କନକ ବ୍ୟୁରୋ : ବାଂଲାଦେଶ ପରି ଏବେ ନେପାଳରେ ସ୍ଥିତି ଭୟଙ୍କର ହେବାରେ ଲାଗିଛି । ରାସ୍ତାରେ ନିଆଁ ଜଳୁଛି, ଟେକା ପଥର ମାଡ଼ ହେଉଛି । ଦୋକାନ ବଜାର ଭାଙ୍ଗି ଚାଲିଛି ଲୁଟ୍‌ପାଟ । ଯାହା ମନକୁ ଯାହା ଆସିଲା ତାହା କଲା । ନେପାଳ ପ୍ରଧାନମନ୍ତ୍ରୀଙ୍କ ଇସ୍ତଫା ପରେ ସ୍ଥିତି ସଙ୍ଗୀନ ହୋଇ ଉଠିଛି । 

Advertisment

ଗତକାଲି ନେପାଳର ପ୍ରଧାନମନ୍ତ୍ରୀ କେପି ଶର୍ମା ଓଲି ତାଙ୍କ ପଦରୁ ଇସ୍ତଫା ଦେଇଛନ୍ତି । ସେନା ମୁଖ୍ୟ ଜେନେରାଲ ଅଶୋକ ରାଜ ସିଗଡେଲ ଓଲିଙ୍କୁ ପଦ ଛାଡିବାକୁ ପରାମର୍ଶ ଦେଇଥିଲେ । ସେ କହିଥିଲେ ଯେ ଇସ୍ତଫା ଦେବା ପରେ ହିଁ ପରିସ୍ଥିତିରେ ଉନ୍ନତି ହେବ । ନେପାଳରେ ସୋସିଆଲ ମିଡିଆ ଆପ୍ ଉପରେ ପ୍ରତିବନ୍ଧକ ଲଗାଇବା ବିରୋଧରେ ଜେନେରାଲ-ଜେଡ୍ ପ୍ରତିବାଦ କରୁଛନ୍ତି । ପ୍ରତିବାଦକାରୀମାନେ ରାଷ୍ଟ୍ରପତିଙ୍କ ଗୃହରେ ନିଆଁ ଲଗାଇ ଦେଇଥିଲେ । ଦେଶର ପରିସ୍ଥିତି ଖରାପ ହେଉଥିବା ମଧ୍ୟରେ, ରାଷ୍ଟ୍ରପତି ରାମଚନ୍ଦ୍ର ପାଉଡେଲ ମଧ୍ୟ ପ୍ରଧାନମନ୍ତ୍ରୀ ଓଲିଙ୍କ ଇସ୍ତଫା ଗ୍ରହଣ କରିଛନ୍ତି । ସୁରକ୍ଷା ଦୃଷ୍ଟିରୁ ଓଲି ବର୍ତ୍ତମାନ ନେପାଳ ସେନା ବଳୟରେ ଅଛନ୍ତି । 

ଇସ୍ତଫାପତ୍ରରେ କ'ଣ ଲେଖିଛନ୍ତି ଓଲି?
କେପି ଶର୍ମା ଓଲି ତାଙ୍କ ଇସ୍ତଫାପତ୍ରରେ ଲେଖିଛନ୍ତି, " ମାନ୍ୟବର ରାଷ୍ଟ୍ରପତି, ନେପାଳ ସମ୍ବିଧାନର ଧାରା ୭୬ (୨) ଅନୁଯାୟୀ ୩୧ ଆସାଦ ୨୦୧୮  ମସିହାରେ ପ୍ରଧାନମନ୍ତ୍ରୀ ଭାବରେ ନିଯୁକ୍ତ ହେବା ପରେ ଏବଂ ଦେଶରେ ବର୍ତ୍ତମାନ ଦେଖାଦେଇଥିବା ଅସାଧାରଣ ପରିସ୍ଥିତିକୁ ଦୃଷ୍ଟିରେ ରଖି, ମୁଁ ସମ୍ବିଧାନର ଧାରା ୭୭ (୧) (A) ଅନୁଯାୟୀ ଆଜିଠାରୁ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଉଛି, ଯାହା ଦ୍ଵାରା ମୁଁ ସମ୍ବିଧାନ ଅନୁଯାୟୀ ରାଜନୈତିକ ସମାଧାନ ଏବଂ ସମସ୍ୟାର ସମାଧାନ ଦିଗରେ ଆହୁରି ପଦକ୍ଷେପ ନେଇପାରିବି ।"

ଓଲି ତିନିଥରର ନେପାଳ ପ୍ରଧାନମନ୍ତ୍ରୀ 
କେପି ଶର୍ମା ଓଲି ୨୦୧୫ ମସିହାରେ ପ୍ରଥମ ଥର ପାଇଁ ନେପାଳର ପ୍ରଧାନମନ୍ତ୍ରୀ ହୋଇଥିଲେ । ସେ ଅକ୍ଟୋବର ୨୦୧୫ ରୁ ଅଗଷ୍ଟ ୨୦୧୬ ପର୍ଯ୍ୟନ୍ତ ପ୍ରଧାନମନ୍ତ୍ରୀ ପଦବୀରେ ରହିଥିଲେ । ଏହା ପରେ, ସମର୍ଥନ ହରାଇବା ଯୋଗୁଁ ତାଙ୍କୁ ଇସ୍ତଫା ଦେବାକୁ ପଡିଲା । ୨୦୧୮ ମସିହାରେ ଓଲି ଦ୍ୱିତୀୟ ଥର ପାଇଁ ପ୍ରଧାନମନ୍ତ୍ରୀ ହୋଇଥିଲେ । ସେ ଫେବୃଆରୀ ୨୦୧୮ ରୁ ମେ ୨୦୨୧ ପର୍ଯ୍ୟନ୍ତ ଏହି ପଦବୀରେ ରହିଥିଲେ । ଓଲିଙ୍କୁ ପୁଣି ଥରେ ଇସ୍ତଫା ଦେବାକୁ ପଡିଲା । ସେ ଦ୍ୱିତୀୟ ଥର ପାଇଁ ୩ ବର୍ଷ ୮୮ ଦିନ ପାଇଁ ଏହି ପଦବୀରେ ରହିଥିଲେ । ଓଲି ଜୁଲାଇ ୨୦୨୪ ରୁ ଅଗଷ୍ଟ ୨୦୨୫ ପର୍ଯ୍ୟନ୍ତ ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଥିଲେ ।

ଓଲିଙ୍କୁ ସେନା ମୁଖ୍ୟଙ୍କ ପରାମର୍ଶ?
ସେନା ମୁଖ୍ୟ ଜେନେରାଲ ଅଶୋକ ରାଜ ସିଗଡେଲ ପୂର୍ବରୁ ଓଲିଙ୍କୁ ଇସ୍ତଫା ଦେବାକୁ ପରାମର୍ଶ ଦେଇଥିଲେ । ନେପାଳୀ ଗଣମାଧ୍ୟମ ଅନୁସାରେ, ସେ କହିଥିଲେ, "ଯଦି ଆପଣ କ୍ଷମତା ଛାଡିବେ, ତେବେ ପରିସ୍ଥିତିରେ ଉନ୍ନତି ହେବ ।" ଏବେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ଓଲି । ତାଥାବି ସ୍ଥିତିରେ କୌଣସି ସୁଧାର ଆସିନି...