ଭାରତର ଟାରିଫ୍ ମୁକାବିଲା ରଣନୀତି, କୂଟନୈତିକ ପ୍ରହାର ପାଇଁ ମାଷ୍ଟରପ୍ଲାନ୍

କନକ ବ୍ୟୁରୋ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ୫୦ ପ୍ରତିଶତ ଟାରିଫ୍ ଲଦିବା ପରେ ଏହାର ମୁକାବିଲା ପାଇଁ ଭାରତ ବିଦେଶୀ ରାଷ୍ଟ୍ରଙ୍କ ସହ କୂଟନୈତିକ ଓ ବାଣିଜ୍ୟିକ ସମ୍ପର୍କ ବୃଦ୍ଧି ପାଇଁ ପଦକ୍ଷେପ ଆରମ୍ଭ କରିଛି । ଶୁକ୍ରବାର ପ୍ରଧାନମନ୍ତ୍ରୀ ମୋଦୀ ଫୋନ୍ ଯୋଗେ ବ୍ରାଜିଲ୍ ରାଷ୍ଟ୍ରପତି ଲୁଲା ଡି ସିଲଭାଙ୍କ ସହ ଆଲୋଚନା କରିଛନ୍ତି । ଦ୍ବିପାକ୍ଷିକ ବାଣିଜ୍ୟ, ବୈଷୟିକ, ଶକ୍ତି, ପ୍ରତିରକ୍ଷା, କୃଷି ଓ ସ୍ବାସ୍ଥ୍ୟ କ୍ଷେତ୍ରରେ ସମ୍ପର୍କ ସୁଦୃଢ଼ କରିବା ପାଇଁ ଦୁଇଦେଶ ରାଜି ହୋଇଛନ୍ତି । ବ୍ରାଜିଲ ମଧ୍ୟ ଆମେରିକା ଟାରିଫ୍ ବୃଦ୍ଧି ସମସ୍ୟାର ସାମ୍ନା କରୁଛି ।  ନିକଟରେ ମୋଦୀ ବ୍ରାଜିଲ ଗସ୍ତ କରିଥିବା ବେଳେ ମଧ୍ୟ ଆଲୋଚନା କରିଥିଲେ। କେବଳ ଏତିକି ନୁହେଁ, ପାରମ୍ପରିକ ବନ୍ଧୁ ରାଷ୍ଟ୍ର ଋଷ୍ ସହ ସମ୍ପର୍କ ଆହୁରି ମଜଭୁତ କରାଯାଉଛି । ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଋଷ ଯାଇ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଅନ୍ୟ ପ୍ରସଙ୍ଗ ସହ ମୁଖ୍ୟତଃ ଆମେରିକାର ଟାରିଫ୍ ନେଇ ଆଲୋଚନା କରିଛନ୍ତି । ଚଳିତବର୍ଷ ଋଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ ଭାରତ ଆସିବା ସମ୍ଭାବନା ଅଛି । 

ଋଷଠାରୁ ଭାରତ ଅଧିକ ତୈଳ ଆମଦାନୀ କରୁଥିବାରୁ ଆମେରିକା ଅଯଥା ରାଗୁଥିବା ବେଳେ ଦେଶର ସ୍ବାର୍ଥ ପାଇଁ ସାଲିସ କରାଯିବ ନାହିଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି । ବାଣିଜ୍ୟ ସମ୍ପର୍କ ରକ୍ଷା ଦୁଇଦେଶର ଅଧିକାର ବୋଲି ସ୍ପଷ୍ଟ କରିଦିଆଯାଇଛି । ଚୀନ୍‌ ସହ ମଧ୍ୟ ସମ୍ପର୍କ ବଢ଼ାଉଛି ଭାରତ ।  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଖୁବ୍‌ଶୀଘ୍ର ଚୀନ୍‌ ଗସ୍ତ କରିବେ । ଆମେରିକାର ଟାରିଫ ପ୍ରସଙ୍ଗରେ ଆଲୋଚନା ହେବ ।  ବ୍ରାଜିଲ ସମେତ ଅନ୍ୟ ବ୍ରିକ୍ସ ରାଷ୍ଟ୍ର ଏବଂ ବିଭିନ୍ନ  ବିକାଶଶୀଳ ରାଷ୍ଟ୍ରଙ୍କ ସହ  ଦ୍ବିପାକ୍ଷିକ ସମ୍ପର୍କ ବୃଦ୍ଧି ପାଇଁ ଚେଷ୍ଟା କରୁଛି ଭାରତ । ଆମେରିକା ଟାରିଫ୍ ବୋଝର ମୁକାବିଲା ପାଇଁ ପ୍ରଧାନମନ୍ତ୍ରୀ କୂଟନୀତି ସହ ବାଣିଜ୍ୟ ଓ ଦେଶର ସ୍ବାର୍ଥ ମଧ୍ୟରେ ସନ୍ତୁଳନ ରକ୍ଷା କରି ପଦକ୍ଷେପ ନେବା ଆରମ୍ଭ କରିଛନ୍ତି ।