କନକ ବ୍ୟୁରୋ : ପରିଣାମ ଭୋଗିଲା ପହଲଗାମ ଆକ୍ରମଣର ମାଷ୍ଟରମାଇଣ୍ଡ । କର୍ମ ଅନୁସାରେ ଫଳ ପାଇଲା ଆତଙ୍କୀ ମୁସା ସହ ତାର ସହଯୋଗୀ । ୧୫ ଦିନ ଧରି ଜଙ୍ଗଲରେ ଲୁଚି ରହିଥିବା ଆତଙ୍କବାଦୀଙ୍କୁ ଟ୍ରାକ୍ କରୁଥିଲା ସେନା । ଅପରେସନ୍ ମହାଦେବ ଅଧୀନରେ ତିନି ଜଣ ଆତଙ୍କବାଦୀଙ୍କୁ ନିପାତ କରିଛି ଭାରତୀୟ ସେନା । ଏହି ଆତଙ୍କବାଦୀଙ୍କ ମଧ୍ୟରୁ ଦୁଇ ଜଣ ପହଲଗାମ ଆକ୍ରମଣରେ ସାମିଲ ଥିଲେ ।

Advertisment

୯୬ ଦିନ ପରେ ସେନାର ପ୍ରତିଶୋଧ । ସଇତାନକୁ ଶାସ୍ତି । ଜମ୍ମୁ କାଶ୍ମୀରରେ ସୁରକ୍ଷା ବାହିନୀକୁ ବଡ଼ ସଫଳତା । ଅପରେସନ୍ ମହାଦେବ ଅଧୀନରେ, ସୁରକ୍ଷା ବାହିନୀ ପହଲଗାମ୍ ଆତଙ୍କବାଦୀ ଆକ୍ରମଣରେ ସମ୍ପୃକ୍ତ ଆତଙ୍କବାଦୀଙ୍କୁ ନିପାତ କରିଛନ୍ତି । ତିନି ଜଣ ଆତଙ୍କବାଦୀଙ୍କ ମଧ୍ୟରେ ସୁଲେମାନଙ୍କୁ ଚିହ୍ନଟ କରାଯାଇଛି । ସୂଚନା ଅନୁସାରେ ପହଲଗାମ ଆକ୍ରମଣର ମାଷ୍ଟର ମାଇଣ୍ଡ ମୁସା ମଧ୍ୟ ସେନା ଗୁଳିରେ ନିହତ । ଏପ୍ରିଲ ୨୨ ତାରିଖରେ ପହଲଗାମରେ ଆତଙ୍କବାଦୀମାନେ ପର୍ଯ୍ୟଟକଙ୍କ ଉପରେ ଆକ୍ରମଣ କରି ୨୬ ଜଣଙ୍କୁ ହତ୍ୟା କରିଥିଲେ ।

ସକାଳ ୧୧.୩୦ରେ ଆତଙ୍କୀଙ୍କୁ ଘେରିଥିଲେ ସେନା । ତୀକ୍ଷ୍ଣ ନଜର ରଖିବା ସହ ସର୍ଚ୍ଚ ଅପରେସନ୍‌ ଆରମ୍ଭ । ଅଞ୍ଚଳରେ ସେନାର ଟିମ୍ ଭାଗ ଭାଗ ହୋଇ ମୁତୟନ ।ସାଟେଲାଇଟ୍‌ ଫୋନ୍‌ର ସିଗନାଲ୍ ଧରାପକାଇଥିଲା । ସେନାର ଅପରେସନ୍‌ରେ ୩ ଆତଙ୍କୀ ମୃତ । ଜଙ୍ଗଲରେ ତମ୍ବୁ ଭିତରେ ଲୁଚି ରହିଥିଲେ ଆତଙ୍କୀ ।

ପହଲଗାମ ଆତଙ୍କବାଦୀ ଆକ୍ରମଣରେ ପାକିସ୍ତାନୀ ଆତଙ୍କବାଦୀ ଆସିଫ ଫୌଜି(ମୁସା), ସୁଲେମାନ ଶାହ (ୟୁନୁସ) ଏବଂ ଆବୁ ତଲହା (ଆସିଫ) ସାମିଲ ଥିଲେ । ଅନ୍ୟ ଦୁଇ ଆତଙ୍କବାଦୀ ଆଦିଲ ଗୁରି ଏବଂ ଆହସାନ ସ୍ଥାନୀୟ ଆତଙ୍କବାଦୀ ଥିଲେ । ସେନା ପ୍ରାୟ ୧୨:୩୦ ସମୟରେ ସୂଚନା ଦେଇଥିଲା, ଶ୍ରୀନଗରର ଦାଚିଗାମ ଜାତୀୟ ଉଦ୍ୟାନ ନିକଟ ହରୱାନ ଅଞ୍ଚଳରେ ଆତଙ୍କବାଦୀ ଏବଂ ସୁରକ୍ଷା ବାହିନୀ ମଧ୍ୟରେ ଏନକାଉଣ୍ଟର ଆରମ୍ଭ ହୋଇଛି । ସେନାର ଚିନାର କର୍ପସ ସୋସିଆଲ ମିଡିଆ ଲେଖିଛନ୍ତି, ଅପରେସନ୍ ମହାଦେବ - ‘ଜେନେରାଲ୍ ଏରିଆ ଲିଡୱାସ୍’ରେ କରାଯାଇଛି । ଅପରାହ୍ନରେ ସେନା କହିଛି, ତିନି ଜଣ ଆତଙ୍କବାଦୀଙ୍କୁ ନିପାତ କରାଯାଇଛି ।

ଆତଙ୍କବାଦୀଙ୍କ ଉପସ୍ଥିତି ବିଷୟରେ ସୂଚନା ପାଇବା ପରେ ସୁରକ୍ଷା ବାହିନୀ ହରୱାନର ମୁଲନାର୍ ଅଞ୍ଚଳରେ ଅପରେସନ୍ ଆରମ୍ଭ କରିଥିଲେ । ଆତଙ୍କବାଦୀମାନେ ଜଙ୍ଗଲରେ ଅସ୍ଥାୟୀ ତମ୍ବୁ ସ୍ଥାପନ କରି ଲୁଚି ରହିଥିଲେ । ତିନି ଜଣ ପାକିସ୍ତାନୀ ଆତଙ୍କବାଦୀଙ୍କ ମୃତଦେହ ଉଦ୍ଧାର କରାଯାଇଛି । ଘଟଣାସ୍ଥଳରୁ ଗୋଟିଏ ଆମେରିକୀୟ ନିର୍ମିତ କାର୍ବାଇନ୍, ଗୋଟିଏ ଏକେ-୪୭ ରାଇଫଲ୍, ୧୭ଟି ରାଇଫଲ୍ ଗ୍ରେନେଡ୍ ଏବଂ ଅନ୍ୟାନ୍ୟ ସାମଗ୍ରୀ ମଧ୍ୟ ଜବତ କରାଯାଇଛି ।