କନକ ବ୍ୟୁରୋ : ଭାରତୀୟ ବାୟୁସେନା ନିଜର ସବୁଠାରୁ ପୁରୁଣା ଲଢ଼ୁଆ ବିମାନକୁ ଅବସର ଦେବାକୁ ନିଷ୍ପତ୍ତି ନେଇଛି । ଏୟାରଫୋର୍ସ ପକ୍ଷରୁ ସେପ୍ଟେମ୍ବରରେ ମିଗ୍-୨୧ ଲଢ଼ୁଆ ବିମାନର ସେବା ବନ୍ଦ କରିଦିଆଯିବ । ଏହା ସହିତ ସେପ୍ଟେମ୍ବରରେ ଚଣ୍ଡିଗଡ଼ ଏୟାରବେସରେ ଏକ ବିଦାୟ ସମାରୋହ ଆୟୋଜନ କରାଯିବ । ଏହି ସମୟରେ ଅଫିସିଆଲ୍ ଭାବରେ ଏହି ବିମାନଗୁଡ଼ିକୁ ଅବସର ଦିଆଯିବ । ଭାରତୀୟ ସେନାରେ ମିଗ୍-୨୧ ଲଢ଼ୁଆ ବିମାନର ଏଣ୍ଟ୍ରି ଆଜକୁ ଠିକ୍ ୬୨ ବର୍ଷ ପୂର୍ବେ ହୋଇଥିଲା । ଏହି ସମୟରେ ସେନାରେ ମିଗ୍-୨୧ର ୩ଟି ସ୍କ୍ଵାଡ୍ରନ୍ (ବାଇସନ୍ ଭାରିଏଣ୍ଟ) ସକ୍ରିୟ ଅଛି, ଯାହାକୁ ସେପ୍ଟେମ୍ବର ମାସରେ ହଟାଇ ଦିଆଯିବ । ଏହି ଫାଇଟର ଜେଟ୍ ସୁପରସୋନିକ୍ ଥିଲା ।

ସେପ୍ଟେମ୍ବରରେ ହେବ ବିଦାୟ ସମାରୋହ

Advertisment

ଭାରତୀୟ ବାୟୁସେନାର ସବୁଠାରୁ ପୁରୁଣା ସୁପରସୋନିକ୍ ଲଢ଼ୁଆ ବିମାନ ମିଗ୍-୨୧ ଏବେ ଇତିହାସ ହେବାକୁ ଯାଉଛି । ସୂତ୍ର ଅନୁସାରେ ପ୍ରାୟ ୬୨ ବର୍ଷର ସେବା ପରେ ମିଗ୍-୨୧କୁ ୧୯ ସେପ୍ଟେମ୍ବର ୨୦୨୫ ରେ ଔପଚାରିକ ଭାବରେ ବିଦାୟ ଦିଆଯିବ । ଚଣ୍ଡିଗଡ଼ ଏୟାରବେସରେ ହେବାକୁ ଥିବା ଏହି ଖାସ୍ ସମାରୋହରେ ବାୟୁସେନାର ବରିଷ୍ଠ ଅଧିକାରୀ, ମିଗ୍-୨୧ ସହିତ ଜଡ଼ିତ ପାଇଲଟ୍ ଏବଂ ଅନେକ ପୂର୍ବତନ ଭେଟେରାନଙ୍କ ସାମିଲ ହେବାର ସମ୍ଭାବନା ଅଛି ।

୬୨ ବର୍ଷ ରହିଲା ଭାରତୀୟ ସେନାର ଅଂଶ

ମିଗ୍-୨୧ ଭାରତୀୟ ବାୟୁସେନାରେ ୧୯୬୩ ରେ ସାମିଲ ହୋଇଥିଲା ଏବଂ ସେବେଠାରୁ ଏହା ପ୍ରତିଟି ବଡ଼ ଯୁଦ୍ଧ ଏବଂ ଅପରେସନର ଅଂଶ ରହିଛି । ୧୯୬୫ରେ ପାକିସ୍ତାନ ବିରୋଧରେ ଯୁଦ୍ଧ, ୧୯୭୧ର ବାଂଲାଦେଶ ମୁକ୍ତି ସଂଗ୍ରାମ, ୧୯୯୯ର କାର୍ଗିଲ ଯୁଦ୍ଧ ଏବଂ ନିକଟରେ ୨୦୧୯ର ବାଲାକୋଟ ଏୟାରଷ୍ଟ୍ରାଇକ ପ୍ରତିଟି ମୋର୍ଚ୍ଚାରେ ଏହି ଫାଇଟର ଜେଟ୍ ନିଜର ଶକ୍ତି ଦେଖାଇଛି । ମିଗ୍-୨୧ ବାୟୁସେନାର ପ୍ରଥମ ସୁପରସୋନିକ୍ ଫାଇଟର ଜେଟ୍ ଥିଲା ଯିଏ ୧୯୬୦ ଏବଂ ୭୦ ଦଶକରେ ଭାରତକୁ ବୈଷୟିକ ବିକାଶ ଦେଇଥିଲା । ଯେତେବେଳେ ଭାରତ ପାଖରେ ମିଗ୍-୨୧ର ୮୫୦ରୁ ଅଧିକ ବିମାନ ଥିଲା ସେଥିମଧ୍ୟରୁ ୬୦୦ରୁ ଅଧିକ ହିନ୍ଦୁସ୍ତାନ ଏରୋନୋଟିକ୍ସ ଲିମିଟେଡ୍ (HAL) ଭାରତରେ ହିଁ ତିଆରି କରିଥିଲା । ଚଣ୍ଡିଗଡ଼ ଏୟାରବେସରେ ହେବାକୁ ଥିବା ବିଦାୟ ସମାରୋହରେ ମିଗ୍-୨୧ର ଫ୍ଲାଏ-ପାଷ୍ଟ ଏବଂ ଷ୍ଟାଟିକ୍ ଡିସପ୍ଲେ ମଧ୍ୟ ହେବ, ଯାହାଦ୍ୱାରା ଏହି ଲଢ଼ୁଆ ବିମାନ ସବୁଦିନ ପାଇଁ ଭାରତୀୟ ସାମରିକ ଇତିହାସରେ ଲିପିବଦ୍ଧ ହୋଇରହିବ । ଯଦିଓ ମିଗ୍-୨୧ ଆଉ ଉଡ଼ାଣ ଭରିବ ନାହିଁ କିନ୍ତୁ ଏହାର କାହାଣୀ ଆଗାମୀ ପିଢ଼ିମାନଙ୍କୁ ଭାରତର ସାହସ, ବୈଷୟିକ ବିକାଶର ସ୍ମୃତି ମନେ ପକାଉଥିବ । ମିଗ୍-୨୧ ଫାଇଟର ଜେଟ୍ ଅବସର ନେବା ପଛରେ ଅନେକ କାରଣ କୁହାଯାଉଛି । ତେବେ ଏଥିମଧ୍ୟରେ ସବୁଠାରୁ ବଡ଼ କାରଣ ହେଉଛି ଲଗାତାର ଦୁର୍ଘଟଣା ହେବା । ଟେକନିକ୍ ପୁରୁଣା ହେବା ଏବଂ ଦୁର୍ଘଟଣା କାରଣରୁ ଏହାକୁ ଫ୍ଲାଇଙ୍ଗ୍ କଫିନ୍ ମଧ୍ୟ କୁହାଗଲା । ଅନେକ ପାଇଲଟ୍ ଏହାକୁ ଉଡ଼ାଇବା ସମୟରେ ନିଜର ଜୀବନ ହରାଇଛନ୍ତି । ତଥାପି ଏହି ବିମାନ ଅନେକ ପାଇଲଟଙ୍କ ପାଇଁ ଟ୍ରେନିଂ ଏବଂ ଲଢ଼ୁଆ ଅନୁଭବର ଏକ ମହତ୍ତ୍ୱପୂର୍ଣ୍ଣ ଅଂଶ ରହିଛି ।

କିଏ ନେବ ମିଗ୍-୨୧ର ସ୍ଥାନ?

ଏବେ ମିଗ୍-୨୧ର ସ୍ଥାନ ଧୀରେ ଧୀରେ ସ୍ୱଦେଶୀ ତେଜସ Mk-1A ବିମାନ ନେବ କିନ୍ତୁ ତେଜସର ଡେଲିଭରିରେ ବିଳମ୍ବ ହେବା କାରଣରୁ ମିଗ୍-୨୧କୁ ଅନେକ ଥର ଲାଇଫ୍ ଏକ୍ସଟେନସନ ଦେଇ ଉଡ଼ାଯାଉଥିଲା । ଏହାର ଅବସର ହେବା ପରେ ବାୟୁସେନାର ଲଢ଼ୁଆ ସ୍କ୍ଵାଡ୍ରନର ସଂଖ୍ୟା କେବଳ ୨୯ ରହିଯିବ । ସୂତ୍ର ଅନୁସାରେ ବାୟୁସେନାକୁ ମିଗ୍-୨୧ ଲମ୍ବା ସମୟ ଧରି ସେବା ଯୋଗାଇ ଆସୁଛି ଯାହା ଅନ୍ୟ କୌଣସି ଫାଇଟର୍ ଜେଟଙ୍କ ଦ୍ବାରା ଏପର୍ଯ୍ୟନ୍ତ ସମ୍ଭବ ହୋଇପାରିନାହିଁ । ଏହି ଜେଟ୍ ଦୁଇ-ତୃତୀୟାଂଶ IAFର ଇତିହାସ ସହିତ ଜଡ଼ିତ ରହିଛି । ଏହା ପ୍ରତିଟି ପାଇଲଟର କ୍ୟାରିୟର ସହ ମଧ୍ୟ ଜଡ଼ିତ ।