍ଷୋଭକାରୀ ବ୍ୟାରିକେଡ ଚଢ଼ିବା ଏବଂ ଡେଇଁବା ପୂର୍ବରୁ ପୁଲିସ ବ୍ୟାରିକେଡ୍ ଉପରେ ତେଲ ଲଗାଇଛି
-    ହାୱଡ଼ାରେ ପଶ୍ଚିମବଙ୍ଗ ସଚିବାଳୟକୁ ଯାଉଥିବା ରାସ୍ତାରେ ୬ ହଜାରରୁ ଅଧିକ ପୁଲିସ ମୁତୟନ
-    ହେଭି ରେଡିଓ ଫ୍ଲାଇଂ ସ୍କ୍ୱାଡ, ରାପିଡ୍ ଆକ୍ସନ୍ ଫୋର୍ସ ଏବଂ କ୍ୱିକ୍ ରିଆକ୍ସନ୍ ଟିମ୍ ସମେତ ବିଭିନ୍ନ ଜିଲ୍ଲାରୁ ଅତିରିକ୍ତ ଫୋର୍ସ ଅଣାଯାଇଛି
-    ପଶ୍ଚିମବଙ୍ଗ ପୋଲିସ କହିଛି ଯେ ଏହି ପ୍ରତିବାଦ "ବେଆଇନ"
-    ନବନ୍ନା ଅଭିମୁଖେ ପଦଯାତ୍ରା କରିବାକୁ ଅନୁମତି ନାହିଁ
-    ଏହି ପ୍ରତିବାଦ ଶୋଭାଯାତ୍ରାକୁ ପଶ୍ଚିମବଙ୍ଗ ଛାତ୍ର ସମାଜ ନାମକ ଏକ ଅଣପଞ୍ଜୀକୃତ ଛାତ୍ର ସଂଗଠନ ବୋଲି କୁହାଯାଇଛି
-    ୩୧ ବର୍ଷୀୟ ଟ୍ରେନି ଡାକ୍ତରଙ୍କୁ ନ୍ୟାୟ, ଦୋଷୀକୁ ଫାଶୀ ଦଣ୍ଡ ଏବଂ ମମତା ବାନାର୍ଜୀଙ୍କ ଇସ୍ତଫା ଦାବି କରିଛି ସଂଗଠନ