ଗାଜା ପାଇଁ ବଡ଼ ଆର୍ଥିକ ସହାୟତା ଘୋଷଣା, ଟ୍ରମ୍ପଙ୍କ ଶାନ୍ତି ବୋର୍ଡ ବୈଠକରେ ସଦସ୍ୟ ରାଷ୍ଟ୍ରଙ୍କ ନିଷ୍ପତ୍ତି …

କନକ ବ୍ୟୁରୋ: ଗାଜାରେ ଶାନ୍ତି ପ୍ରତିଷ୍ଠା ଏବଂ ପୁନରୁଦ୍ଧାର ଦିଗରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ଵାରା ଗଠିତ 'ବୋର୍ଡ ଅଫ୍ ପିସ୍' ବା ଶାନ୍ତି ବୋର୍ଡର ସଦସ୍ୟମାନେ ଗାଜା ପାଇଁ ଏକ ବିଶାଳ ଆର୍ଥିକ ସହାୟତା ଘୋଷଣା କରିଛନ୍ତି । ସୂଚନା ଅନୁଯାୟୀ, ଗାଜାର ପୁନଃନିର୍ମାଣ ଏବଂ ସେଠାକାର ଲୋକଙ୍କୁ ମାନବିକ ସହାୟତା ଯୋଗାଇବା ପାଇଁ ୭ ବିଲିୟନ ଡଲାର ବା ପ୍ରାୟ ୫୮ ହଜାର କୋଟିରୁ ଅଧିକ ଟଙ୍କା ର ପାଣ୍ଠି ପ୍ରଦାନ କରିବାକୁ ବୋର୍ଡ ସଦସ୍ୟମାନେ ଘୋଷଣା କରିଛନ୍ତି ।

ଯୁଦ୍ଧ-ବିଧ୍ୱସ୍ତ ଗାଜାର ହେବ ପୁନରୁଦ୍ଧାର
ଖର୍ଚ୍ଚ ହେବ ୫୮ ହଜାର କୋଟିରୁ ଅଧିକ ଟଙ୍କା 

ଯୁଦ୍ଧରେ ବିଧ୍ୱସ୍ତ ଗାଜାର ଚିତ୍ର ଏବେ ସାରା ବିଶ୍ୱକୁ ଚିନ୍ତାରେ ପକାଇଛି । ଏହି ସଙ୍କଟ ମଧ୍ୟରେ ଟ୍ରମ୍ପ ପ୍ରଶାସନର ଶାନ୍ତି ବୋର୍ଡ ଏକ ନୂତନ ଆଶାର କିରଣ ଦେଖାଇଛି ।  ୭ ବିଲିୟନ ଡଲାରର ଅନୁଦାନ ମୁଖ୍ୟତଃ ଗାଜାରେ ଭିତ୍ତିଭୂମି ବିକାଶ, ସ୍ୱାସ୍ଥ୍ୟ ସେବା ଏବଂ ଶିକ୍ଷା ବ୍ୟବସ୍ଥାର ସୁଧାର ପାଇଁ ବିନିଯୋଗ କରାଯିବ । ବୋର୍ଡର ସଦସ୍ୟମାନେ ସ୍ପଷ୍ଟ କରିଛନ୍ତି , ଏହି ଅର୍ଥ କେବଳ ସହାୟତା ନୁହେଁ, ବରଂ ମଧ୍ୟପ୍ରାଚ୍ୟରେ ସ୍ଥାୟୀ ଶାନ୍ତି ପ୍ରତିଷ୍ଠା ପାଇଁ ଏକ ମୁଖ୍ୟ ପୁଞ୍ଜିନିବେଶ । ଟ୍ରମ୍ପଙ୍କ ଏହି ଶାନ୍ତି ବୋର୍ଡରେ ବିଶ୍ୱର ଅନେକ ପ୍ରଭାବଶାଳୀ ବ୍ୟକ୍ତି ଓ କୂଟନୀତିଜ୍ଞ ସାମିଲ ଅଛନ୍ତି, ଯେଉଁମାନେ ଗାଜାର ସ୍ଥିତି ସୁଧାରିବାକୁ ପ୍ରତିବଦ୍ଧତା ପ୍ରକାଶ କରିଛନ୍ତି । ବିଶେଷଜ୍ଞଙ୍କ ମତରେ, ଏହି ପଦକ୍ଷେପ ଦ୍ୱାରା ଇସ୍ରାଏଲ ଏବଂ ପାଲେଷ୍ଟାଇନ ମଧ୍ୟରେ ଲାଗି ରହିଥିବା ଉତ୍ତେଜନା ହ୍ରାସ ପାଇବା ସହ ସାଧାରଣ ନାଗରିକଙ୍କ ଜୀବନଶୈଳୀରେ ପରିବର୍ତ୍ତନ ଆସିବ ।

୭ ବିଲିୟନ ଡଲାରରୁ ଏକ ବଡ଼ ଅଂଶ ଗାଜାରେ ବାସହୀନ ହୋଇଥିବା ପରିବାରଙ୍କୁ ବାସଗୃହ ଯୋଗାଇବା ପାଇଁ ବ୍ୟବହାର ହେବ 

ଧ୍ୱଂସ ହୋଇଯାଇଥିବା ହସ୍ପିଟାଲ, ସ୍କୁଲ ଏବଂ ବିଦ୍ୟୁତ ଗ୍ରିଡ୍‌ର ମରାମତିକୁ ପ୍ରାଥମିକତା ଦିଆଯିବ 
‘ବୋର୍ଡ ଅଫ୍ ପିସ୍’ ଆରବ ଦେଶଗୁଡ଼ିକର ସମର୍ଥନ ଲୋଡ଼ିଛି, ଯାହାଫଳରେ ସହାୟତା ବଣ୍ଟନ ସଠିକ୍ ଭାବେ ହୋଇପାରିବ 

ସ୍ଥାନୀୟ ଯୁବକମାନଙ୍କୁ ପୁନଃନିର୍ମାଣ କାର୍ଯ୍ୟରେ ନିୟୋଜିତ କରି ସେମାନଙ୍କୁ ଆର୍ଥିକ ଭାବେ ସ୍ୱାବଲମ୍ବୀ କରିବାକୁ ଲକ୍ଷ୍ୟ ରଖାଯାଇଛି 

ସହାୟତା ରାଶି ଯେପରି କୌଣସି ଆତଙ୍କବାଦୀ କାର୍ଯ୍ୟକଳାପରେ ବ୍ୟବହାର ନହୁଏ, ସେଥିପାଇଁ ଟିମ୍ ଗଠନ କରାଯାଇଛି

ବୋର୍ଡ ଅଫ୍ ପିସ୍’ ବୈଠକରେ ବିଶ୍ୱର ପ୍ରମୁଖ ଶକ୍ତିଶାଳୀ ଦେଶମାନେ ଏକାଠି ହୋଇଛନ୍ତି । ଏହି ମହାମିଳନରେ ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ, କାତାର ଏବଂ କୁଏତ ଭଳି ମଧ୍ୟପ୍ରାଚ୍ୟର ଦେଶଗୁଡ଼ିକ ଗାଜା ପାଇଁ ୭ ବିଲିୟନ ଡଲାରର ସହାୟତା ରାଶି ପ୍ରଦାନ କରିବାକୁ ସମ୍ମତି ଜଣାଇଛନ୍ତି । କେବଳ ସେତିକି ନୁହେଁ, କାଜାଖସ୍ତାନ, ଆଜରବୈଜାନ, ମରକ୍କୋ ଏବଂ ଉଜବେକିସ୍ତାନ ମଧ୍ୟ ଏହି ପାଣ୍ଠିରେ ନିଜର ଯୋଗଦାନ ଦେବେ ।