କନକ ବ୍ୟୁରୋ: ସୁପ୍ରିମକୋର୍ଟ ପ୍ରଧାନ ବିଚାରପତି ବି.ଆର୍‌. ଗବାଇ ଭରଣପୋଷଣ ସମ୍ବନ୍ଧୀୟ ଏକ ମାମଲାର ଶୁଣାଣି କରି ଜଣେ ମହିଳାଙ୍କୁ ଭର୍ତ୍ସନା କରି କହିଛନ୍ତି, ଆପଣ ଏତେ ଉଚ୍ଚଶିକ୍ଷିତା, ଏମବିଏ କରିଛନ୍ତି । ଭରଣପୋଷଣ ଦାବି କରିବା ଅପେକ୍ଷା ନିଜେ ରୋଜଗାର କାହିଁକି କରୁନାହାନ୍ତି । 'ଯଦି ଏତେ ଜିନିଷ ନେବାକୁ ଇଚ୍ଛା, ତେବେ ନିଜେ ରୋଜଗାର କର'; ମହିଳାଙ୍କ ଭରଣପୋଷଣ ଆବେଦନକୁ ନେଇ ଏଭଳି ଜବାବ ଦେଇଛନ୍ତି ସୁପ୍ରିମକୋର୍ଟ । ବିବାହର ୧୮ ମାସ ପରେ ବିବାଦ ହେବାରୁ ମହିଳା ଛାଡ଼ପତ୍ର ପାଇଁ ଆବେଦନ କରିଥିଲେ । ଆବେଦନରେ ଭରଣପୋଷଣ ପାଇଁ ସେ ସ୍ବାମୀଙ୍କଠାରୁ ୧୨କୋଟି ଟଙ୍କା, ମୁମ୍ବାଇରେ ଏକ ଘର ଏବଂ ବିଏମଡବ୍ଲୁ କାର୍  ମାଗିଥିଲେ । ଏହି ଦାବି ଦେଖି ଆବେଦନର ଶୁଣାଣି କରୁଥିବା ଖଣ୍ଡପୀଠ ଆଶ୍ଚର୍ଯ୍ୟ ହେବା ସହ ମହିଳାଙ୍କୁ ‌ରୋଜଗାର କରିବାକୁ ପରାମର୍ଶ ଦେଇଛନ୍ତି ।

Advertisment

ସୁପ୍ରିମକୋର୍ଟ ପ୍ରଧାନ ବିଚାରପତି କହିଥିଲେ "ଆପଣ ଏତେ ଶିକ୍ଷିତ । ନିଜ ପାଇଁ ଆପଣ ରୋଜଗାର କରିବା ଉଚିତ । ନିଜର ଖର୍ଚ୍ଚ ପାଇଁ ଏଭଳି ମାଗିବା ଉଚିତ୍ ନୁହେଁ । ଆପଣ ମଧ୍ୟ ଇଞ୍ଜିନନିୟରିଂ କରିଛନ୍ତି । ବେଙ୍ଗାଲୁରୁ, ହାଇଦ୍ରାବାଦ ଭଳି ସହରରେ ଆପଣ ଭଲ ଚାକିରି କରିପାରିବେ । କାହିଁକି ଏଯାଏଁ କାମ କରିନାହାନ୍ତି ? ମାତ୍ର ୧୮ମାସର ବିବାହ ପରେ ଆପଣ ନିଜ ସ୍ବାମୀଙ୍କଠାରୁ ବିଏମଡବ୍ଲୁ ଚାହୁଛନ୍ତି?"

ନିଜ ଦାବିକୁ ଯଥାର୍ଥ ବୋଲି କହି ମହିଳା ଜଣକ କହିଥିଲେ ଯେ, "ତାଙ୍କ ସ୍ୱାମୀ ବହୁତ ଧନୀ ଏବଂ ସେ ବିବାହକୁ ଅମାନ୍ୟ ଘୋଷଣା କରିବାକୁ ଚାହୁଥିଲେ । ମୁଁ ସ୍କିଜୋଫ୍ରେନିଆ ରୋଗରେ ପୀଡ଼ିତ ହୋଇଥିବାରୁ ଚାକିରି କରିପାରିନାହିଁ ।" ଏହା ଶୁଣି ଖଣ୍ଡପୀଠ କହିଥିଲେ, ଯଦି ଉଚ୍ଚ ଶିକ୍ଷିତା ହୋଇ ଆପଣ ଚାକିରି ନକରିବାକୁ ନିଷ୍ପତ୍ତି ନେଇଛନ୍ତି, ତେବେ ଆପଣଙ୍କୁ କେବଳ ଏକ ଫ୍ଲାଟ ମିଳିବ । ଏହାଠାରୁ ଅଧିକ କିଛି ନୁହେଁ ।

କିଛିଦିନ ତଳେ ଓଡ଼ିଶାରେ ମଧ୍ୟ ସମାନ ଘଟଣା ଦେଖିବାକୁ ମିଳିଥିଲା । ଏକ ଛାଡ଼ପତ୍ର ମାମଲାର ହାଇକୋର୍ଟ ଗୁରୁତ୍ବପୂର୍ଣ୍ଣ ଶୁଣାଣି କରିଥିଲେ । ଯଦି ସ୍ତ୍ରୀ ଉଚ୍ଚଶିକ୍ଷିତା ଏବଂ ରୋଜଗାରକ୍ଷମ ହେବାକୁ ସକ୍ଷମ ଥା’ନ୍ତି ସେ କ୍ଷେତ୍ରରେ ସେ ତାଙ୍କ ସ୍ବାମୀଙ୍କଠାରୁ ଭରଣପୋଷଣ ଦାବିକୁ ହାଇକୋର୍ଟ ଗ୍ରହଣ କରିପାରିବେ ନାହିଁ ବୋଲି କହିଥିଲେ । ରାଉରକେଲାର ଏକ ଛାଡ଼ପତ୍ର ମାମଲାରେ ସୁନ୍ଦରଗଡ଼ ଫ୍ୟାମିଲି କୋର୍ଟ ସମ୍ପୃକ୍ତ ମହିଳାଙ୍କୁ ମାସିକ ୮ ହଜାର ଟଙ୍କା ଭରଣପୋଷଣ ଦେବାକୁ ସ୍ବାମୀଙ୍କୁ ନିର୍ଦ୍ଦେଶ ଦେଇଥିଲେ । ହେଲେ ଏହି ନିର୍ଦ୍ଦେଶ ବିରୋଧରେ ହାଇକୋର୍ଟର ଦ୍ବାରସ୍ଥ ହୋଇଥିଲେ ସ୍ବାମୀ ଜଣକ ଏବଂ ଏଥିପାଇଁ ସେ ସମର୍ଥ ନୁହଁନ୍ତି ବୋଲି ଉଚ୍ଚତମ ନ୍ୟାୟାଳୟଙ୍କୁ ଜଣାଇଥିଲେ । ତାଙ୍କ ଉପରେ ତାଙ୍କ ମା’ ଓ ଅନ୍ୟମାନେ ନିର୍ଭରଶୀଳ ଦର୍ଶାଇ ନିର୍ଦ୍ଧାରିତ ପରିମାଣର ଭରଣପୋଷଣ ଦେବାକୁ ଅସମର୍ଥ ବୋଲି ଦର୍ଶଶଇ ହାଇକୋର୍ଟରେ ବିଚାର କରିବାକୁ ଆବେଦନ କରିଥିଲେ । ଏହାକୁ ବିଚାର କରି ଖଣ୍ଡପୀଠ ୮ ହଜାର ଟଙ୍କାରୁ ୫ ହଜାର ଟଙ୍କାକୁ ହ୍ରାସ କରିବା ସହ ଗୁରୁତ୍ବପୂର୍ଣ୍ଣ ନିଷ୍ପତ୍ତି ଶୁଣାଇଥିଲେ । ଯଦି କୌଣସି ମହିଳା ଉଚ୍ଚଶିକ୍ଷିତା ଏବଂ ଚାକିରି କରିବାକୁ ଯୋଗ୍ୟ ସେ କ୍ଷେତ୍ରରେ ତାଙ୍କ ମାସିକ ଭରଣପୋଷଣ ଦାବିକୁ କୋର୍ଟ ଗ୍ରହଣ କରିପାରିବେ ନାହିଁ ।