କନକ ବ୍ୟୁରୋ: ଅପରେସନ୍ ସିନ୍ଦୂରକୁ ନେଇ ଲୋକସଭାରେ ବଡ଼ ବିତର୍କ । ଲୋକସଭାରେ ୧୬ ଘଣ୍ଟା ଧରି ଚାଲିଥବା ଆଲୋଚନାରେ ଉତ୍ତର ପ୍ରଧାନମନ୍ତ୍ରୀ ଦେଇଛନ୍ତି । ପ୍ରାୟ ଏକ ଘଣ୍ଟା ୪୫ ମିନିଟ୍‌ ଧରି ଅପରେସନ ସିନ୍ଦୂର ନେଇ ପ୍ରତି ପ୍ରଶ୍ନର ଜବାବ ରଖିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ରାହୁଲ ଗାନ୍ଧିଙ୍କ ପ୍ରଶ୍ନର ଉତ୍ତର ବି ରଖିଥିଲେ । ବିବୃତ୍ତି ଆରମ୍ଭରୁ ସେନାର ପରାକ୍ରମକୁ ସାଲ୍ୟୁଟ୍‌ କରିବା ସହ ବିରୋଧୀଙ୍କୁ ସିଧା ଟାର୍ଗେଟ୍ କରିଛନ୍ତି । କହିଛନ୍ତି, ଗୃହରେ ଭାରତର ପକ୍ଷ ରଖିବାକୁ ଛିଡ଼ା ହୋଇଛି ମୁଁ ।

Advertisment

 ଅପରେସନ୍ ସିନ୍ଦୂରକୁ ୧୯୩ ଦେଶ ଆମକୁ ସମର୍ଥନ କରିଛନ୍ତି । କେବଳ ତିନି ଦେଶ ପାକିସ୍ତାନକୁ ସମର୍ଥନ କରିଛନ୍ତି । କିନ୍ତୁ ଦୁର୍ଭାଗ୍ୟର କଥା ଦେଶର ବୀରଙ୍କ ପରାକ୍ରମକୁ କଂଗ୍ରେସର ସମର୍ଥନ ମିଳିଲା ନାହିଁ । ଟ୍ରମ୍ପଙ୍କ ଦାବି ଉପରେ ପ୍ରଧାନମନ୍ତ୍ରୀ କହିଛନ୍ତି, ଦୁନିଆର କୌଣସି ଦେଶ ଆମକୁ ଅପରେସନ୍ ରୋକିବାକୁ କହିନାହନ୍ତି । କିନ୍ତୁ ଯୁଦ୍ଧବିରତି ପାଇଁ ପାକିସ୍ତାନ ଡିଜିଏମଓ ଫୋନ୍ କରି ଆମକୁ ଗୁହାରି କରିଥିଲେ । 

ସେପଟେ, ଅପରେସନ ସିନ୍ଦୂର ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆହୁରି କହିଛନ୍ତି, ପାକିସ୍ତାନ କଳ୍ପନାଠାରୁ ବଡ଼ ଦଣ୍ଡ ପାଇଛି । ପହଲଗାମ ଆକ୍ରମଣ ପରେ, ଆମେ ସିସିଏସର ଏକ ବୈଠକ ଡାକି ନିଷ୍ପତ୍ତି ନେଇଛୁ ଯେ ଆତଙ୍କବାଦକୁ ଉଚିତ ଜବାବ ଦିଆଯିବ । ଆବଶ୍ୟକ ଏବଂ ଏହା ଆମର ଜାତୀୟ ସଂକଳ୍ପ । ପ୍ରଧାନମନ୍ତ୍ରୀ କହିଛନ୍ତି, ଏହା ମଧ୍ୟ ଆଲୋଚନା ହୋଇଛି ଯେ କେବେ, କେଉଁଠି ଏବଂ କିପରି ଆକ୍ରମଣ କରାଯିବ ସେନେଇ ନିଜେ ନିଷ୍ପତ୍ତି ନେବା ଉଚିତ । 

ପ୍ରଧାନମନ୍ତ୍ରୀ ଆହୁରି କହିଛନ୍ତି, 'ଭାରତ ମେ’ ୬ ତାରିଖ ରାତିରେ ଏବଂ ମେ’ ୭ ସକାଳେ ଯୋଜନା ଅନୁଯାୟୀ କାର୍ଯ୍ୟ କରାଯାଇଥିଲା ଏବଂ ପାକିସ୍ତାନ କିଛି କରିପାରିଲା ନାହିଁ । ଆମର ସେନା ୨୨ ଏପ୍ରିଲର ପ୍ରତିଶୋଧ ୨୨ ମିନିଟ୍ ମଧ୍ୟରେ ଏକ ନିର୍ଦ୍ଦିଷ୍ଟ ଲକ୍ଷ୍ୟ ସହିତ ନେଇଥିଲା । ପାକିସ୍ତାନର ପ୍ରତ୍ୟେକ କୋଣରେ ଥିବା ଆତଙ୍କବାଦୀ ଶିବିରଗୁଡ଼ିକୁ ଧ୍ୱଂସ କରାଯାଇଥିଲା ବୋଲି ମୋଦୀ କହିଛନ୍ତି ।